అమ్మమ్మల వంటలు...తినకుంటే తంటాలు!

By B N Sharma

Published: Wednesday, April 18, 2012, 15:23 [IST]

నేటి రోజుల్లో ఆహార తయారీ, ఆహారంమరోసారి ప్రాధాన్యత సంతరించుకుంటున్నాయి. కాని నేడు మనం తినే ఆహారాలు ఎంతవరకు ఆరోగ్యకరం అనేది ప్రశ్నగానే మిగిలిపోతోంది. ఏ ఆహార తయారీ అయినా ఒక్కసారి టి.వి. షోలలో చూపిస్తేచాలు ఆ ఆహార తయారీకి అవసరమయ్యే పదార్ధాలు మార్కెట్లలో తేలికగా లభ్యమైపోతూంటాయి. అమ్మకాలు విపరీతంగా పెరిగిపోతూంటాయి. టి.వి.షోలో వండినదే ప్రజలు కూడా వండుకుంటారు. కాని ఈ రకమైన వంటలు మన శరీరానికి మంచివేనా? ఈ వంటలు నేటి ఊబకాయానికి ఆహార సంబంధిత గుండె వ్యాధులకు, టైప్ 2 డయాబెటీస్ కు పరిష్కారాన్ని చూపేవిగా వున్నాయా?

ఈ ప్రశ్నలకు సమాధానాలుగా...ఈ రకమైన వంటకాలు ఏ మాత్రం ఆరోగ్యాన్ని చేకూర్చవంటున్నారు పోషకామార నిపుణులు. వండుకోవటం ఆనందమే. వంటల పుస్తకాలు విరివిగా అమ్ముడు పోతున్నాయి. ఒక భోజనంలో 70 సంవత్సరాల క్రిందట సుమారు 268 కేలరీలుండగా, 2006లో చేసిన ఒక సర్వేలో సగటున ఒక భోజన ఆహారంలో 436 కేలరీల శక్తి వున్నట్లు వెల్లడైంది. కేలరీలు అధికం కావటానికి కారణం పదార్ధాలలోని మార్పులు, అధిక కొవ్వు, షుగర్ కాగా, పరిమాణం కూడా పెరిగిందని పోషకామార నిపుణులు తెలుపుతున్నారు.

ఇక మనం ప్లేటులో పెట్టుకునే ఆహారం కూడా అధికమైపోతోంది. క్రోకరీ ప్లేట్ల సైజు పెద్దదైంది. 50 ఏళ్ళ క్రిందటికంటే డిన్నర్ ప్లేట్లు నేడు 30 శాతం పెద్దవిగా వున్నాయి. పెద్ద ప్లేటు అంటే అందరూ ఇష్టపడుతున్నారు. 12 అంగుళాల ప్లేటు నుండి మీరు 10 అంగుళాల ప్లేటుకు వెళితే, సుమారుగా ఒక సంవత్సరంలో 8 కెజిల బరువు తగ్గవచ్చంటున్నారు నిపుణులు. బరువు క్రమేణా తగ్గడం శరీరానికి మంచిదని, డయాబెటీస్, గుండె జబ్బులు వంటివి దరి చేరవని వీరు భావిస్తున్నారు.

గతంలోని వంటమనుషులకు పదార్ధాలను ఏ రకంగా బ్యాలెన్స్ చేసి వాడాలో తెలిసేది. వివిధ రకాలు ఆరోగ్యకరంగా ఎలా కలపాలనేది వారికి బాగా తెలుసు. కాని నేటి వంటమనుషులు అన్ని రకాల రుచులకు ప్రాధాన్యతలనిస్తున్నారు. ప్రాధమికంగా వుండవలసిన ఆరోగ్య కర ఆహార సూత్రాలను మరచిపోయి, రుచికి మాత్రమే తయారు చేస్తున్నారు. టి.వి.లలో, పుస్తకాలలో వచ్చే కొత్త రకాల వంటలలో సమతుల్యత లోపిస్తోందని, ఆరోగ్యం చేకూర్చడం వీటికి కష్టమైన పని అని నిపుణులు అభిప్రాయపడుతున్నారు. ఆరోగ్యకరమైన ఆహారాల తయారీలకు మరోమారు మనమంతా మన పూర్వీకుల వంటల పద్ధతికి వెళ్ళవలసిన అవసరాలున్నాయని కూడా నిపుణులు హెచ్చరిస్తున్నారు.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.