శరీరానికి ఇన్‌ఫ్లమేషన్(హాని) కలిగించే ఆహారాలు...!

చక్కెరలు: చక్కెరతో తయారుచేసిన అన్ని పదార్థాలూ ఇన్‌ఫ్లమేషన్‌ను పెంచుతాయి.

వంటనూనెలు: కుసుమ, సోయా, పొద్దుతిరుగుడు, కార్న్ నూనెలతో పాటు, పత్తినూనె సహా అన్ని రకాల వంటనూనెలూ (ఆలివ్ నూనె మినహా) ఇన్‌ఫ్లమేషన్‌ను పెంచుతాయి.

ట్రాన్స్‌ఫ్యాట్స్ (కొవ్వులు): కొలెస్ట్రాల్‌ను పెంపొందించే అన్ని కొవ్వులు, వేపుళ్లు, ఫాస్ట్‌ఫుడ్స్, బేకరీ ఐటమ్స్, దీర్ఘకాలికంగా నిల్వ ఉంచడానికి మార్జరిన్ వంటి నూనెను ఉపయోగించిన ఆహారాలు ఇన్‌ఫ్లమేషన్‌ను అధికం చేస్తాయి.

పాలలోని అలర్జీకి కారణమయ్యే అంశాలు: పాలలోని అలర్జీ కలిగించే పదార్థాలు చాలా సందర్భాల్లో ఒంటిపై ర్యాష్ వచ్చేలా చేయడం ద్వారా ఇన్‌ఫ్లమేషన్ కలిగించవచ్చు. (అయితే అలర్జీ కారణంగా అవి సరిపడనివారికి మినహా మిగతా వారందరికీ పాలు మంచి ఆహారం).

కొన్ని రకాల ఆహారంపై పెంచిన జంతు మాంసం: కొన్నిచోట్ల ఆహారంగా ఉపయోగపడే జంతువులను సోయా, కార్న్ వంటి ఎక్కువ ఇన్‌ఫ్లమేషన్‌కు కారణమయ్యే ఆహారంపై పెంచుతారు. ఇక కొన్ని జంతువులు త్వరగా లావెక్కి, వేగంగా కొవ్వు పట్టడానికి హార్మోన్ ఇంజెక్షన్లు చేస్తారు. ఇలాంటి జంతువుల మాంసం ఇన్‌ఫ్లమేషన్‌ను పెంచుతుంది.

రెడ్‌మీట్, ప్రాసెస్‌డ్ మీట్: కొవ్వు ఎక్కువగా ఉండే గొడ్డు మాంసంలో ఎన్‌ఈయూ5జీసీ అనే పదార్థం ఉంటుంది. ఇది శరీరంలోకి చేరగానే ఇన్‌ఫ్లమేటరీ గుణాన్ని పెంపొందిస్తుంది. అందుకే ఏదైనా ఇన్‌ఫ్లమేషన్ ఉన్నప్పుడు రెడ్‌మీట్‌ను పరిమితంగా తీసుకోవాలి లేదా దానికి బదులు ఆ సమయంలో కోడిమాంసం, చేపలు తీసుకోవాలి.

ఆల్కహాల్ : ఆల్కహాల్ శరీరంలోని చాలా భాగాల్లో ఉండే ఇన్‌ఫ్లమేషన్‌ను పెంచుతుంది. శరీరంలో లోపల ఉండే భాగాల్లో ఇన్‌ఫ్లమేషన్ ఉండి, క్రమం తప్పకుండా ఆల్కహాల్ తీసుకుంటుంటే ఆ ఇన్‌ఫ్లమేషన్ క్యాన్సర్‌గా రూపొందే అవకాశమూ ఉంది.

రిఫైన్‌డ్ ధాన్యాలు : ధాన్యంపై ఉండే పొట్టును తొలగించి తీసుకునే ఆహారం ఇన్‌ఫ్లమేషన్‌ను పెంచుతుంది.

ఆహారానికి కలిపే కృత్రిమ పదార్థాలు : కొన్ని రకాల ఆహారాలకు ఆస్పార్టమే, ఎమ్‌ఎస్‌జీ అనే అడెటివ్స్ కలుపుతారు. ఇవి కలిపిన ఆహారం ఇన్‌ఫ్లమేషన్‌ను పెంచుతుంది.

మీరు సరిపడని ఆహారం : కొందరిలో కొన్ని ఆహారాలు అలర్జీని కలిగిస్తాయి. ఇలా సరిపడని ఆహారాల వల్ల కూడా ఇన్‌ఫ్లమేషన్ పెరుగుతుంది.