పిల్లలలో ఆందోళన తగ్గించడమెలా?

Kids

oi-Nageswara

By B N Sharma

Published: Tuesday, May 22, 2012, 8:25 [IST]

పిల్లలకు అన్ని విషయాలు తెలియపరచరాదు. సమస్యాత్మకమనుకునే జబ్బులు, వారికిష్టమైన వారిమరణాలు లేదా డైవోర్సు వంటివి చెప్పరాదు. ఏ మాత్రం తెలిసినా తమ కుటుంబం తీవ్ర కష్టాలలో వుందని భావిస్తారు. వారిముందు తల్లితండ్రులు వ్యతిరేక వ్యాఖ్యలు కూడా చేసుకోరాదు. పెద్దలకు చిన్నవిగా అనిపించే అంశాలు పిల్లలలో తీవ్ర ఒత్తిడి కలిగిస్తాయి. మీరు వారి అలసటను గుర్తించినట్లు వారిని భావించనీయండి.

పిల్లల అలసట గుర్తించటమెలా? వారిలో తాత్కాలికంగా ప్రవర్తనా మార్పులు కనిపెట్టాలి. మూడ్ స్వింగ్స్, చెప్పినమాట వినకపోవటం, నిద్రించే పద్ధతిలో మార్పులు, నిద్రలో మూత్రం చేయటం వంటివి లక్షణాలుగా వుంటాయి. కొంతమంది పిల్లలకు శారీరక సమస్యలు అంటే, పొట్టనొప్పి, తలనొప్పి వంటివి కూడా వస్తాయి. ఇతరులకు హోం వర్కు చేయటం ఇబ్బందిగా కూడా వుంటుంది. మరి కొంతమంది అసలు ఏ పనీచేయక చాలా సమయం ఒంటరిగా వుంటారు. మరీ చిన్నపిల్లలైతే, బొటనవేలు చీకటం, జుట్టు పీక్కోవడం, ముక్కు గిచ్చటం, వంటివి చేస్తారు. పెద్ద పిల్లలు, అబద్ధాలు చెపటం, పోట్టాడటం, పెద్దలను తిరస్కరించడం చేస్తారు. పెద్దలను వదలటానికి ఇష్టపడరు. చిన్న సమస్యలకు పెద్దగా స్పందిస్తారు. విద్యలో వెనుకపడతారు.

ఒత్తిడి ఎలా తగ్గించాలి?
వారికి తగినంత విశ్రాంతి, పోషకాహారం ఏర్పరచాలి. వారితో సంభాషణకు సమయం ప్రతిరోజూ కేటాయించాలి. మీరు వారితో గడపాలి. మీరు తమాషాగా వారితో ఆడుతూంటే చాలు కొంతమంది పిల్లలు ఒత్తిడి తగ్గించుకుంటారు.

పిల్లలు పెద్దవారయ్యే కొద్ది వారితో సమయం గడపటం ప్రధానం. మీకు ఎంత కష్టమైనా సరే వారికి కొంత సమయం కేటాయించండి. వారు మీకు ప్రధానం అని భావిస్తున్నట్లు వారికి తెలియాలి.

వారికి ఆందోళన కలిగించే విషయాలు చెప్పమని కోరండి. కలసి కొన్ని పరిష్కారాలు రూపొందించండి. అవసరమనుకుంటే, కొన్ని స్కూలు కార్యక్రమాలు తొలగించండి. దానికి బదులు, వ్యాయామం, జర్నల్ వ్రాయటం వంటివి చేయించండి.

కొంత ఒత్తిడి సాధారణమని గ్రహించండి. కోపం, భయం, ఒంటరితనం, ఆందోళన కొంత మేరకు వుంటాయి. అవి వారిని స్వతంత్రంగా ప్రవర్తించేలా చేస్తాయి.