నానమ్మల కాలం నాటి నల్చిన కారం..చికెన్, మటన్ కూడా పోటికి రావు..రోలు, మిక్సీ కూడా అక్కర్లేదు చేత్తోనే..

తెలుగు వారి వంటకాలు అనగానే ముందుగా గుర్తొచ్చేది ఘాటైన రుచులు, కారం, మసాలాలు. పూర్వకాలం నుండి మన అమ్మమ్మలు, నానమ్మలు రోట్లో వేసి దంచి చేసే పొడులు, పచ్చళ్ల రుచే వేరు. అలాంటి ఒక అద్భుతమైన సాంప్రదాయ వంటకమే ఈ నల్చిన కారం. దీని స్పెషాలిటీ ఏంటంటే దీనిని రోట్లో దంచాల్సిన పని కూడా ఉండదు. కేవలం మన చేతులతోనే దీన్ని రెడీ చేసుకోవచ్చు.

వేడి వేడి అన్నంలో కాస్త నెయ్యి వేసుకుని ఈ నల్చిన కారం కలుపుకుని తింటే ఆ రుచి అమృతంతో సమానం. నల్చిన కారం కేవలం రుచికి మాత్రమే కాదు, ఆరోగ్యానికి కూడా ఎంతో మేలు చేస్తుంది. ఇందులో వాడే ప్రతిదీ ఒక ఔషధంతో సమానం. శరీరానికి కావలసి పోషకాలు, రుచి అన్నీ ఒకేసారి అందించే ఈ నల్చిన కారాన్ని మీ ఇంట్లోనే ఎలా తయారు చేసుకోవాలో ఇక్కడ చూడండి.

నల్చిన కారం తయారీకి కావాల్సిన పదార్థాలు

-ఎండుమిర్చి
-కరివేపాకు
-కొత్తిమీర
-వెల్లుల్లి
-నూనె
-ఉల్లిపాయ
-టమాటో
-ఉప్పు

ప్రొటీన్, ఫైబర్ పుష్కలంగా ఉండే ఉలవల కారం పొడి..ఒక్కసారి చేస్తే నెల రోజులు నిల్వ..ఇడ్లీ, వేడి అన్నంలోకి బెస్ట్

నల్చిన కారం తయారీ విధానం

-ముందుగా 5 మీడియం సైజు టమాటోలు తీసుకోండి. వాటిని శుభ్రంగా కడగండి. తర్వాత ఒక్కో టమాటోను రెండు ముక్కలుగా కట్ చేసుకోండి.

తర్వాత స్టవ్ ఆన్ చేసి ఒక బాండీ పెట్టుకొని అందులో 2 టేబుల్ స్పూన్ల ఆయిల్ వేసి వేడి చేసి అందులో 1 మీడియం సైజు వెల్లుల్లి గడ్డ రెబ్బలను తొక్క తీసేసి నూనెలో వేసి లైట్ గా కలర్ మారే దాకా వేయించాలి. తర్వాత ఇందులోనే 12 ఎండుమిరపకాయలు వేసి కలర్ మారి, చేత్తో పట్టుకుంటే కరకరమనేలా అయ్యేదాకా వేయించుకోవాలి.

-తర్వాత ఎండుమిర్చి, వేగిన వెల్లుల్లిని ఒక ప్లేట్ లోకి తీసుకోండి.

-ఇప్పుడు స్టవ్ మీద బాండీలో మిగిలి ఉన్న నూనెలోనే కరివేపాకు, సన్నగా, పొడవుగా కట్ చేసుకునన్న 3 ఉల్లిపాయల చీలికలను వేసి అవి మెత్తబడి, గొల్టెన్ కలర్ లోకి మారిన తర్వాత వాటిని కూడా ప్లేట్ లోకి తీసుకోండి.

-తర్వాత బాండీలో మరికొంచెం నూనె వేసి అందులో కట్ చేసుకున్న టమాటో ముక్కలన్నీ వేసి పైన తొక్కు చేత్తో పట్టుకుంటే ఊడి వచ్చేలా అయ్యే వరకు సుమారు 5 నిమిషాలు ఉడికించాలి. తర్వాత వీటిని ప్లేట్ లోకి తీసుకోండి. టమాటోల పైన తొక్క తీసేయండి.

-ఇప్పుడు ముందుగా వేయించిన ఎండుమిర్చి,వెల్లుల్లిని చేత్తో బాగా నలుపుకోండి. తర్వాత ఇందులోనే 1 టీస్పూన్ ఉప్పు వేసి బాగా కలుపుకోండి. తర్వాత ఈ మిశ్రమంలోనే వేయించిన ఉల్లిపాయలు, కరివేపాకు వేసి చేత్తోనే బాగా కలుపుకోండి. చివరగా ఇందులో వేయించి తొక్క తీసేసిన టామాటోలు వేసి చిదిమినట్లుగా బాగా కలుపుకోండి.

-మెత్తం అన్నీ కలిసేలా బాగా కలుపుకున్నాక చివరగా అందులో కొంచెం ఎక్కువగానే కొత్తిమీర వేసుకొని బాగా కలుపుకోండి.

-అంతే సూపర్ టేస్టీ, హెల్తీ నల్చిన కారం రెడీ.