నోరూరించే వెల్లుల్లి పచ్చడి..పక్కా కొలతలతో ఇలా చేస్తే ఏడాది పాటు నిల్వ ఉంటది..

వెల్లుల్లి నిల్వ పచ్చడి తెలుగు వారి వంటింట్లో ఎంతో విశిష్టమైన స్థానాన్ని సంపాదించుకున్న ఒక సాంప్రదాయ వంటకం. రుచితో పాటు ఆరోగ్యాన్ని అందించే ఈ పచ్చడిని వేడి వేడి అన్నంలో కొద్దిగా నెయ్యి వేసుకుని తిన్నా, లేదా ఇడ్లీ, దోశ, ఉప్మా వంటి టిఫిన్లలో నంచుకుని తిన్నా ఇది అద్భుతమైన రుచిని ఇస్తుంది.

ఈ పచ్చడి ఊరిన కొద్దీ వెల్లుల్లి రెబ్బలు మెత్తబడి రుచి మరింత పెరుగుతుంది. వెల్లుల్లి నిల్వ పచ్చడి ఈజీగా ఎలా తయారుచేసుకోవాలో ఇక్కడ చూడండి.

వెల్లుల్లి నిల్వ పచ్చడి తయారీకి కావాల్సినవి

-అర కేజీ పొట్టు తీసిన వెల్లుల్లి
-200 గ్రాముల కారం
-150 గ్రాముల ఉప్పు
-25 గ్రాముల ఆవ పిండి
-10 గ్రాముల వేయించిన మెంతుల పొడి
-నువ్వుల నూనె
-1 టీస్పూన్ పసుపు
-1 టీస్పూన్ ఇంగువ
-1 టీస్పూన్ జీలకర్ర
-10 ఎండుమిరపకాయలు
-2 రెమ్మల కరివేపాకు

ఇంట్లోనే అచ్చమైన స్వీట్ షాప్ స్టైల్ పాలకోవా..కేవలం రెండే పదార్థాలతో చేసుకోండిలా..

వెల్లుల్లి నిల్వ పచ్చడి తయారీ విధానం

-ముందుగా స్టవ్ ఆన్ చేసి కడాయి పెట్టుకోండి. అందులో అర కప్పు నువ్వుల నూనె వేసి వేడి చెయ్యాలి.

-నూనె వేడెక్కాక అందులో పొట్టు తీసిన అరకేజీ వెల్లుల్లి రెబ్బలు వేసి వేయించాలి. లైట్ గా వేపుకుంటే చాలు మరీ ఎర్రగా వేగనక్కర్లేదు. లైట్ గా వేగాకా వీటిని ఓ ప్లేట్ లోకి తీసి పక్కన పెట్టుకోండి.

-ఇప్పుడు స్టవ్ మీద ఉన్న కడాయిలోనే మరో 1 కప్పు(250 ml) నూనె వేసి వేడి అయ్యాక అందులో 1 టీస్పూన్ ఆవాలు వేసి అవి చిటపటమనేటప్పుడు అర టీస్పూన్ మెంతులు, 1 టీస్పూన్ జీలకర్ర వేసి కొద్దిగా వేగిన తర్వాత అందులో రెండు రెమ్మల కరివేపాకు, 10 ఎండుమిరపకాయలు, 1 టీస్పూన్ ఇంగువ వేసి స్టవ్ ఆపేసి కలపండి. ఆయిల్ వేడికే అవన్నీ వేగిపోతాయి. స్టవ్ మీద నుంచి కడాయిని దించి తాలింపుని చల్లారనివ్వాలి.

-ఇప్పుడు ఒక పెద్ద గిన్నె తీసుకోండి. అందులో 200 గ్రాముల కారం, 150 గ్రాముల ఉప్పు, 25 గ్రాముల ఆవ పిండి, 10 గ్రాముల వేయించిన మెంతుల పొడి, 1 టీస్పూన్ పసుపు వేసి మెత్తం ఒకసారి బాగా కలుపుకోండి. తర్వాత ఇందులోనే 1కప్పు(250 ml)నిమ్మరసం వేసి కలుపుకోండి.

-ఇప్పుడు అందులోనే పూర్తిగా చల్లారిన తాలింపుని వేసుకొని కలుపుకోండి. తర్వాత వేయించిన వెల్లుల్లి రెబ్బలను వేసి మొత్తం బాగా కలిసేలా కలుపుకోండి. తర్వాత దీన్ని గాజు సీసాలో పెట్టుకుంటే ఏడాది వరకు నిల్వ ఉంటది. దీనిని 3 రోజుల పాటు ఊరనివ్వండి. తర్వాత నుంచి దీన్ని వేడి అన్నంతో తింటుంటే ఆహా అనాల్సిందే.