అసలెవరీ శాంతా క్లాజ్? అందరికీ గిఫ్ట్స్ ఎందుకు ఇస్తాడు? తన ప్రాముఖ్యత ఏంటంటే..

శాంటా క్లాజ్ ఓ బిషప్:

క్రైస్తవుల మతపెద్దలను బిషప్ అని పిలుస్తారు. శాంటా క్లాజ్‌గా కనిపించే వ్యక్తి కూడా ఓ బిషప్. ఆయన పేరే సెయింట్ నికోలస్. నికోలస్ ప్రస్తుతం టర్కీలోని మైరా ప్రాంతానికి బిషప్‌గా ఉండే వారు. సెయింట్ నికోలస్ క్రీ.శ. 280వ సంవత్సరానికి చెందినవారు. తండ్రి నుండి తనకు వచ్చిన ఆస్తులను పేదవారికి, అవసరంలో ఉన్న వారికి దానం చేశారు నికోలస్.

క్రిస్మస్ పండగ వేళ సెయింట్ నికోలస్ నిరుపేదల ఇళ్లకు మారువేషంలో వెళ్లి వారికి బహుమతులు, డబ్బును అందించే వారు. తర్వాత అక్కడి నుండి వెళ్లిపోయే వారు. ఆయన చేస్తున్న మంచి పని వల్ల అనతికాలంలోనే ఆయన గురించి చాలా మందికి తెలిసింది. అమెరికా, యూరప్ దేశాల్లో సెయింట్ నికోలస్ గురించి మాట్లాడుకోవడం మొదలుపెట్టారు.

క్రిస్మస్ వచ్చిందంటే చాలు క్రిస్మస్ తాత వస్తాడని, తమకు గిఫ్ట్స్ ఇస్తాడని పిల్లలంతా ఎదురుచూడటం మొదలు పెట్టారు. క్రిస్మస్ అనగానే నికోలస్ గుర్తుకు రావడం సర్వసాధారణం అయిపోయింది. సెయింట్ నికోలస్, సింట్ నికోలస్, సింటర్ క్లాస్, శాంటా క్లాజ్ అంతా ఒకరి పేరే. కానీ శాంటా క్లాస్ అనే పేరు ప్రపంచవ్యాప్తంగా బాగా ప్రాచుర్యం పొందింది. శాంటా క్లాజ్ అనగానే క్రిస్మస్, క్రిస్మస్ అంటే శాంటా క్లాజ్‌గా మారిపోయాయి.

ఆచారంగా మారిన బహుమతుల ప్రదానం

19వ శతాబ్దం నాటి నుండి క్రిస్మస్ సమయంలో పిల్లలకు బహుమతులు ఇవ్వడం ఆచారంగా మారింది. షాపింగ్ మాల్స్, స్టోర్స్‌లో శాంటా క్లాస్‌లాగా డ్రెస్ చేసుకున్న వారిని ఉంచి పిల్లలనీ, తల్లిదండ్రులనీ ఆకర్షించడం మొదలైంది.

1822లో క్లెమెంట్ క్లార్క్ మూర్ అనే కవి 'యాన్ ఎకౌంట్ ఒఫ్ ఎ విజిట్ ఫ్రం సెయింట్ నికోలస్' అనే కవిత రాశారు. ఇది 'ఇట్ వజ్ ద నైట్ బిఫోర్ క్రిస్మస్' అనే పేరుతో బాగా పాపులర్ అయింది. 8 రెయిన్ డీర్లు లాగుతున్న స్లే మీద ఎక్కి ఒక చోటు నుండి మరో చోటుకును ఎగురుతూ వెళ్లి పిల్లలకు బహుమతులు ఇస్తాడని.. శాంటా క్లాజ్ గురించి ఆ పోయెం వర్ణించింది. 1881లో ఓ పొలిటికల్ కార్టూనిస్టు గీసిన కార్డూన్‌తో ఇప్పుడు శాంటా క్లాజ్ అనుకుంటున్న రూపం బాగా పాపులర్ అయింది. తెల్లని గడ్డం, ఎర్రని దుస్తులు, భారీ పొట్ట, భుజానికి బహుమతుల మూట.. శాంటా క్లాజ్ అనగానే ఇవే గుర్తుకువచ్చేలా ఆ కవిత జనాల్లోకి వెళ్లిపోయింది.

శాంటా క్లాజ్ ఫ్యాక్ట్స్:

క్రిస్మస్ తాత నిజానికి నీలి రంగు దుస్తులు ధరించేవారు. 1930లలో కోకాకోలా కంపెనీ వారు తమ ఉత్పత్తులను ప్రచారం చేసుకోవడానికి ఎరుపు రంగు వాడారు. అవి బాగా ప్రాచుర్యం పొందడంతో శాంటా క్లాజ్ తాత దుస్తులు ఎరుపు, తెలుపు రంగుల్లో మారాయి.

భారీ క్రిస్మస్ గిఫ్ట్:

అమెరికాలో బాగా ప్రాచుర్యం పొందిన స్టాచ్యూ ఆఫ్ లిబర్టీ విగ్రహాన్ని 1886లో ఫ్రాన్స్ దేశం అమెరికాకు బహుమతిగా అందించింది. దాని బరువు 225 టన్నులు. ఇప్పటి వరకు అత్యంత బరువైన క్రిస్మస్ గిఫ్ట్‌గా స్టాచ్యూ ఆఫ్ లిబర్టీ నిలిచింది.