కీరదోస, టమోటలతో నిగనిగలాడే చర్మ సౌందర్యం..!

Published: Friday, December 16, 2011, 14:09 [IST]

జిడ్డు చర్మతత్వం కలిగినవారు వంటింట్లో రోజువారి కూరగాయలతో... టమోటో, కీరదోస ముక్కలను సమపాళ్లలో తీసుకుని మెత్తగా రుబ్బుకోవాలి. దీనికి రెండు టీస్పూన్ల నిమ్మరసం కలిపి ముఖానికి, మెడకు రాసుకోవాలి. పది నిమిషాల తరువాత చన్నీటితో కడిగేయాలి. ఇలా చేస్తే చర్మంపై పేరుకున్న అధిక జిడ్డు తొలగిపోయి, నల్లమచ్చలు, మొటిమలు దూరమవుతాయి. అలాగే ఓట్‌ మీల్ పౌడర్‌ కు అరకప్పు యాపిల్ గుజ్జు, రెండు టీస్పూన్ల నిమ్మరసం కలిపి ముఖానికి ప్యాక్ వేయాలి. పదినిమిషాల తరువాత శుభ్రం చేస్తే, జిడ్డు చర్మం ప్రకాశవంతంగా తయారవుతుంది

ముఖంపై పేరుకున్న మురికి, జిడ్డును తొలగించేందుకు.. క్యారెట్, క్యాబేజీ, టమోటో ముక్కలను సమపాళ్లలో తీసుకుని మెత్తగా నూరి పేస్టులా చేసుకోవాలి. ముందుగా ముఖాన్ని చల్లటి నీటితో కడిగిన తరువాత నూరిన మిశ్రమాన్ని ప్యాక్‌ లా వేయాలి. ఐదు నిమిషాల తరువాత మునివేళ్లతో వలయాకారంలో మర్దనా చేయాలి. ఆరిన తరువాత చన్నీటితో ముఖం కడిగేయాలి. ఆ తరువాత ముల్తానీ మట్టితో ముఖం, మెడకు ప్యాక్ వేసుకుని, కాసేపాగి శుభ్రం చేసుకోవాలి. చివరిగా నాణ్యమైన మాయిశ్చరైజర్ రాసుకుంటే, చర్మం తాజాదనంతో మిలమిలా మెరిసిపోతుంది.