అద్దెఇల్లు అయితేనేం సువిశాలంగా తీర్చిదిద్దండి...

Published: Thursday, February 2, 2012, 14:25 [IST]

Tips for Small Spaces, that can make your home look larger...

ప్రస్తుతం పెరిగిన జనాభా, అధిక ధరలు వల్ల పోను పోను ఇళ్ళ విస్తీర్ణం తగ్గిపోతుంది. కొన్ని కుటుంబాలైతే ఆర్థిక పరంగా ఎదగలేకపోవడంతో చిన్నఇల్లతో సరిపెట్టుకుంటారు. ఇంట్లోని నివసించడం, ఆ ఇంటిని హరివిల్లులా అందంగా తయారుచేయడం గృహిణి భాద్యతే. పట్టణాల్లో అద్దెలు భారమవుతుండడంతో చాలా కుటుంబాలు చిన్న ఇళ్లల్లోనే కాపురం పెట్టుకుంటున్నాయి. పెద్ద కిటికీలతో ధారాళమైన గాలివీచే ఇళ్లు దొరకడం ఇప్పుడు దాదాపు అరుదే. ఇంటికి సంబంధించి విశాలమనే మాటను మరిచిపోయి ఇరుకు ఇళ్లల్లోనే సర్దుకునే పరిస్థితులు ఇవి. అయితే కొంచెం ఓపిక , ఇంకొంచెం అభిరుచి ఉంటే అదనపు హంగులను అద్ది ఇరుకు ఇంటినే పెద్దగా కనిపించేలా సువిశాలంగా తీర్చిదిద్దుకోవచ్చు. దీనికోసం వేలకు వేలు ఖర్చుపెట్టాల్సిన అవసరం కూడా లేదు.అంతకన్న విలువైన సమయాన్ని కేటాయిస్తే చాలు.

1. ముదురు రంగులతో ఉన్న మీ ఇంటికి లేత రంగులు అద్దండి. లైటింగ్ కూడా కాస్త బ్రైట్‌ గా ఉండేట్లు అమర్చుకుంటే గదులు కొంత విశాలంగా కనిపిస్తాయి.
2. ముందుగా ఇంట్లోని పాత వస్తువులు అంటే ఇక మనకు ఉపయోగపడవు అన్న వాటిని పారబోయాలి. పిల్లల పుస్తకాల నుంచి పెద్దల వాచీలు వరకూ ఏస్థానంలో అమర్చాలో నిర్ణయించి, అదే ప్లేస్‌లో పెట్టుకోవాలి. పొడవైన వస్తువులు నిలువుగా పెట్టుకోండి. అంటే టార్చిలైటు, మొబైల్, ఇతర గృహావసర వస్తువులన్నమాట.
3. ఫర్నీచర్ కొనేటప్పుడు ఎక్కువ ఖరీదు, అద్భుతమైన డిజైన్ అన్నలెక్కలకు పోకుండా మీ ఇంటి డ్రాయింగ్ రూమ్ లేదా హాలు నిర్మాణాన్ని బట్టి ఎంచుకోండి. ఎంత తక్కువ ర్నీచర్ ఉంటే అంత మంచిది. దానివల్ల వాటి నిర్వహణ కూడా తేలికవుతుంది.
4. పండుగకు అలవెన్సులు, బోనస్, ఇంక్రిమెంట్లు అందుకున్న రోజుల్లో సరదాపడి కొత్త వస్తువు కొనదలిస్తే… అది ఏ మేరకు అవసరమో ఒక్కసారి ఆలోచించండి. అవసరమైతేనే కొనండి. లేదంటే డబ్బు, ఇంట్లో స్థలం వృధాగా భావించండి.
5. సీలింగ్ హైట్ ఎక్కువ ఉండడం వల్ల గదులు పెద్దగా కనిపిస్తాయి. ఒకవేళ సీలింగ్ తక్కువ ఎత్తులో ఉంటే దానికి తెలుపు రంగును వేయించి అప్పుడు చూడండి.
6. గదిలో అద్దాలు ఎక్కువగా పెట్టుకోవడం వల్ల గది మరింత పెద్దగా కనిపిస్తుంది. అలా అని మొత్తం అద్దాలతో నింపేయొద్దు.
7. చిన్నదైనా కిటీకీలు ఎక్కువగా ఉండి వెంటిలేషన్ సరిగా ఉంటే కూడా గది పెద్దగా కనిపిస్తుంది.