ఈ నెలలో గృహ ప్రవేశానికి అనుకూలమైన తేదీలు, శుభ ముహుర్తాలివే..

హిందూ సాంప్రదాయం ప్రకారం గృహ ప్రవేశం అనేది చాలా ముఖ్యమైనది. ఒకప్పుడు గృహ ప్రవేశాన్ని రెండు రకాలుగా జరిపేవారు

Updated: Monday, November 4, 2019, 15:05 [IST]

మీరు నవంబర్ నెలలో కొత్త ఇంటిని కొన్నారా? లేదా మీ ఇంటి నిర్మాణాన్ని ఈ నెలలో పూర్తి చేసేశారా? అన్ని పూర్తయ్యాక మంచి ముహుర్తం కోసం ఎదురుచూస్తున్నారా? అయితే గృహ ప్రవేశానికి సంబంధించి ఈ నెలలో అనుకూల తేదీలు, పూజా వేళాలు, మరియు హోమం, వాస్తు శాంతి పూజల వివరాలను తెలుసుకోండి.

ఎందుకంటే గృహ ప్రవేశం అంటేనే హిందూ సంప్రదాయం ప్రకారం చాలా ఆచారాలు, ముహుర్తాలు, నక్షత్రాలు, తిథులు మరియు సమయాలను చాలా మంది పాటిస్తారు. కాబట్టి మీరు మీ కొత్త ఇంట్లోకి ప్రవేశించడానికి మీకు అనుకూలమైన తేదీలను ఎంచుకోండి.

గృహ ప్రవేశానికి చాలా ప్రాధాన్యత..

హిందూ సాంప్రదాయం ప్రకారం గృహ ప్రవేశం అనేది చాలా ముఖ్యమైనది. ఒకప్పుడు గృహ ప్రవేశాన్ని రెండు రకాలుగా జరిపేవారు. తొలుత కొత్త పెళ్లికూతురు పుట్టింటి నుండి అత్తారింటిలో అడుగు పెట్టినప్పుడు ఘనంగా జరుపుకునే వేడుక. ఇదంతా ఎందుకు జరుపుకుంటారంటే అత్తారింట్లో అడుగు పెట్టిన కోడలు ఆ ఇంటి భవిష్యత్తుని, వంశం అభివృద్ధి, ఇంటి జీవన శైలిలో ఎన్నో రకాల అభివృద్ధి పరమైన పనులకు మరియు మార్పులకు దోహదపడుతుంది. ఏ కోడలు అయినా అత్తింట్లో అడుగు పెట్టిన తర్వాత తన పుట్టింటి ఆత్మీయతకు దూరమైనప్పటికీ మెట్టినింటి మెరుగుదల కోసం తన వంతుగా ఎనలేని సేవలు అందిస్తుంది. ఆ కుటుంబం మంచి కుటుంబం అనే పేరు రావడానికి కీలక పాత్ర పోషిస్తుంది. అందుకే గృహ ప్రవేశానికి చాలా ప్రాధాన్యత ఇస్తారు.

నివాస యోగ్యం చేసే ప్రక్రియనే ..

ఇక రెండో రకం విషయానికొస్తే ఏదైనా ఒక ఇంటిని కొత్తగా నిర్మాణం చేసినప్పుడు దాన్ని నివాస యోగ్యం చేసే ప్రక్రియనే గృహ ప్రవేశ ప్రక్రియ అంటారు. ఇందుకు గాను ముందే ఇంటి ప్లాన్, కట్టే విధానం, రంగులు వేయడం తదితర వాటినన్నింటిని పూర్తి చేస్తాం. అంతే కాదు ఆ స్థలంలో అనుకూల శక్తి సైతం వస్తుంది అనే చాలా ముఖ్యమైన విషయం. ఇంకోవైపు గృహప్రవేశం అనేది ఒక చిన్న ప్రతిష్ట లాంటిదే.