ఆపిల్ తింటున్నారా? గింజలు మింగితే ఏమవుతుంది?

రోజుకి ఒక ఆపిల్ తింటే చాలు జీవితంలో డాక్టర్ దగ్గరకు వెళ్లాల్సిన పనిలేదనేది తరచుగా నిపుణులు చెబుతుండే మాట. ఇది అక్షరాలా నిజం కూడా. ఆపిల్ పండు పోషకాల గని. అద్భుతమైన రుచితో పాటు, మన ఆరోగ్యానికి మేలు చేసే ఎన్నో విటమిన్లు, మినరల్స్, ఫైబర్ ఇందులో పుష్కలంగా ఉంటాయి. ఆపిల్ తినడం వల్ల మన శరీరం ఆరోగ్యంగా మారుతుంది. అదేసమయంలో, దీనిని చర్మానికి పట్టిస్తే చర్మం మృదువుగా, ప్రకాశవంతంగా తయారవుతుంది. ఆపిల్‌ ను తింటున్నప్పుడు ఒక్కోసారి మనం పొరపాటున దాని గింజలను కూడా మింగేస్తుంటాం. అసలు ఆపిల్ గింజలు తింటే మన శరీరంలో ఏం జరుగుతుంది? అది ప్రమాదకరమా?

ఆపిల్ గింజల వెనుక ఉన్న అసలు రహస్యం
ఆపిల్ గింజల వెనుక ఒక చిన్న శాస్త్రీయ రహస్యం ఉంది. ఈ గింజల్లో అమిగ్డాలిన్ అనే రసాయన సమ్మేళనం ఉంటుంది. ఇది మన శరీరంలోని జీర్ణవ్యవస్థలో చేరినప్పుడు, అది విచ్ఛిన్నమై హైడ్రోజన్ సైనైడ్ గా మారుతుంది. సైనైడ్ అత్యంత ప్రమాదకరమైన విషం అని మనకు తెలుసు. ఈ విషయం వినగానే భయపడాల్సిన అవసరం లేదు, ఎందుకంటే ఒక గింజలో ఉండే అమిగ్డాలిన్ పరిమాణం చాలా చాలా తక్కువ.

పొరపాటున కొన్ని గింజలు మింగితే ఏమవుతుంది?
మీరు ఆపిల్ తింటున్నప్పుడు పొరపాటున 2 లేదా 3 గింజలను మింగితే ఆందోళన చెందనవసరం లేదు. ఎందుకంటే ఆపిల్ గింజల పైభాగంలో చాలా గట్టి పొర ఉంటుంది. ఇది ఒక రక్షణ కవచంలా పనిచేస్తుంది. మన జీర్ణవ్యవస్థ ఈ కఠినమైన పొరను ఛేదించలేదు. దీంతో లోపలున్న అమిగ్డాలిన్ బయటకు రాదు, సైనైడ్ రిలీజ్ కాదు. ఆ గింజలు జీర్ణం కాకుండానే మలంతో పాటు శరీరం నుండి బయటకు వచ్చేస్తాయి. కాబట్టి పొరపాటున కొన్ని గింజలను మింగడం వల్ల ఎలాంటి హాని జరగదు.

అసలు ప్రమాదం ఎప్పుడు?
ఎవరైనా ఉద్దేశపూర్వకంగా పెద్ద మొత్తంలో గింజలను, ముఖ్యంగా బాగా నమిలి తిన్నప్పుడు ప్రమాదకరమే. గింజలను నమలడం వల్ల వాటిపై ఉండే రక్షణ పొర పగిలిపోయి, లోపలున్న అమిగ్డాలిన్ విడుదలవుతుంది. ఇది జీర్ణవ్యవస్థలో సైనైడ్‌ గా మారుతుంది. ఒక వ్యక్తి శరీరం విషపూరితం కావాలంటే సుమారు 150-200 గింజలను ఒకేసారి నమిలి తినాల్సి ఉంటుంది. అలా జరిగినప్పుడు వాంతులు, కడుపునొప్పి, తలతిరగడం, శ్వాస తీసుకోవడంలో ఇబ్బంది వంటి లక్షణాలు కనిపిస్తాయి. కొన్ని తీవ్రమైన సందర్భాల్లో ఇది ప్రాణాంతకం కూడా కావచ్చు. అయితే సాధారణంగా ఎవరూ ఇన్ని గింజలను తినరు కాబట్టి ఇది చాలా అరుదైన విషయం.

చివరిగా చెప్పేదేంటంటే
ఆపిల్ పండు తినే ముందు గింజలను తీసివేయడం ఉత్తమమైన, సురక్షితమైన అలవాటు. ఒకవేళ పొరపాటున కొన్ని గింజలు కడుపులోకి వెళ్లినా కంగారు పడకండి, దానివల్ల మీ ఆరోగ్యానికి ఎలాంటి ముప్పు వాటిల్లదు. ఆపిల్ పండులోని అద్భుత ప్రయోజనాలను ఆస్వాదించండి, కానీ దాని గింజల విషయంలో మాత్రం కాస్త అవగాహనతో, జాగ్రత్తగా ఉండండి.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.