పైన క్రిస్పీగా,లోపల మెత్తగా..అటుకులు, గోధుమపిండితో హెల్దీ స్నాక్..టీ టైంకి పర్ఫెక్ట్

సాయంత్రం సమయంలో ముఖ్యంగా వాతావరణం చల్లగా ఉండే ఈ సీజన్ లో వేడి వేడిగా ఏదైనా తినాలని మనసు లాగేస్తుంటది. అయితే ఈ సమయంలో మీ ఇంట్లో ఒక కప్పు అటుకులు ,కొంచెం గోధుమ పిండి ఉంటే చాలు పోహా వీట్ బైట్స్ తయారుచేసుకోవచ్చు. పోహా వీట్ బైట్స్..రుచికి రుచి, ఆరోగ్యానికి ఆరోగ్యం అందించే అద్భుతమైన స్నాక్. ఈ స్నాక్ ని తయారుచేయడం కూడా టీ పెట్టినంత ఈజీగా అయిపోతుంది. సాయంత్రం వేళ పిల్లలకు లేదా పెద్దలకు తేలికైన ఆహారంగా ఈ స్నాక్ బాగుంటుంది. అటుకులు, గోధుమపిండిని ఉపయోగించి తక్కువ నూనెతో, త్వరగా రుచికరమైన, పౌష్టిక స్నాక్ పోహా వీట్ బైట్స్ ను ఎలా తయారుచేసుకోవాలో ఇక్కడ చూడండి.

తయారీకి కావాల్సిన పదార్థాలు

-అటుకులు
-టమాటో
-పచ్చిమిరపకాయ
-అల్లం
-కరివేపాకు
-వెల్లుల్లి
-గోధుమపిండి
-శెనగపిండి
-కారం
-కరివేపాకు
-కొత్తిమీర
-ఉల్లిపాయ
-జీలకర్ర
-ఉప్పు
-పెప్పర్ పౌడర్
-ధనియా పౌడర్
-నూనె

తయారీ విధానం

-ముందుగా ఒక గిన్నెలో 1 కప్పు అటుకులు వేయండి,నీళ్లు పోసి రెండుసార్లు శుభ్రంగా కడిగి ఆ నీళ్లు వంపేయండి.

-ఇప్పుడు కడిగిన అటుకుల్లో 3 టేబుల్ స్పూన్ల నీళ్లు పోసి మూతపెట్టి 5 నిమిషాలు పక్కన పెట్టుకోండి.

-5 నిమిషాలు నీటిలో నానిన అటుకులను చేత్తో కలుపుకోండి. మరీ మెత్తగా కలుపుకోవద్దు.

-తర్వాత మిక్సీ గిన్నెలో 1 టమాటో ముక్కలు, 1 పచ్చిమిరపకాయ, 1రెమ్మ కరివేపాకు, 3 వెల్లుల్లి రెబ్బలు,చిన్న అల్లం ముక్క వేసి గ్రైండ్ చేసుకోవాలి. నీళ్లు పోసుకోకుండా కొంచెం బరకగా గ్రైండ్ చేసుకోవాలి.

-గ్రైండ్ చేసిన మిశ్రమాన్ని అటుకుల్లో వేసి,ఇందులోనే 2 టేబుల్ స్పూన్ల గోధుమపిండి, 1 టేబుల్ స్పూన్ శెనగపిండి, 1 టీస్పూన్ జీలకర్ర, 1 ఉల్లిపాయ సన్నని తరుగు, పావు టీస్పూన్ ధనియా పౌడర్, పావు టీస్పూన్ పెప్పర్ పౌడర్, అర టీస్పూన్ కారం, రుచికి సరిపడా ఉప్పు, కొంచెం కొత్తిమీర తరుగు వేసి, 1 టేబుల్ స్పూన్ నూనె వేసి మొత్తం కలిసేలా కలుపుకోవాలి. ఉప్పు,కారం సరిపోకుంటే ఈ దశలోనే వేసి కలుపుకోండి.

-ఇప్పుడు చేతులకు కొంచెం ఆయిల్ రాసుకొని కలిపిన పిండిని కొంచెం కొంచెంగా చేతుల్లోకి తీసుకొని టిక్కీల్లా వత్తుకోవాలి. మరీ పల్చగా కాకుండా కొంచెం మందంగానే ఉండేలా చిన్నవిగా వత్తుకోవాలి.

-తర్వాత స్టవ్ మీద పాన్ లో డీప్ ఫ్రై చేయడానికి తగినదానికంే కొంచెం తక్కువగానే ఆయిల్ వేసి వేడి చేశాక అందులో వత్తుకున్న టిక్కీలను వేసి రెండువైపులా ఎర్రగా కాల్చుకొని దించేయండి. అంతే వేడి వేడి అటుకుల టిక్కీ రెడీ.