Ganesh Chaturthi 2021:ఇంట్లో గణేష్ పూజ సమయంలో చేయాల్సిన, చేయకూడని పనులివే...!

పూజకు ముందు..

మీ ఇంట్లో వినాయకుని ప్రతిమ ఉంచే ముందు.. మీరు, మీ ఇంట్లోని కుటుంబ సభ్యులందరూ సూర్యోదయానికి ముందే స్నానం చేయాలి. పర్యావరణానికి అనుకూలమైన మట్టితో తయారు చేసిన వినాయక విగ్రహాన్ని తీసుకురావాలి. వినాయకుని తొండం ఎడమవైపునకు తిరిగి ఉండాలి. అయితే కుడివైపునకు తిరిగి ఉన్న తొండం ఉన్న వినాయకుడిని తీసుకోవచ్చు. అయితే కొన్ని ప్రత్యేక నియమాలు పాటించాల్సి ఉంటుంది.

పూజ సమయంలో..

వినాయకుని ప్రతిమను ఇంట్లోకి తెచ్చే సమయంలో ఏదైనా వస్త్రంతో లేదా గణేశుడి తలను కప్పి ఉంచాలి. పూజ ప్రారంభించేంత వరకు అది తీయకూడదు. పూజ ప్రారంభించేటప్పుడు కొంత గంగాజలంతో వినాయకుడి విగ్రహాన్ని శుభ్రం చేయాలి. ఎరుపు రంగు గంధపు తికాలన్ని గణపతి నుదుటిపై ఉంచాలి. అనంతరం విఘేశ్వరుని పవిత్ర మంత్రాలు పఠించాలి. మీరు విగ్రహాన్ని మీ ఇంట్లో ఒకటిన్నర రోజు, మూడు రోజులు, ఐదు రోజులు, ఏడు రోజులు, పది రోజులు లేదా నిమజ్జనం వరకు ఇంట్లో ఉంచుకోవచ్చు.

ఇవి ఉంచాలి..

వినాయకుడి పూజ సమయంలో లంబోదరుడికి ఇష్టమైన ఉండ్రాళ్లు, గరిక, కొబ్బరికాయ, వెలగకాయ, లడ్డు, వంటి నైవేద్యాలను సిద్ధం చేసుకోవాలి. అలాగే ఐదు రకాల పండ్లు, పంచామృతంతో పూజలు చేస్తే శుభ ఫలితాలు కలుగుతాయని పండితులు చెబుతారు. అలాగే వినాయకుడికి కొబ్బరినూనెతోనే దీపారాధన చేయాలి. బెల్లంతో తయారు చేసిన ఆహార పదార్థాలతో నివేదన చేయాలి.

దానధర్మాలు..

వినాయకుడికి ఇష్టమైన రోజు బుధవారం. ఈ పవిత్రమైన రోజున మీ సామర్థ్యం మేరకు పేదలకు దాన ధర్మాలు చేయాలి. వినాయక చవితిని గోమాతను కూడా పూజిస్తే మీ సమస్యలు తొలగిపోతాయని.. మీరు ఎలాంటి పోటీలో అయినా విజయం సాధిస్తారని పండితులు చెబుతున్నారు.

ఇక్కడ ఉంచకూడదు..

వాస్తు శాస్త్రం ప్రకారం, మీ ఇంట్లో కొన్ని ప్రదేశాల్లో వినాయకుడి విగ్రహాన్ని అస్సలు ఉంచకూడదు. మీ ఇంటి మెయిన్ గేటుకు ఎదరుగా, ఇంట్లోకి ప్రవేశించే మార్గం సమీపంలో వినాయకుని విగ్రహం ఉంచకూడదు. అలాగే వినాయకుని విగ్రహం బాత్ రూమ్ గోడ సమీపంలో అస్సలు పెట్టకూడదు. అదే విధంగా హాలులో కూడా వినాయక విగ్రహాన్ని ఉంచి పూజ చేయకూడదు. ఇలా చేయడం వల్ల మీ వైవాహిక జీవితంలో సమస్యలు ఎదురవుతాయి. భార్యభర్తల మధ్య తరచుగా గొడవలు, ఆందోళన పెరిగే అవకాశం ఉంటుంది, కాబట్టి వీటిని నివారించాలి.

ఇవి చేయకండి..

మీ ఇంట్లో నాట్యం చేస్తున్నట్లు ఉన్న వినాయక విగ్రహాన్ని పొరపాటున కూడా ఉంచుకోవద్దు. అలాగే ఇలాంటి విగ్రహాలను ఎవ్వరికీ గిఫ్టుగా కూడా ఇవ్వకూడదట. నాట్యం చేస్తున్న వినాయక విగ్రహం ఉంటే, ఆ ఇంట్లో నిత్యం గొడవలు, వివాదాలు వచ్చే అవకాశం ఉంటుందని చాలా మంది నమ్ముతారు. అలాగే ఎవరైనా పెళ్లి సందర్భంగా వినాయక విగ్రహాన్ని బహుమతిగా ఇవ్వకూడదట. మీ ఇంట్లో విగ్రహాన్ని నేరుగా మీరు నిమజ్జనం చేయకండి. పెద్ద పెద్ద విగ్రహాలు ప్రతిష్టించిన చోటకు వెళ్లి ఇవ్వండి. అలాగే వినాయక విగ్రహాల నిమజ్జనం సమయంలో అలంకరణలు తీసేయండి.