సహజ ఆహారాలతో డయాబెటీస్ నియంత్రణ?

By B N Sharma

Published: Saturday, June 23, 2012, 12:31 [IST]

షుగర్ వ్యాధి ఒకేసారి మనకు తెలియకుండా వచ్చేది కాదు. ముందుగా రోగ లక్షణాలు తెలుస్తాయి. అంతేకాక, కుటుంబంలో డయాబెటీస్ తల్లి లేదా తండ్రికి వుంటే కూడా దాని ప్రభావం పిల్లలపై పడే అవకాశం వుంది. ఈ వ్యాధి వస్తుందనుకున్నపుడు కొన్ని ముందు జాగ్రత్తలు తీసుకోవడం అవసరం. ప్రధానంగా వ్యాధి గురించిన అవగాహన కలిగి వుండాలి. దానికి తగిన వైద్యం, తాజాగా వస్తున్న వైద్య రంగ మార్పులు, సంబంధిత పరికరాలు తెలిసి వుండాలి. అప్పటివరకు ఏ రకమైన ఆహారాలు తిన్నప్పటికి, సూచనలు కనిపించగానే ఆహారంలో మార్పులు చేయాలి. హానికరమైన ఉప్పు, కొవ్వు, షుగర్, ఆల్కహాలు వంటివి తొలగించాలి. ప్రధానంగా ఆహారంలో ఉప్పును వీరు తొలగించాలి. ఆహారంలో ఉప్పును తొలగిస్తే, వ్యాధి నియంత్రణ ఎంతో తేలిక అవుతుంది. ఆహార నియమాలతో పాటు కొద్దిపాటి వ్యాయామం లేదా నడక వంటివి మరింత సహకరించి వ్యాధిని దూరంగా వుంచే అవకాశాలు ఇస్తాయి. నేటి రోజుల్లో గతంలో వలే, షుగర్ వ్యాధి నియంత్రణలకు, పరీక్షలకు లేబరేటరీల అవసరం కూడా లేదు.

తాజాగా మార్కెట్ లో దొరికే డయాబెటీస్ నియంత్రణ పరికరాలు కొని ఇంటిలోనే ఎప్పటికపుడు షుగర్ స్ధాయిలను తెలుసుకొని నియంత్రించవచ్చు. వ్యాధి ముదిరిన తర్వాత కంటే వచ్చిన వెంటనే జీవన విధానాలు సరిచేసుకుంటే డయాబెటీస్ నియంత్రించటం, నివారణ కష్టమేమీకాదు. ప్రతిరోజూ తినే ఆహారంతోనే కొన్ని వ్యాధులను నివారించుకోవచ్చు. వాటిలో డయాబెటీస్ లేదా షుగర్ వ్యాధి ఒకటి. మీరు తినే ఆహార పదార్ధాలలో మార్పులు చేస్తే వ్యాధినివారణ సులభంగా వుంటుంది. బ్లడ్ గ్లూకోజ్ లెవెల్స్ ను మనం తీసుకునే ఆహారం నేరుగా నియంత్రిస్తూంటుంది. డయాబెటీస్ కలవారు వారి జీవన విధానం, వ్యక్తిగత అవసరాలను బట్టి వారి ఆహార ప్రణాళిక నిర్ధారించుకోవాలి.

రక్తంలోని గ్లూకోజ్ లెవెల్స్ ను ప్రభావించే ఆహారాలు ఏమిటనేది ముందుగా తెలుసుకోండి. ఈ ఆహారాలు మాత్రమే తీసుకుంటుంటే, అపుడపుడూ మీకు తినాలనిపించిన తిండ్లు కూడా తిని ఆనందించవచ్చు. డయాబెటీస్ రాగానే ఇష్టమైన ఆహారాలు వదలాలని భావిస్తారు. కాని డయాబెటీస్ వారు ఏం తినాలనేది తెలిస్తే మీకు ఆహారంలో కూడా ఎన్నో ఎంపికలుంటాయి. కనుక సరైన, డయాబెటిక్ కు కావలసిన ఆహారాలు ఎంపిక చేసుకోండి. వీటిని తింటూంటే మీ డయాబెటీస్ నియంత్రణలో వుంటుంది. కార్బో హైడ్రేట్లు రక్తంలోని గ్లూకోజును అధికం చేస్తాయి.

మన శరీరం అనేక ఆహారాలను గ్లూకోజ్ గా రెండు గంటల్లో మారుస్తుంది. అందుకనే డయాబెటీస్ రోగులు ఆహారాలకు అంత ప్రాధాన్యతనివ్వాలి. గోధుమ అన్నం, చపాతీలు, మొలకెత్తిన విత్తనాలు, తాజా పండ్లు, పచ్చని ఆకు కూరలు, ఉడికించిన కూరలు, బ్రౌన్ బ్రెడ్ మొదలైన వాటికి, ప్రొటీన్లు అధికంగా వుండే ఆహార పదార్ధాలకు ప్రాధాన్యతనివ్వాలి. నూనెలు, ఇతర కొవ్వు కల ఉత్పత్తులను మానండి. ఈ ఆహారాలు తింటూ డయాబెటీస్ లేదా షుగర్ వ్యాధిని పూర్తిగా అదుపులో వుంచుకొని, సందర్భం ఏదైనా వచ్చినపుడు మీరు తినాలనుకున్న ఇతర పదార్ధాలను కూడా తినవచ్చు.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.