అద్భుతమైన రుచి, అమోఘమైన సువాసన..నోరూరించే కాశ్మీరీ మటన్ గ్రేవీ..ఎలా చేసుకోవాలంటే

సండే వచ్చిందంటే చాలా ఇళ్లలో నాన్ వెజ్ ఘుమఘుమలు ముక్కుకు తగలాల్సిందే. ఆ రోజు కుటుంబమంతా కలిసి చేసే భోజనానికి ఉండే ప్రత్యేకతే వేరు. ఎప్పుడూ తినే మటన్ పులుసు, మటన్ ఫ్రై కాకుండా ఈసారి కాస్త కొత్తగా, రాజసంగా ఉండే కాశ్మీరీ మటన్ గ్రేవీ ట్రై చేయండి. ఈ వంటకం పేరు వినగానే చాలా కష్టమేమో అనిపించవచ్చు. కానీ ఇది చాలా సులభంగా, తక్కువ సమయంలో తయారు చేసుకోగల అద్భుతమైన వంటకం.

ఈ కూర రుచి చూస్తే మీరు మామూలు మటన్ కూరను మర్చిపోవడం ఖాయం. అన్నం, చపాతీ, దోసె, ఇడ్లీ దేనితో తిన్నా దీని రుచి అమోఘం. కశ్మీరీ మటన్ గ్రేవీ తయారీకి కావలసిన పదార్థాలు, తయారీ విధానం ఇక్కడ చూడండి.

కావలసిన పదార్థాలు
-మటన్ - అర కిలో
-గట్టి పెరుగు - 1 కప్పు
-ఉల్లిపాయలు - 2
-అల్లం వెల్లుల్లి పేస్ట్ - 2 చెంచాలు
-కారం పొడి - 1 చెంచా
-కాశ్మీరీ కారం పొడి - 1 చెంచా
-పసుపు - పావు చెంచా
-జీలకర్ర పొడి - 1 చెంచా
-సోంపు పొడి - ఒకటిన్నర చెంచాలు
-సోంపు - అర చెంచా
-దాల్చిన చెక్క - 1 చిన్న ముక్క
-లవంగాలు - 2, యాలకులు - 2
-కొబ్బరి పాలు - పావు కప్పు
-ఉప్పు - రుచికి సరిపడా
-నూనె - 3 చెంచాలు
-నెయ్యి - 2 చెంచాలు
-కొత్తిమీర - కొద్దిగా

తయారీ విధానం

-ముందుగా మటన్‌ ను శుభ్రంగా కడిగి నీరు లేకుండా ఆరబెట్టి పక్కన పెట్టుకోవాలి.

-ఒక పెద్ద గిన్నెలో నూనె వేడి చేసి, అందులో దాల్చిన చెక్క, లవంగాలు, యాలకులు, సోంపు వేసి చిటపటలాడించాలి.

-సువాసన వస్తున్నప్పుడు ఉల్లిపాయ ముక్కలు వేసి బంగారు రంగు వచ్చేవరకు వేయించాలి. ఆ తర్వాత అల్లం వెల్లుల్లి పేస్ట్ వేసి పచ్చి వాసన పోయే వరకు వేపాలి.

-ఇప్పుడు మటన్ ముక్కలు వేసి, అవి రంగు మారి కొద్దిగా బిగుసుకునే వరకు 5-10 నిమిషాలు బాగా వేపాలి.

-మటన్ సగం ఉడికిన తర్వాత పసుపు, కారం, కాశ్మీరీ కారం, జీలకర్ర పొడి, ఈ కూరకి ప్రత్యేకమైన రుచినిచ్చే సోంపు పొడి వేసి బాగా కలపాలి.

-మసాలాల సువాసన వంటిల్లంతా వ్యాపిస్తున్నప్పుడు మంటను తగ్గించి, గిలకొట్టిన పెరుగును కొద్ది కొద్దిగా వేస్తూ కలపాలి. పెరుగు విరిగిపోకుండా జాగ్రత్తగా, నూనె పైకి తేలేంత వరకు ఉడికించాలి.

-ఆ తర్వాత రుచికి సరిపడా ఉప్పు, కొబ్బరి పాలు, అవసరమైతే కొద్దిగా నీళ్లు పోసి, మూతపెట్టి చిన్న మంట మీద 20-30 నిమిషాలు లేదా మటన్ మెత్తగా అయ్యే వరకు ఉడికించాలి.

-గ్రేవీ చిక్కబడి మటన్ మెత్తగా ఉడికిన తర్వాత చివరగా రెండు చెంచాల నెయ్యి వేసి కలపాలి. ఈ నెయ్యి కూరకు అదనపు రుచిని, సువాసనను ఇస్తుంది.

-స్టవ్ ఆఫ్ చేసి, సన్నగా తరిగిన కొత్తిమీర చల్లుకోవాలి. అంతే నోరూరించే కాశ్మీరీ మటన్ గ్రేవీ రెడీ.