దోశ, చపాతీలోకి అదిరిపోయే స్పైసీ పచ్చళ్లు.. ఇలా చేశారంటే ఆ టేస్టే వేరు.!

తెలుగు రాష్ట్రాల్లో పచ్చళ్లు చాలా స్పెషల్‌. బ్రేక్‌ఫాస్ట్‌, లంచ్‌, డిన్నర్‌లో రోటి పచ్చళ్లు ఆల్‌టైం ఫేవరెట్‌. అయితే దోశల్లోకి ఎక్కువగా పల్లీ, కొబ్బరి చట్నీ.. చపాతీల్లోకి ఆలూ ఫ్రై, పప్పు, కుర్మా ఇలా చేస్తుంటారు. కానీ ఈ సారి ఉల్లిపాయ, పచ్చిమిర్చి, బీరకాయ తొక్కతో ఇలా సింపుల్‌గా పచ్చడి చేసి చూడండి. ఇకపై రెగ్యులర్‌ చట్నీలు చేయడం ఆపేస్తారు.

ఉల్లిపాయ పచ్చడి తయారీకి కావాల్సిన పదార్థాలు

ఉల్లిపాయ- ఒకటి
పచ్చిమిర్చి - నాలుగు
వెల్లుల్లి- నాలుగు రెబ్బలు
కొత్తిమీర- కొద్దిగా
ఉప్పు- సరిపడా
కారం- టీ స్పూన్‌
ఆవాలు, జీలకర్ర- టీ స్పూన్‌
నూనె- ఒక స్పూన్‌
కరివేపాకు
పసుపు

తయారీ విధానం
-ముందుగా ఉల్లిపాయను పెద్ద ముక్కలుగా కట్‌ చేసుకోవాలి. ఇప్పుడు రోట్లో ఉల్లిపాయ, వెల్లుల్లి రెబ్బలు, పచ్చిమిర్చి, కారం, కొత్తిమీర, ఉప్పు వేసి మెత్తగా రుబ్బుకోవాలి. తర్వాత నూనె వేడి చేసి అందులో ఆవాలు, జీలకర్ర, కరివేపాకు, కొద్దిగా పసుపు వేసుకుని తాలింపు పెట్టుకోవాలి. అంతే స్పైసీ ఉల్లిపాయ పచ్చడి రెడీ..

బీరకాయ తొక్క పచ్చడికి కావాల్సిన పదార్థాలు

బీరకాయలు- ఒకటి పెద్దది
పచ్చి కొబ్బరి తురుము- కప్పు
చింతపండు- చిన్న నిమ్మకాయ సైజు
మినప్పప్పు- టీస్పూన్‌
కందిపప్పు- టీస్పూన్‌
ఎండుమిర్చి- మూడు
వెల్లుల్లి- నాలుగు రెబ్బలు
నూనె- టేబుల్‌ స్పూన్

తయారీ విధానం

-ముందుగా బీరకాయ తొక్క తీసి పెట్టుకోవాలి. బాణలిలో కొద్దిగా నూనె వేసి వేడయ్యాక బీరకాయ తొక్క తీసి వేగాక పక్కన పెట్టి కాసేపు చల్లారనివ్వాలి. ఇప్పుడు అదే పాన్‌లో మిగిలిన నూనె వేసి మినప్పప్పు, కందిపప్పు, ఎండుమిర్చి వేసి వేగనివ్వాలి. తర్వాత పచ్చి కొబ్బరి తురుము, చింతపండు వేసి మగ్గనివ్వాలి. చివరిగా మరోసారి బీరకాయ తొక్క వేసి కలిపి కాసేపు వేయించాక మిక్సీలోకి తీసుకోవాలి. అందులో కొద్దిగా ఉప్పు, వెల్లుల్లి వేసి మెత్తగా రుబ్బుకోవాలి. దీనికి తాలింపు అవసరం లేదు. అంతే స్పైసీ బీరకాయ తొక్క పచ్చడి రెడీ.. ఈ పచ్చళ్లు టిఫిన్‌లోకే కాదు వేడి వేడి అన్నంలోకి కూడా అదిరిపోతుంది.