ఎండలను ఎదిరించే కమ్మని పానీయం..మసాలా మజ్జిగ తయారీ విధానం ఇదే!

వేసవి కాలం వచ్చేసింది. భానుడి ప్రతాపానికి రోజురోజుకూ ఉష్ణోగ్రతలు పెరిగిపోతున్నాయి. బయట అడుగుపెడితే చాలు, చెమటలతో శరీరం అలసిపోయి నీరసం వచ్చేస్తుంది. ఇలాంటి ఎండల్లో శరీరాన్ని చల్లగా, హైడ్రేటెడ్‌ గా ఉంచుకోవడం చాలా ముఖ్యం. వేడిని తట్టుకోవడానికి మనలో చాలామంది శీతల పానీయాలు, చక్కెర ఎక్కువగా ఉండే కూల్ డ్రింక్స్ వైపు మొగ్గు చూపుతారు. కానీ అవి ఆరోగ్యానికి తీవ్ర హాని చేస్తాయి.

వీటికి బదులుగా మన పెద్దలు అందించిన అద్భుతమైన పానీయం మజ్జిగ. అందులోనూ మసాలా మజ్జిగ తాగితే ఆ కిక్కే వేరు. ఇది దాహాన్ని తీర్చడమే కాకుండా, శరీరాన్ని లోపలి నుండి చల్లబరుస్తుంది. నిమిషాల్లో ఇంట్లోనే ఎంతో సులభంగా, రుచికరంగా మసాలా మజ్జిగను ఎలా తయారు చేసుకోవాలో ఇక్కడ చూడండి.

మసాలా మజ్జిగ తయారీకి కావాల్సిన పదార్థాలు

గట్టి పెరుగు - 1 కప్పు
చల్లటి నీళ్లు - 2 కప్పులు
వేయించిన జీలకర్ర పొడి - అర టీస్పూన్
నల్ల ఉప్పు (బ్లాక్ సాల్ట్) - పావు టీస్పూన్
కొత్తిమీర - కొద్దిగా
పుదీనా ఆకులు - 2 లేదా 3
ఉప్పు - రుచికి సరిపడా
అల్లం తురుము- చిటికెడు
నల్ల మిరియాల పొడి - చిటికెడు

మసాలా మజ్జిగ తయారీ విధానం

-ముందుగా ఒక శుభ్రమైన పాత్ర లేదా మిక్సీ జార్ తీసుకోండి. అందులో ఒక కప్పు పెరుగు వేసి, ఎలాంటి ఉండలు లేకుండా క్రీమ్ లాగా మారేంత వరకు మజ్జిగ కవ్వంతో బాగా గిలకొట్టండి.

-పెరుగు మెత్తగా మారిన తర్వాత, అందులో రెండు కప్పుల చల్లటి నీటిని పోసి మళ్లీ బాగా కలపండి. ఇప్పుడు ఈ మజ్జిగలో వేయించిన జీలకర్ర పొడి, నల్ల ఉప్పు, మీ రుచికి తగినంత సాధారణ ఉప్పును వేసి బాగా మిక్స్ చేయండి.

-మసాలా మజ్జిగకు మరింత ఘాటు, అద్భుతమైన రుచి రావాలనుకుంటే, అందులో కొద్దిగా అల్లం తురుము లేదా చిటికెడు మిరియాల పొడిని కూడా కలుపుకోవచ్చు.

-చివరగా, సన్నగా తరిగి పెట్టుకున్న పచ్చని కొత్తిమీర, తాజా పుదీనా ఆకులను పైన చల్లి, ఒకసారి తేలికగా కలపండి. అంతే ఎండలను ఎదిరించే కమ్మని, చల్లని మసాలా మజ్జిగ రెడీ. ఒక గ్లాసులో పోసి వెంటనే వడ్డించండి.ఇది సహజసిద్ధమైన కూలర్ లాగా పనిచేసి శరీరాన్ని తక్షణమే చల్లబరుస్తుంది. వడదెబ్బ తగలకుండా కాపాడుతుంది.

వేసవిలో తరచుగా వేధించే ఛాతీ మంట (గుండెల్లో మంట), గ్యాస్, ఎసిడిటీ వంటి సమస్యలను తగ్గించడంలో ఈ పానీయం అత్యంత ప్రభావవంతంగా పనిచేస్తుంది.

పే-గుల ఆరోగ్యం: మజ్జిగలో ఉండే ప్రోబయోటిక్స్ (మంచి బ్యాక్టీరియా) పేగుల ఆరోగ్యాన్ని మెరుగుపరుస్తాయి. దీనివల్ల రోగనిరోధక శక్తి పెరుగుతుంది.

-క్యాల్షియం పుష్కలంగా ఉండటం వల్ల ఎముకలు బలపడతాయి. శరీరంలోని వ్యర్థాలను బయటకు పంపి (నిర్విషీకరణ) శరీరాన్ని తాజాగా ఉంచుతుంది.