అద్భుత శక్తులున్న 4 రామాలయాలు ఇవే!

జీవితంలో మనం ఎన్ని ప్రయత్నాలు చేసినా ఫలితం దక్కక క్లిష్ట క్షణాలు ఎదురవుతుంటాయి. ఆశలు సన్నగిల్లి, దిక్కుతోచని స్థితిలో ఉన్నప్పుడు కోట్లాది మంది భారతీయుల చూపు ఆకాశం వైపు, ఒకే ఒక్క దివ్య నామం వైపు మళ్లుతుంది. ఆ నామమే శ్రీరాముడు. ముఖ్యంగా దక్షిణ భారతదేశంలో రాముడి పట్ల ఉన్న భక్తి అనంతమైనది.

శతాబ్దాల విశ్వాసంతో ముడిపడి ఉన్న కొన్ని రామక్షేత్రాలకు ఒక ప్రత్యేకమైన దివ్యశక్తి ఉంటుందని భక్తుల నమ్మకం. ఇక్కడ అద్భుతాలంటే ఆకాశం నుంచి ఉరుముల్లా ఊడిపడేవి కావు.. నెరవేరిన కోరికలు, తిరిగి చిగురించిన బంధాలు, జీవితంపై ఆకస్మికంగా కలిగే స్పష్టత, ఊహించని మానసిక బలం. అలాంటి మహిమాన్వితమైన నాలుగు దక్షిణ భారత ఆలయాల గురించి ఇక్కడ చూడండి.

గ్రహాల శక్తితో పాటు దైవానుగ్రహం.. పూజలో ఈ రంగు వస్త్రాన్నే ఎందుకు ఉపయోగిస్తారో తెలుసా.?

రామస్వామి ఆలయం- తమిళనాడు

16వ శతాబ్దపు నాయక రాజుల కాలంలో నిర్మితమైన ఈ ఆలయం రామాయణ మహాకావ్యానికి సజీవ శిలా రూపం. ఇక్కడి స్తంభాలపై, ప్రాంగణాల్లో చెక్కిన శిల్పాలు రామాయణ ఘట్టాలను కళ్ళకు కడతాయి. గర్భగుడిలో శ్రీరాముడు సీతా, లక్ష్మణ, హనుమ సమేతంగా పట్టాభిషేక భంగిమలో కొలువై ఉంటాడు. సుదీర్ఘమైన పోరాటం తర్వాత ఏర్పడే ప్రశాంతతకు, సామరస్యానికి ఈ రూపం ప్రతీక. కుటుంబ కలహాలతో సతమతమయ్యేవారు ఇక్కడ పూజలు చేస్తే బంధాలు బలపడతాయని, ఇంట ప్రశాంతత నెలకొంటుందని విశ్వాసం.

కోదండరామస్వామి ఆలయం - ఒంటిమిట్ట

విజయనగర వాస్తుశైలిలో నిర్మితమైన ఈ ఆలయం మధ్యయుగపు శిల్పకళకు ఒక అద్భుత నిదర్శనం. ఇక్కడ సీతారామలక్ష్మణుల విగ్రహాలను ఒకే రాతిలో మలచడం విశేషం. చేతిలో కోదండం ధరించి వీర రూపంలో ఉన్న రాముడిని ఇక్కడ పూజిస్తారు. కష్టకాలంలో ధైర్యం, రక్షణ, మానసిక స్పష్టత కావాలనుకునేవారు ఈ స్వామిని శరణువేడుకుంటారు. తన మధురమైన పద్యాలతో భాగవతాన్ని రచించి దేవునికే అంకితమిచ్చిన కవి బమ్మెర పోతనకు ఈ ఆలయంతో విడదీయరాని బంధం ఉంది. ఆంధ్రప్రదేశ్ రాష్ట్ర ప్రభుత్వం ప్రతి ఏటా శ్రీరామనవమి వేడుకలను ఇక్కడే అధికారికంగా నిర్వహిస్తుంది. ఇక్కడికి వస్తే అంతులేని ఆత్మబలం కలుగుతుందని యాత్రికులు చెబుతారు.

భద్రాచల సీతారామచంద్ర స్వామి ఆలయం

తెలంగాణ రాష్ట్రంలోని గోదావరి నదీ తీరాన వెలసిన భద్రాచలం దేశంలోని అత్యంత పూజనీయమైన రామక్షేత్రాల్లో ఒకటి. 17వ శతాబ్దంలో కంచర్ల గోపన్న (భక్త రామదాసు) అపారమైన భక్తి ప్రపత్తులతో ఈ క్షేత్రం ప్రాచుర్యంలోకి వచ్చింది. ప్రభుత్వ నిధులతో ఆలయం కట్టించాడన్న నెపంతో రామదాసును కారాగారంలో పెడితే, స్వయంగా శ్రీరాముడే ఆ బాకీ తీర్చి తన భక్తుడిని విడిపించాడని చరిత్ర చెబుతోంది. ఈ గాథే ఆలయ దివ్యత్వానికి పునాది. ఇక్కడి దైవాన్నివైకుంఠ రాముడు అని కొలుస్తారు. ఆర్థిక కష్టాలు, దీర్ఘకాలిక సమస్యల నుంచి విముక్తి కోరుతూ భక్తులు ఇక్కడికి వస్తారు. నవమి నాడు జరిగే దివ్య సీతారామ కళ్యాణం చూస్తే వివాహ బంధాలు బలపడి, కష్టాలన్నీ తీరిపోతాయని ప్రగాఢ నమ్మకం.

హిందూ దేవుళ్లు ఎప్పుడూ నీలం రంగులోనే ఎందుకు కనబడతారో తెలుసా?

త్రిప్రయార్ శ్రీరామ దేవాలయం-కేరళం

కేరళం రాష్ట్రంలోని త్రిసూర్ జిల్లాలో ఉన్న ఈ ఆలయం విలక్షణమైనది. ఇక్కడి శ్రీరాముని విగ్రహం శతాబ్దాల క్రితం సముద్రంలో లభ్యమైందని చెబుతారు, ఇది ఈ క్షేత్ర పవిత్రతను మరింత పెంచుతుంది. సాంప్రదాయ కేరళ వాస్తుశైలిలో ఉండే ఈ ఆలయం దర్శించి ఇక్కడ ప్రార్థిస్తే జీవితంలోని అడ్డంకులన్నీ తొలగిపోయి, అంతులేని మానసిక ప్రశాంతత లభిస్తుందని నమ్ముతారు. ముఖ్యంగా ఏకాదశి పర్వదినాన వేలాది మంది భక్తులు ఉపవాస దీక్షలతో, ప్రత్యేక ఆచారాలతో స్వామివారిని పూజిస్తారు. ఇక్కడికి వచ్చిన వారు తమ మనసులోని భారాన్ని దేవుడికి వదిలేసి, ఒక సరికొత్త స్పష్టతతో, అగాధమైన ప్రశాంతతతో తిరిగి వెళుతుంటారు.