శిశువుకు ప్రధాన ఆహారంగా ఏమి ఇవ్వాలి?

By B N Sharma

Published: Monday, June 11, 2012, 13:02 [IST]

అప్పుడే పుట్టిన బిడ్డకు తల్లిపాలు ప్రధాన ఆహారం. బిడ్డ పుట్టిన వెంటనే తల్లి స్తనాలలో ఉత్పత్తి అయ్యే పాలు చాలా చిక్కగా, పచ్చటి రంగు కలిగి వుంటాయి. అలా వున్నప్పటికి బిడ్డకు ఈ పాలను తాగించవచ్చు. తల్లి బిడ్డకు కొద్ది పాల చుక్కలను నోటికి అందిస్తూ, తాగటం అలవాటు చేయాలి. తల్లి పాలలో వుండే పోషక పదార్ధాలు, బిడ్డకు జీవితంలో మరెక్కడా దొరకవనే చెప్పాలి. శిశువు పుట్టిన వెంటనే పాలను తాగేటందకు తల్లి కొద్దిగా శ్రమించాల్సి వస్తుంది. అందుకుగాను ఆమె అనుభవం వున్న వారి సలహా సంప్రదింపులు తీసుకుంటూ బిడ్డకు తన స్తనాల పాలను అందించే ప్రయత్నం చేయాలి.

కనీసం ఒక సంవత్సరం వరకైనా తల్లి బిడ్డకు పాలను పట్టాలి. ఎప్పటికపుడు పోషకాహారం తాను తీసుకుంటూ బిడ్డకు పాలు సంవత్సరం వరకు అందిస్తే బిడ్డలో రోగ నిరోధక వ్యవస్ధ బలపడి బిడ్డ తరచు అనారోగ్యంపాలు కాకుండా వుంటుంది. కొంతమంది స్త్రీలలో తల్లిపాలు సరిగా పడకపోవటంతో, పిల్లలకు ఆవు లేదా గేదె పాలు పడతారు. ఈ పాల కారణంగా బిడ్డలో కొవ్వు కణాల సంఖ్య కూడా పెరిగి బిడ్డ లావు అయ్యే అవకాశం వుంది. బిడ్డ మొదటి సంవత్సరంలో ఏర్పడే కొవ్వు కణాల సంఖ్య ఇక అతని జీవితాంతం శరీరంలో మెయిన్టెయిన్ అవుతూ లావుగానే వుండే సమస్య కూడా బిడ్డలు కలిగి వుంటారు.

పాలు సరిగా లేకుంటే పిల్లలకు బాటిల్స్ లో పట్టే పాలు వారి ఎదుగుదలను అరికడతాయి. పాలు సరిగా లేకపోవడం, లేదా పాలు తరచుగా మారుస్తూండటం, పాలను ఇచ్చే సమయాలు వివిధ రకాలుగా వుండటం వంటి తప్పిదాలు బాటిల్ పాలనిచ్చే పిల్లలకు ఊబకాయం తెప్పిస్తాయంటున్నారు పరిశోధకులు. అదే రకంగా, తగినన్ని పాలు తీసుకోని పిల్లలు పోషకాహార లేమి కలిగి వుంటారు.13000 మంది తల్లుల అలవాట్లను పరిశీలిస్తే బాటిల్ ఫీడింగ్ పై వారికి సరిఅయిన అవగాహన లేకపోవడం సమస్యకు కారణంగా పరిశోధకులు తెలిపినట్లు ది డైలీ ఎక్స్ ప్రెస్ వార్తాపత్రిక ప్రచురించింది.

కొత్తగా తల్లులైనవారు బాటిల్ ఫీడింగ్ చేయటంలో విఫలులని, లేదా తాము తమ పాలు ఇవ్వటంలో విఫలమయ్యామన్న భావనతో కూడా బిడ్డకు సరి అయిన సమయాల్లో బాటిల్ ఫీడింగ్ చేయటంలేదని కూడా పరిశోధకులు భావించారు. పిల్లలకు పాలు పట్టే విషయంలో ప్రపంచ ఆరోగ్య సంస్ధ తల్లులు కాబోతున్న మహిళలకు సరి అయిన అవగాహన కలిగించే సమాచారాన్నివ్వాలని, తల్లులు అయిన తర్వాత, వారు పాలు పట్టలేమని తెలిసిన తర్వాత మహిళలు బాటిల్ ఫీడింగ్ అంశాన్ని అవలంబించటంలో విఫలులవుతున్నారని కూడా పరిశోధకులు భావించారు.