పైన కరకర.. లోపల జ్యూసీగా..స్వీట్ షాప్ స్టైల్ మడత కాజా ఎలా చేసుకోవాలంటే

స్వీట్లలో మడత కాజాకు ఉన్న క్రేజ్ వేరు. పైన కరకరలాడుతూ, లోపల పంచదార పాకం నిండి జ్యూసీగా ఉండే ఈ మిఠాయిని ఒక్కసారి రుచి చూస్తే ఎవరైనా సరే ఫిదా అవ్వాల్సిందే. తాపేశ్వరం, కాకినాడ ప్రాంతాల్లో పుట్టిన ఈ స్వీట్ ప్రపంచవ్యాప్తంగా తెలుగువారికి అత్యంత ఇష్టమైనది. మడత కాజా ప్రత్యేకత అంతా దాని మడతలలోనే ఉంటుంది. మడత కాజా ఎలా చేసుకోవాలో ఇక్కడ చూడండి.

కావాల్సిన పదార్థాలు
మైదా పిండి - 2 కప్పులు (250-300 గ్రా)
నెయ్యి- పావు కప్పు
వంట సోడా - చిటికెడు
ఉప్పు - చిటికెడు
నీళ్లు - పిండి కలపడానికి సరిపడా
బియ్యం పిండి - 2 టేబుల్ స్పూన్లు
నెయ్యి - 2 టేబుల్ స్పూన్లు
పంచదార - 2 కప్పులు
నీళ్లు - 1 కప్పు
యాలకుల పొడి - 1 టీస్పూన్
నిమ్మరసం - 1 టీస్పూన్
నూనె -డీప్ ఫ్రైకి సరిపడా

తయారీ విధానం

-ముందుగా ఒక వెడల్పాటి గిన్నెలో మైదా పిండిని జల్లించి తీసుకోండి. అందులో చిటికెడు ఉప్పు, చిటికెడు వంట సోడా వేసి బాగా కలపండి.

-ఇప్పుడు కరిగించిన వేడి నెయ్యిని పిండిలో వేసి చేత్తో బాగా కలపాలి. పిండిని చేతితో ముద్ద చేస్తే ముద్దలా నిలబడాలి.

-తర్వాత కొద్దికొద్దిగా నీళ్లు పోస్తూ పిండిని చపాతీ పిండిలా గట్టిగా కలుపుకోవాలి. మరీ మెత్తగా ఉండకూడదు, మరీ గట్టిగా ఉండకూడదు. ఈ పిండి ముద్దపై తడి గుడ్డ కప్పి 30 నిమిషాల పాటు పక్కన పెట్టాలి.

-ఇప్పుడు ఒక చిన్న గిన్నెలో 2 స్పూన్ల నెయ్యి, 2 స్పూన్ల బియ్యం పిండి వేసి క్రీమ్ లాగా పేస్ట్ చేసుకోవాలి.

-ఇప్పుడు నానిన పిండిని తీసుకుని, మరోసారి బాగా మర్దన చేయాలి. పిండిని పెద్ద ఉండలుగా విభజించుకోవాలి. ఒక ఉండను తీసుకుని చపాతీ కర్రతో వీలైనంత పల్చగా, దీర్ఘ చతురస్రాకారంలో చపాతీని ఒక వైపు నుంచి నెమ్మదిగా రోల్ చేస్తూ రావాలి. గాలి బుడగలు లేకుండా గట్టిగా చుట్టాలి. చుట్టిన రోల్ చివర్లో కొంచెం నీళ్లు రాసి అంచులు విడిపోకుండా అతికించాలి.

-ఇప్పుడు ఈ రోల్ ను చాకుతో 1 ఇంచు ముక్కలుగా కట్ చేసుకోవాలి. కట్ చేసిన ప్రతి ముక్కను వేలితో లేదా చపాతీ కర్రతో నిలువుగా కాస్త అదిమి కాజా ఆకారాన్ని ఇవ్వాలి.

-స్టవ్ మీద గిన్నె పెట్టి పంచదార, నీళ్లు పోసి మరిగించాలి. పంచదార కరిగాక, పాకం తీగ పాకం వచ్చే వరకు ఉడికించాలి. రెండు వేళ్ళ మధ్య పాకం పట్టుకుంటే చిన్న తీగలా సాగాలి. మరీ ముదురు పాకం రాకూడదు, లేదంటే కాజా లోపలికి పాకం వెళ్లదు.

-పాకం రాగానే స్టవ్ ఆపేసి అందులో యాలకుల పొడి, నిమ్మరసం కలపాలి. పాకం గోరువెచ్చగా ఉండేలా చూసుకోవాలి.

-బాండీలో డీప్ ఫ్రైకి సరిపడా నూనె పోసి వేడి చేయాలి. నూనె మరీ ఎక్కువ వేడిగా ఉండకూడదు. మీడియం మంట మీద వేడిలో ఉండాలి. కాజాలను నూనెలో వేసినప్పుడు అవి వెంటనే పైకి తేలకూడదు. నెమ్మదిగా వేగాలి. మంటను సిమ్ లో పెట్టి కాజాలను వేయించాలి.

-కాజాలు బంగారు రంగులోకి వచ్చే వరకు ఓపికగా వేయించి తీయాలి. నూనెలోంచి తీసిన వేడి వేడి కాజాలను వెంటనే గోరువెచ్చని పంచదార పాకంలో వేయాలి. కాజాలను పాకంలో సుమారు 5 నిమిషాల పాటు ఉంచాలి. అప్పుడే పాకం లోపలి పొరల్లోకి వెళ్తుంది. తర్వాత వాటిని తీసి ప్లేట్ లో సర్వ్ చేసుకోవచ్చు. చల్లారిన తర్వాత డబ్బాలో నిల్వ చేసుకోవచ్చు.