శిశువు బరువు తక్కువగా వుంటే?

By B N Sharma

Published: Wednesday, May 30, 2012, 16:04 [IST]

అభివృద్ధి చెందుతున్న దేశాలలో ఇప్పుడున్న పరిస్థితులను బట్టి 20-30 శాతం పిల్లలు తక్కువ బరువుతో పుడుతున్నారు. డబ్లూహెచ్‌ఓ ప్రకారం శిశువు 2,500 గ్రా. మరియు అంతకన్నా ఎక్కువుండాలి.పిల్లలు బరువు తక్కువగా పుట్టినపుడు వారిని పెంచడం చాలా కష్టంతో కూడుకున్న పని. వారి పెంపక వ్యయం కూడా ఎక్కువవుతుంది. ఇది ఆర్థిక స్థోమతలేనివారికి కష్టమవుతుంది. అలా పుట్టినవారిని ఎంతో జాగ్రత్తగా పెంచితేనే వ్యాధులనుండి కాపాడవచ్చు. అయినా, వారి పెరుగుదల ఒక్కొక్కసారి సరిగ్గా ఉండకపోవచ్చు. అలా జరిగే నష్టం భౌతికంగాను, మానసికంగాను రెండువిధాలా వుంటుంది. శిశువు తక్కువ బరువుతో పుట్టినపుడు వారిని తక్కువ బరువున్న పిల్లలుగా నిర్థారిస్తారు. పట్టణాల్లో 18-20 శాతం ఉంటే పల్లెల్లో 26-30 శాతం వరకూ ఇలా తక్కువ బరువుతో పిల్లలు పుడుతున్నారు.

పిల్లలు తక్కువ బరువుతో పుట్టటానికి గల కారణాలు
1. తల్లికి రక్తహీనత లేదా, అధిక రక్తపోటు ఉన్నపుడు శిశువు బరువు తక్కువగా ఉండే అవకాశం ఉంది.

2. మన జనాభా ప్రత్యేకంగా పల్లెల్లో ఆడవారి బరువు అత్యంత తక్కువగా అంటే 30 నుండి 40 కేజీలు మాత్రమే ఉంటోంది. ఆరోగ్యవంతంగా పిల్లలు పుట్టాలంటే కనీసం ఆడవారి బరువు 45 కేజీలకు మించి ఉండాలి.

3. గర్భం దాల్చినప్పటినుండీ ప్రసవం అయ్యేవరకూ తల్లి షుమారు 10 కేజీలు పెరగాలి. కానీ మన దేశంలో 5 లేదా 6 కేజీలే పెరుగుతున్నారు. ఇది తిండిలోపంవల్ల అని ప్రత్యేకంగా చెప్పనవసరంలేదు.

4. మొదటి కాన్పులోనే ఎక్కువగా బరువు తక్కువున్న శిశువులు జన్మిస్తున్నారు.

5. గర్భిణీలు గర్భం దాల్చిన తరువాత వైద్యుడిని సంప్రదించి సరైన సలహా లేదా వైద్య సహాయం పొందడం లేదు.

6. పల్లెలో ఆర్థిక కారణాలచేత, బరువు తక్కువగా ఉన్నవారిలో తక్కువ బరువున్న శిశువులు జన్మిస్తున్నారు.

7. మన అలవాట్లు కూడా శిశువు ఎదుగుదలపై ప్రభావం చూపుతాయి. తాగుడు, సిగరెట్లు, గుట్కా, పొగాకు నమలడం అనేవి దుర్వ్యసనాలు పిల్లల ఎదుగుదల తగ్గుతుంది.

8. శ్రమ చేసేవారిలో విశ్రాంతి దొరకనపుడు పిల్లలు నెలలు నిండకముందే పుడతారు. లేక తొమ్మిది నెలలకు పుట్టినా బరువు తక్కువుంటారు. గర్భంతో ఉన్నపుడు విశ్రాంతి అవసరం. మధ్యాహ్నం రెండు గంటలు, రాత్రి 8 గంటలు నిద్ర తప్పనిసరి. అలాగే సరైన ఆహారం కూడా చాలా అవసరం.

9. ఐరన్‌, ఫోలిక్‌యాసిడ్‌ మాత్రలు మొదటి మూడు నెలలు మహిళ తప్పక వేసుకోవాలి. ప్రభుత్వ ఆసుపత్రులు ఈ మాత్రలు ఇస్తున్నా చాలామంది వేసుకోవడం లేదు. పాప పెరగడానికి ఈ ఫోలిక్ యాసిడ్ ఎంతో అవసరం.