గర్భవతుల పాదాల సమస్యలు!

By B N Sharma

Published: Friday, June 29, 2012, 15:22 [IST]

గర్భవతులు ఎదుర్కొనే ఆరోగ్య సమస్యలలో సహజంగా వచ్చే కాళ్ళ వాపు ఒకటి. ఈ వాపు ఎంతో అసౌకర్యంగా వుంటుంది. వాస్తవానికి కాళ్ళు మాత్రమే కాదు శరీరం అంతా కూడా కొద్దిపాటిగా ఉబ్బి నొప్పులు కలిగిస్తూంటుంది. ఈ దశలో మీ బరువులో నాలుగో వంతు నీరు మాత్రమే. కనుక మీరు ఆందోళన చెందనవసరం లేదు. మీరు రోజంతా అలసిన తర్వాత రాత్రులందు, ప్రెగ్నెన్సీ చివరి దశలో వేసవి నెలలలో కూడా ఈ రకమైన వాపు నొప్పులు అధికంగా వుంటాయి.

కారణాలు పరిశీలిస్తే...దీనిని వైద్య భాషలో ఎడీమా అంటారు. కడుపులో వున్న బిడ్డ కొరకు శరీరం నీరు, రక్తం అధికంగా తయారు చేస్తుంది. అది ద్రవ పదార్ధం కనుక సాధారణంగా శరీరంలోని చివరి భాగాలైన కాళ్ళ భాగానికి చేరుతూంటుంది. గర్భాశయం పెరగటం ద్వారా ఒత్తిడి కలిగి శరీర కింది భాగంలోకి ప్రవహిస్తుంది. కాళ్ళు, మడమలు ప్రెగ్నెన్సీ మూడవ త్రైమాసికంలో చాలా బాధ కలిగిస్తాయి. ఈ వాపులు, నొప్పులనుండి ఉపశమనం కలగాలంటే...గర్భవతి పలుచని, సాగేటి చెప్పులు ధరించాలి. ఎపుడు వీలైతే అపుడు మీ కాళ్ళను ఎత్తుమీద పెట్టి కూర్చోవాలి. పనిలో కష్టమే కాని మీ పరిస్ధితి అటువంటిది. కనుక సందేహించకండి. ఎత్తైన స్టూలు లేదా కుషన్ లేదా టేబుల్ వంటి వాటిపై కాళ్ళను చాపి ఎత్తులో వుంచండి. ఎక్కువసేపు నిలబడి వుండకండి. నిలబడి వుంటే, రక్తం దిగువ భాగానికి ప్రసరిస్తుంది.

పొటాషియం అధికంగాను, సోడియం తక్కువగాను వుండే ఆహారాలు తీసుకోవాలి. ఉప్పు చాలా వరకు తగ్గించాలి. మీకు ఎడమ చేతివైపుకు తిరిగి పడుకుంటే కొంత రిలీఫ్ కలుగుతుంది. గర్భవతుల కాళ్ళకు అమ్మే సాక్స్ కొని వేసుకోండి. ఇవి ఉదయం నుండి సాయంత్రం వరకు వేసుకుని వుంటే కొంత ఊరట కలుగుతుంది. శరీర భాగాలు గర్భవతులకు కొంత మేరకు వాపు రావటం సహజమే. గర్భవతికి నెలలు గడిచే కొలది ఉదయం వేళ వాపు తక్కువగా వుండటం, రోజులో తర్వాత కాళ్ళకు, పాదాలకు వాపు అధికం కావటం జరుగుతుంది. ప్రెగ్నెన్సీ చివరి భాగంలో వాపు మీ చేతులను కూడా తాకుతుంది. వేళ్ళు ఉబ్బిపోతాయి.

దురదృష్టవశాత్తూ, గర్భవతికి మూడవ త్రైమాసికంలో ఈ సమస్య అధికంగా వుంటుంది. ఆరోగ్యవతులైన గర్భవతులలో ఈ సమస్య 40 నుండి 80 శాతం వరకు ఉంటుంది. వేసవి కాలం సమయంలో ఈ జబ్బు మరింత అధికంగా వుంటుంది. అయితే, మీకు కనుక ముఖం చేతులు వంటివి ఆకస్మాత్ గా ఉబ్బరించితే, వైద్యులను తప్పక సంప్రదించండి. ఎందుకంటే ఈ సమస్య కొన్నిమార్లు మీకే కాదు, మీ బేబీకి సైతం నష్టం కలిగిస్తుంది.