పండుగల సీజన్ - పిల్లల తిండ్లు!

Kids

oi-Nageswara Sharma

By B N Sharma

Published: Monday, September 12, 2011, 15:57 [IST]

పండుగ ఆనందం అంటే పిల్లలదే. పండుగ వేడుకలు ఏమైనప్పటికి వాటిలో పిల్లల పాత్ర అధికంగా వుంటుంది. పండుగకు వచ్చిపోయే బంధువులు, స్నేహితులు. ఇంటి అలంకరణలు ఇక చివరగా పిండివంటలు లేదా తినే ఆహార పదార్ధాలు కూడా ప్రాధాన్యతను సంతరించుకుంటాయి. ముఖ్యంగా తల్లితండ్రులు పండుగ రోజుల్లో పిల్లల తిండిని నియంత్రించలేరు. ఒక తల్లిగా లేదా తండ్రిగా పిల్లలకు ఆరోగ్యకరమైన ఆహారాన్ని ఇవ్వటానికి చూస్తారు. కాని కొన్ని సార్లు పిల్లలు ఏం తింటున్నప్పటికి నిస్సహాయంగా చూడాల్సిన పరిస్ధితే ఏర్పడుతుంది. ఆహారం విషయంలో పిల్లలను ఏ విధంగా నియంత్రించవచ్చో చూద్దాం.

సాధారణంగా పండుగలకు ఇంటిలో ఏ తిండిపదార్ధాన్ని చేసినప్పటికి అది పిల్లలకు మంచిదే. కాని పిల్లలు ఇంటిలో సాంబార్ అన్నం తినటానికి ఇష్టపడరు. బయట దొరికే ఛాట్లు, పండ్లు, మసాలా ఐటమ్ లు వారు ఇష్టపడతారు. ఇంటిలో బంధువులుండటం చేతా సాధారణంగా పిల్లల తిండి గమనించటం లేదా కంట్రోల్ చేయటం కుదరకపోవచ్చు. కనుక బయట వారు తినాలనుకునేవి ఇంటిలో చేస్తే ఇక వారు ఇల్లు వదలిపోరు. ఛాట్లు, భేల్ పూరి మొదలైనవి మంచి దినుసులతో ఇంటిలోనే చేయండి. ఇంటికి వచ్చిన వారు ఒక్కోపుడు పిల్లలకు ఏది పడితే అది అందిస్తారు. కాని మీ పిల్లలు అటువంటివి తినరని వారికి మెల్లిగా చెప్పండి. అవితింటే వారు జబ్బుపడే ప్రమాదం కూడా వుంది. జబ్బు పడే కంటే ముందుగానే వాటిని నివారించుకోడం మంచిది.

పిల్లలకైనా పెద్దవారికైనా తినే ఆహారం వేడిగా వుంటే మంచిది. పండుగకు తినే ఆహారం వేడిగా వుందంటే మీ పిల్లల విషయంలో సగం బాధ తీరినట్లే. పండుగలలో విందు భోజనాలు తయారు చేసేటపుడు దానిని అంతా ఒకే సారి తినలేము. కనుక నిలువ చేసి తినవలసి వస్తుంది. పండుగ హడావుడిలో రిఫ్రిజిరేటర్ లో పెట్టటం కూడా మరచిపోతాము. తయారు చేసిన మొదటి ఒకటి రెండు రోజులు పరవాలేదు. దాని తర్వాత మాత్రం ఆ పదార్ధాలను పిల్లలకు పెట్టకండి. నిలువ వున్న ఆహారం కంటే ఏదో కొద్దిపాటి పప్పు అన్నం వేడిగా పెడితే వారికి చాలు. ఈ చిట్కాలను ఆచరించి పండుగ రోజులలో మీ పిల్లలు ఆరోగ్యకరమైన ఆహార పదార్ధాలు తింటూ ఆనందంగా వుండేలా చూసుకోండి.