పిల్లల్లున్న ఇంట్లో..ఇవి తప్పనిసరి...!?

Improvement

oi-Saraswathi

By Sindhu

Published: Tuesday, May 22, 2012, 18:36 [IST]

వంటగది ఇంట్లో చిన్న భాగమే కానీ, ఇక్కడ సంభవించే ప్రమాదాలు అన్నీ ఇన్నీ కాదు. ముఖ్యంగా చిన్న పిల్లలు ఉన్న ఇంట్లో ఎదురయ్యే ప్రమాదాలు మరీ జఠిలం. వీటికి దారి తీసిన కారణాలు చాలా చిన్నవి, మనం అంతగా దృష్టి పెట్టనివీ అయి ఉంటాయి. ఇంటి మొత్తం మీద పిల్లలకు వంటగది ప్రమాదకరమైనది. కనుక దానిని మీరు ఇంట్లో లేనప్పుడు కొన్ని జాగ్రత్తలు...తాళం వేయండి. వారికవసరమైన ఆహారం బయట పెట్టండి. లేదా స్టవ్ వంటివి గ్యాస్ ఆపుచేసి జాగ్రత్త పడండి. పదునైన కత్తులు, ఫోర్కులు మొదలైనవి వారికి అందకుండా పైన పెట్టండి. రిఫ్రిజిరేటర్ వంటివి కిచెన్ కు బయట వుంచితే, సౌకర్యంగా వుంటుంది. అదే మరీ చిన్న పిల్లలైతే పిల్లలకు వంటగదిలో ఎదురయ్యే ప్రమాదాలను నివారించడానికి తీసుకోవాల్సిన కొన్ని జాగ్రత్తలు...

వంటగదిలో వెలుతురు కోసం లేదా డెకరేషన్ కోసం వ్యాక్స్ క్యాండిల్ వెలిగిస్తుంటాం. వాటిని పూర్తిగా ఆర్పేసి బాక్స్‌లో ఉంచి సురక్షితమైన ప్రదేశంలో నిల్వ చేయాలి.

స్టవ్ మీద పదార్థాలు ఉడుకుతున్న పాత్రల హ్యాండిల్స్ బయటకు లేకుండా చూడాలి. పిల్లలు వాటిలో ఏముందో చూడాలన్న ఆసక్తితో హ్యాండిల్ పట్టుకుని పైకి వంపుకుంటారు.

మిక్సీ వేసిన తర్వాత ప్లగ్ నుంచి వైరుని తీసేయాలి లేదా స్విచ్ ఆపేయాలి. లేకపోతే పెద్దవాళ్లు వెళ్లగానే పిల్లలు వచ్చి మిక్సీ ఆపరేట్ చేసేస్తారు. శబ్దానికి కంగారు పడి ఏడ్చేస్తారు కూడ. అంతటితో ఆగకుండా జార్ పాయింట్ దగ్గర చేతిని ఉంచారంటే జరిగే ప్రమాదాన్ని ఊహించవచ్చు.

గారెలు, పూరీల వంటివి చేసిన తర్వాత బాణలిని నూనెతో సహా పక్కన పెడుతుంటాం. నూనె చల్లారిన తర్వాత టిన్‌లోకి వంపుకోవచ్చన్న ఆలోచనతో. ఆ నూనెలో పిల్లలు చేతిని ముంచినా, బాణలిని మీదకు వంపుకున్నా మరీ ప్రమాదకరం.

స్విచ్‌లు పాడయ్యి వైర్లు బయటకు వచ్చి ఉంటే ఏ మాత్రం నిర్లక్ష్యం చేయకూడదు. ప్లగ్‌లు పిల్లలకు అందుబాటులో ఉంటే ప్లగ్ గార్డ్‌తో కవర్ చేయాలి. వంట పూర్తయిన వెంటనే గ్యాస్ సిలిండర్ రెగ్యులేటర్‌ను కట్టేయాలి.

కూరగాయలను తరిగిన తర్వాత కటింగ్ బోర్డు, చాకును హోల్డర్‌లో ఉంచాలి. అగ్గిపెట్టెలకు బదులు లైటర్‌ను వాడాలి. కారం పొడుల వంటి వాటిని వాడిన వెంటనే మూతపెట్టి పిల్లలకు అందకుండా పెట్టాలి.

గ్లాసు ఐటమ్స్, ఎక్కువ షార్ప్ గా ఉన్న వస్తువులు, త్వరగా పగిలిపోయేటటువంటి సున్నితమైన వస్తువులను పిల్లలకు అందకుండా కొంచెం ఎత్తులో పెట్టుకోవాలి.

హ్యాండ్ టవల్స్‌ను స్టవ్ దగ్గర వదలకూడదు. వీటన్నిటితోపాటు కిచెన్‌లో నీరు ఒలికితే వెంటనే తుడిచేయాలి.