Makara Rasi Ugadi Rasi Phalalu 2022:'శుభకృత'ఏడాదిలో మకర రాశి వారి జాతకం ఎలా ఉంటుందంటే...!

ఆదాయం-9, వ్యయం-2

ఈ రాశి వారికి తెలుగు నూతన సంవత్సరంలో ఆదాయం ఎక్కువగా లభిస్తుంది. మరోవైపు మీ ఖర్చులు కూడా తక్కువగా ఉంటాయి. కొత్త ఏడాదిలో చాలా డబ్బును ఆదా చేస్తారు. ఉత్తరాషాడ నక్షత్రం 2,3,4 మూడు పాదాలు, శ్రవణ నక్షత్రం 1,2,3,4 నాలుగు పాదాలు, ధనిష్ట నక్షత్రం 1, 2 రెండు పాదాలు, మొత్తం 9 నక్షత్ర పాదాలుంటాయి.

రాజపూజ్యం-2, అవమానం-4

ఈ ‘శుభకృత్' నామ సంవత్సరంలో ఈ రాశి వారికి

సమాజంలో గౌరవం కంటే కొంత ఎక్కువ అవమానాలే ఎదురవుతాయి. గురు గ్రహం అనుగ్రహంతో ఆదాయం మంచిగా లభించినప్పటికీ.. జీవితంలో సుఖంగా ఉండకపోవచ్చు. మీ జీవిత భాగస్వామి తరపున వారి కోసం ఎక్కువ ఖర్చులు పెట్టాల్సి వస్తుంది. అలాగే వారి నుండే అవమానం ఎదుర్కోవాల్సిన పరిస్థితులు ఏర్పడతాయి. ఆరోగ్య పరంగా కొన్ని సమస్యలు ఎదురవుతాయి. సానుకూల విషయమేటంటే.. ఎన్ని ఖర్చులు పెరిగినా.. అవసరానికి తగిన డబ్బు సమకూరుతుంది.

శని ప్రభావంతో..

ఈ రాశి వారిలో శని గ్రహం ప్రభావం వల్ల చిన్నారులకు తరచుగా అనారోగ్య సమస్యలు ఏర్పడొచ్చు. ఉద్యోగులకు ఆఫీసులో కష్టాలు పెరుగుతాయి. రాజకీయ నాయకులకు కూడా ఈ ఏడాది ప్రతికూల ఫలితాలొస్తాయి. ఈ ఏడాదిలో మిత్ర విరోధాల వల్ల మీరు ఒంటరిగా మిగిలిపోవచ్చు. నల్లని రంగు వస్తువుల పట్ల జాగ్రత్తగా ఉండాలి. ఈ తెలుగు నూతన సంవత్సరంలో మకర రాశి వారికి ఏలినాటి శని దశ ఉంటుంది. ఈ కాలంలో భారీ పెట్టుబడులు పెట్టడం మంచిది కాదు.

రాహువు ప్రభావం వల్ల..

ఈ సంవత్సరం రవి, కుజుడు, బుధుడు, శుక్రుడు, చంద్ర గ్రహాలు తమ స్థానాలను మారడం వల్ల ఈ రాశి వారికి మిశ్రమ ఫలితాలు రావొచ్చు. పెద్ద వయసు వారికి మతిమరుపు వంటి సమస్యలు పెరుగుతాయి. వివాహితులకు సంతానం గురించి కొంత ఆందోళన పెరుగుతుంది. మీ బంధువులతో కొన్ని విషయాల్లో విభేదాలు రావొచ్చు.

కేతు ప్రభావం వల్ల..

ఈ రాశి వారికి ఈ ఏడాది కేతు ప్రభావం వల్ల శుభ ఫలితాలు ఏర్పడతాయి. ముఖ్యంగా వ్యాపారులకు ఊహించిన మేరకు ఫలితాలొస్తాయి. ఆధ్యాత్మిక కార్యక్రమాలపై ఆసక్తి పెంచుకుంటారు. మొత్తం మీద ఈ ఏడాది గురువు, కేతువు గ్రహాల వల్ల మీకు శుభ ఫలితాలు రానున్నాయి.

పరిహారాలివే..

మకర రాశి వారికి ఈ ఏడాది ఏలి నాటి శని దశ కొనసాగుతోంది కాబట్టి.. పరిహారం కోసం తమిళనాడులోని తిరునల్వార్ వెళ్లి శనీశ్వరుని ఆలయానికి వెళ్లి దర్శనం చేసుకోవాలి లేదా మహారాష్ట్రలోని శనిసింగ్నాపురానికి వెళ్లి అభిషేకం నిర్వహించాలి. అదే విధంగా శ్రీకాళహస్తిలో రాహు, కేతు పూజలు జరిపించాలి. అలా వెళ్లడానికి కుదరని వారు నిత్యం గణపతిని ఆరాధన చేస్తూ.. కనకదుర్గ ఆలయానికి వెళ్లి మంగళవారం, శనివారం రోజున కుంకుమ పూజలు చేయాలి. ఇలా చేయడం వల్ల మీకు శుభప్రదమైన ఫలితాలు వచ్చే అవకాశం ఉంది.