బట్టలపై వివిధరకాలైన మరకలు..పోగొట్టేదెలా...?

Improvement

oi-Saraswathi

By Sindhu

Published: Saturday, April 21, 2012, 16:57 [IST]

ఎదుటివారు ధరించిన దుస్తులను బట్టి వారి వ్యక్తిత్వాన్ని, ఆర్థిక పరిస్థితిని అంచనా వేస్తుంటారు. వయస్సును బట్టి వారి డ్రెస్‌లు, మారుతూంటాయి. వయస్సుకు తగినట్లుగా ఉండే వస్త్రధారణ వారి అందాన్ని పెంచుతుంది. పెద్ద వయస్సు వారు తాము ధరించే దుస్తుల పట్ల ప్రత్యేక శ్రద్ధ తీసుకోవాలి. ధరించే దస్తులు ఎంతో శుభ్రంగా ఉండటమన్నది ప్రధాన విషయం. ఖరీదైన బట్టలు కొనగానే సరికాదు. వాటిని చక్కగ మెయింటైన్‌ చేయగలగాలి. బట్టలు ఉతకడంలో సరైన జాగ్రత్తలు తీసుకున్నట్లయితే, బట్టలు శుభ్రపడటమే కాక అందంగా, ఆకర్షణీయంగా కనిపిస్తాయి. బట్టలు ఉతకటంలో ఎటువంటి పద్దతులను ఆచరించవలసినదీ ప్రతివారూ తెలుసుకోవాల్సిన విషయం.

1. కొత్త బట్టలు, సిల్కు బట్టలు ఉతికేటప్పుడు ఆ నీటిలో కొంచెం ఉప్పు కలిపితే వాటి మృదుత్వం, రంగు పోకుండా కాపాడుకోవచ్చు.
2. చేతితో ఎంబ్రాయిడరీ చేసేటప్పుడూ దారపు ఉండని చిన్నకప్పులో వేసి కుట్టుకుంటే దారం ఎక్కడికో వెళ్ళటం, వెతుక్కోవటం ఉండదు.
3. జేబు రుమాళ్ళపైన, టవల్స్‌ మీద పడే లిప్‌స్టిక్‌ మరకలు పోవాలంటే వాటిపై గ్లిసరిన్‌ రాసి కొంతసేపు తర్వాత సబ్బుతో ఉతకాలి.
4. దుస్తులమీద సిరా మరకలు పోవాలంటే పుల్లటి పెరుగులో కాసేపు నానబెట్టి తర్వాత ఉతికితే సిరా మరక కనిపించదు.
5. షిఫాన్‌ చీరలపై నూనె మరకలు పోవాలంటే టాల్కంపౌడర్‌ చల్లి మడత పెట్టండి. వారం తర్వాత పౌదరు దులిపివేయండి.
6. బట్టలకంటిన గోరింటాకు మరకలు పోవడానికి మరకంటిన ప్రదేశాన్ని అరగంటసేపు పాలలో నానబెట్టి తర్వాత శుభ్రంచేయాలి. లేక నిమ్మకాయ ముక్కతో రుద్దిచూస్తే గోరింటాకు మరకలు పోతాయి.
7. శీకాయపొడితో రుద్దితే జరీమీద పడిన మరకలు పోతాయి. దుస్తుల మీద పడిన టీ మరకలు పోవాలంటే ఓ టమాటా ముక్క ను మరక మీద రుద్ది తర్వాత సబ్బుతో ఉతికితే మరకపోతుంది.
8. దుస్తులు ఒక్కచోట పోగుపడి, ముక్కిపోయిన వాసన వస్తుంటే ఎండలో ఆరేయాలి. వీలుకానప్పుడు యూకలిప్టస్, నిమ్మ, లావెండర్ వంటి ఏదైనా పరిమళంలో ఒక జేబు రుమాలుని ముంచి దానిని దుస్తుల మధ్య ఉంచితే సరిపోతుంది.
9. జడల చమురు జాకెట్ల వెనుక అంటుతుంది. సోపుతో ఉతికితే గుడ్డ కాంతి పోతుంది. కనుక పత్తిలో కాని గుడ్డ ముక్కలో కాని పెట్రోలు అద్ది చమురున్న భాగాన రాస్తే కొత్త జాకెట్లా తయారు అవుతుంది.
10. ఇష్టపడి కొనుక్కున్న జీన్స్ రంగుమారకుండా ఉండాలంటే, అరబక్కెట్ నీటిలో నాలుగు టేబుల్ స్పూన్ల వెనిగర్ వేయాలి. ఈ నీటిలో దుస్తుల్ని కొద్ది సేపు నానబెట్టి ఆ తర్వాత ఉతకాలి. ఊలు, సిల్కు బట్టలు గోరువెచ్చటి నీటిలో పిండిన తరువాత ఒక కాటన్ టవల్లో ఉంచి రోల్ చేస్తే టవల్ వాటి తడిని పీల్చుకుంటుంది. తర్వాత ఆరేయాలి.