షడ్రుచుల మేళవింపు ..పచ్చతోరణాలతో ఇంటికి సరి కొత్త అందం...

Published: Wednesday, March 21, 2012, 9:13 [IST]

Mango and Neem leaves are considered auspicious for Ugadi Festival

ఉగాది ఒక వారం ముందే పండగ పనులు మొదలవుతాయి. ఇంటికి వెల్ల వేసి, శుభ్రం చేసుకుంటారు. కొత్త బట్టలు, కొత్త సామాగ్రీ కొనడంలో ఉత్సాహం పండుగ సందడి ఒక వారం ముందేమొదలవుతుంది. పూజా మందిరాన్ని రంగవల్లికలతో అలంకరించుకోవాలి. పండుగ రోజున తెల్లవారుఝామునే లేచి, తలస్నానం చేసి, పూజామందిరము, ఇల్లు మొత్తం శుభ్రం చేయాలి. గడపకు పసుపు కుంకుమ, ఇంటికి మామిడి తోరణాలు, వేపాకుతో అలంకరించాలి. పచ్చటి మామిడి తోరనాలకు ఈ రోజుకు సంబంధించి ఒక కధ ఉంది. శివపుత్రులు గణపతి, సుబ్రమణ్యస్వాములకు మామిడి పండ్లంటే ఎంతో ప్రీతి. సుబ్రహ్మణ్యుడు ఏ ఇంటికి పచ్చని మామిడి తోరణాలు కట్టి ఉంటాయో ఆ ఇంటిలో సంపద, మంచి పంట కలుగుతుందని దీవించాడని కధ.

ప్రతీ ఇంట ముందు ఆవు పేడతో కల్లాపి జల్లి , రంగు రంగుల రంగవల్లులు తీర్చి దిద్దుతారు. శాస్త్రయుక్తంగా తమ ఇష్టదైవానికి పూజ చేసుకుని కొత్త సంవత్సరం అంత శుభం కలగాలనికోరుకుంటారు. ఆరోగ్య ఐశ్వర్యాలను ఆకాంక్షిస్తారు . ఈ రోజున కొత్త పనులు వ్యాపారాలు మొదలెడతారు. ఇంటింట ప్రత్యేక వంటకాలు తయారు చేస్తారు. పులిహోర, బొబ్బట్లు, పాయసం, అలాగే పచ్చి మామిడి కాయతో వంటకాలు విశేషం. పూజకు ఉగాది పచ్చడి నైవేద్యం, పసుపు రంగులు పుష్పాలు వాడాలి. ఉగాది పండుగ రోజున ఉదయం ఆరు గంటల నుంచి 9 గంటల వరకు పూజ చేయవచ్చు. దీపారాధనకు రెండు ప్లస్ రెండు దూది వత్తులు, ఆవునెయ్యి వాడాలి.

షడ్రుచుల మేళవింపు అమృతప్రాయం పచ్చడి...ఉగాది పండుగ రోజు ప్రత్యేకంగా సేవించే పానంకం పచ్చడిలో తీపి, చేదు, వగరు, పులుపు, ఉప్పు, కారం అన్ని ఆరు రకాల శడ్రుచులను కలిపి తయారు చేసే పచ్చడిని ప్రజలు ఆమృత ప్రాయంగా భావిస్తారు. ఔషద గుణాలు కలిగి ఉన్న బెల్లం, చింతపండు, మామిడి, వేపపుపవ్వు, మిరియాలు, ఉప్పు, కొబ్బరి నీటిలో కలిపి తయారు చేసి కొత్త కుండలో నిలువచేసే పచ్చడి మన సాంప్రదాయానికి నిదర్శంగానే కాకుండా ఆరోగ్యానికి ఎంతో మంచిది. మరొక వంటకం బొబ్బట్లు, బూరెలు ఉగాది స్పెషల్ వంటకాలతో ప్రతి ఇల్లు ఘుమఘుమలతో అలరిస్తూ ఉంటుంది.