ఇంటికి అందం స్టైయిర్ కేస్ గార్డెన్..

Gardening

oi-Saraswathi

By Sindhu

Published: Monday, January 16, 2012, 14:57 [IST]

ఇంటి ఆవరణంలో కానీ స్టైయిర్ కేస్ మీద కానీ తోట ఏర్పాటు చేయుటకు తగిన స్థలం ఉందో లేదో చూసుకోవాలి. తర్వాత ఇంటి కప్పు తగినంత గట్టిగా ఉందో తెలుసుకోవాలి. గట్టిగా ఉన్నా ఎంత బరువును మోయగలదో అంచనా వేయించాలి. అందులోనూ తొట్లలో మట్టి నిరంతరం తడిచి ఉంటుంది. దీని వలన బరువు పెరుగుతుంది. కాబట్టి ఇంటినిర్మాణాన్ని బట్టి, బరువు బట్టి కుంపట్లు, తొట్లను ఏర్పాటు చేసుకోవాలి.

తొట్లను తొలుత మట్టితో నింపాలి. తొట్టి అంచుల వద్ద కనీసం నాలుగయిదు అంగుళాల దిగువకే మట్టి ఉంచాలి. దీని వలన మొక్కకు ఎరువు వేసేందుకూ, నీరు పోసుకు నేందుకూ అనువుగా ఉంటుంది. నీరు పోసినప్పుడు మట్టి బయటకు పోదు. రకరకాల గడ్డినిగానీ, కూరగాయలను గానీ ముక్కలుగా చేసి మట్టిలో కలపాలి. ఈ గడ్డి చీకి మొక్కలకు ఎరువుగా ఉపయోగపడుతుంది. మట్టంతా తడిచేలా నీరు పోయాలి. మూడునాలుగు వారాల తర్వాత ఎంపిక చేసుకున్న విత్తనాలను తొట్లలో నాటాలి. గోంగూర, టమోట, మిర్చిలాంటివయితే ముందు నారు పోసు కోవాలి. నారు వేర్లు బలపడక ముందు పీకి తొట్లలో నాటు కోవాలి. మందు నీటిని చల్లి మట్టి నానిన తర్వాతే నారు పీకాలి.

భూమిలో తగినంత తడిలేకపోతే నారు వేర్లు తెగిపోయే అవకాశం ఉంది. విత్తనాలు మొలకెత్తే వరకూ తగుమోతాదులో మాత్రమే నీటిని చిలకరించాలి. నీరు ఎక్కువైతే విత్తలనాలు అధికంగా నాని మునిగిపోతాయి. మొలకెత్తిన మరుసటి రోజునుంచీ తడి అరకుండా నీటిని పోస్తుంటే సరిపోతుంది. ఉదయం పూట, సాయం సంధ్య తర్వాతే నీటిని పోయాలి. అంటే ఎండ తక్కువగా ఉన్నప్పుడే మొక్కలకు నీరు పెట్టాలి. మొక్క మొదలు దగ్గర మట్టిని ఎత్తుగా ఉంచటం వలన మొక్క కాండానికి నేరుగా నీరు తగలకుండా ఉంటుంది. దానివలన మొక్క కుళ్ళి పోకుండా ఉంటుంది. కాండం నిరంతరం నీటిలో నాను తుంటే కొన్ని రకాల తెగుళ్లు కూడా సోకే ప్రమాదం ఉంటుంది.

వారానికి కనీసం రెండు మూడా సార్లుగా పండ్లు, కూరగాయల వ్యర్థాలను చిన్నచిన్న ముక్కలుగా తరిగి మట్టిలో కలుపుతుంటే మొక్కలకు తగినంత ఎరువు లభ్యమవుతుంది. చెకచెకా ఎదుగుతాయి. మొక్కలు ఎదిగేకొద్ది తెగుళ్ళుసోకే ప్రమాదం ఉంటుంది. మొక్కల్లో ఏ భాగంలోనయినా మార్పు కన్పించగానే తగు జాగ్రత్తలు, నివారణా చర్యలు చేపట్టాలి.