మాటగాడే కాదు,మంచి వంటగాడు కూడా: ప్రధాని మోదీకి ఏమేం వంటలు వండటం వచ్చో తెలుసా?

దేశ ప్రధానమంత్రి నరేంద్ర మోదీ టీవీలో, సభలలో ప్రసంగాలు ఇవ్వడం మనం తరచుగా చూస్తుంటాం. ఆయన మాట్లాడే అద్భుతమైన శైలి, ఆకర్షణీయమైన వ్యక్తిత్వం, ఉత్సాహభరితమైన హావభావాలు ఎంతో మందిని ఆకట్టుకుంటాయి.

ఆయన తన మన్ కీ బాత్ కార్యక్రమం ద్వారా లేదా వివిధ ఇంటర్వ్యూల ద్వారా దేశ ప్రజలతో ఎన్నో వ్యక్తిగత విషయాలు పంచుకుంటూ ఉంటారు. అందులో భాగంగా, తనకు భోజనం అంటే చాలా ఇష్టమని ప్రధాని మోదీ చెప్పడం మీరు వినే ఉంటారు. కానీ ప్రధానమంత్రి మోదీకి స్వయంగా వంట చేయడం అన్నా కూడా అంతే ఇష్టమన్న ఆసక్తికరమైన విషయం బహుశా మీకు తెలుసా?

నరేంద్రమోదీ మాటల మాంత్రికుడే కాదండోయ్.. ఆయన ఒక మంచి వంటగాడు కూడా. మరి ప్రధాని మోదీకి ఎలాంటి ఆహారం ఇష్టం? ఆయన ఏమేమి వండగలరు? అనే ఆసక్తికరమైన విషయాలు ఇక్కడ చూడండి.

మోదీ ఆహారపు అలవాట్లు
పలు మీడియా రిపోర్ట్ ల ప్రకారం.. ప్రధాని మోదీ చాలా కఠినమైన, క్రమశిక్షణతో కూడిన ఆహారపు నియమాలను పాటిస్తారు. ఆయన వయసులో కూడా అంత చురుగ్గా ఉండటానికి కారణం ఆయన తీసుకునే ఆహారమే. ఆయనకు ఇంటి భోజనం అంటే చాలా ఇష్టం. మసాలాలు ఎక్కువగా లేని, సాధారణమైన, పోషకవిలువలు ఎక్కువగా ఉండే సాత్విక ఆహారాన్ని తీసుకోవడానికి ఆయన ప్రాధాన్యత ఇస్తారు.

ఆయన రోజువారీ ఆహారంలో పసుపు, పెరుగు తప్పనిసరిగా ఉంటాయి. అలాగే, హిమాలయాల్లో మాత్రమే లభించే కొండ పుట్టగొడుగులు తినడం అంటే ఆయనకు చాలా ఇష్టం.

అత్యంత ఇష్టమైన వంటకం
నరేంద్ర మోదీకి అత్యంత ఇష్టమైన వంటకం మునగ పరాఠా. దీని గురించి ఆయన స్వయంగా ఓ ఇంటర్వ్యూలో చెప్పారు. పని ఒత్తిడి నుంచి సమయం దొరికినప్పుడల్లా ఆయన కిచెన్‌ లోకి వెళ్లి కాస్త వంట చేయడానికి ప్రయత్నిస్తుంటారు.

అలా ఆయన ఎన్నోసార్లు తనకు ఇష్టమైన మునగ పరాఠాను స్వయంగా తయారు చేసుకున్నారు. ఆరోగ్యానికి ఎంతో మేలు చేసే ఈ మునగ పరాఠాను ఆయన వారానికి రెండు సార్లు తప్పకుండా తన డైట్ లో ఉండేలా చూసుకుంటారు.

ఇవి మాత్రమే కాకుండా మఖానా, మొలకలు, గుజరాతీ వంటకాలైన ఢోక్లా, ఖాండ్వీ, ఖాఖ్రాతో పాటు పప్పులు, కూరగాయలు, రోటీ, సూప్, ఇడ్లీ, దోశ, సగ్గుబియ్యం కిచిడీ వంటి వాటిని కూడా ఆయన ఎంతో ఇష్టంగా తింటారు.

వంట చేయడంపై ఉన్న మక్కువ..
ప్రధాని మోదీ తినడాన్ని ఎంతగా ఆస్వాదిస్తారో, స్వయంగా వండటాన్ని కూడా అంతే ఆస్వాదిస్తారు. తాను RSS ప్రచారక్‌ గా ఉన్నప్పటి నుంచి రాజకీయాల్లోకి ప్రవేశించే వరకు ఎన్నో ఏళ్లపాటు తన వంట తానే చేసుకునేవారని ఆయన చాలాసార్లు చెప్పారు. తన జీవిత ప్రారంభ రోజుల్లో, ఉదయం లేవగానే తన టీ తానే స్వయంగా తయారు చేసుకునేవారు.

అలాగే పోహా, కిచిడీ తయారు చేయడం ఆయనకు చాలా ఇష్టం. ముఖ్యంగా కిచిడీ తయారు చేయడం చాలా సులభం, పైగా త్వరగా అయిపోతుంది, జీర్ణం అవ్వడానికి కూడా తేలికగా ఉంటుంది. అందుకే RSSలో ఉన్నప్పుడు, తన కార్యాలయంలోని సహచరుల కోసం ఆయన తరచుగా కిచిడీ వండి పెట్టేవారు.

ఆయనకు సగ్గుబియ్యం కిచిడీ చేయడం కూడా బాగా వచ్చు. ఒకసారి ఒక కార్యక్రమంలో ఒక మహిళకు సగ్గుబియ్యం కిచిడీ ఎలా తయారు చేయాలో పూసగుచ్చినట్లు వివరించి, అక్కడున్న వారందరినీ ఆయన ఆశ్చర్యపరిచారు. ఈ వయసులో కూడా, సమయం దొరికితే తనకు ఇష్టమైన వంటకాలను వండటానికి ఆయన ఎప్పుడూ సిద్ధంగానే ఉంటారు.