ఫుడ్ లవర్స్ కోసం స్పెషల్..మంగళూరు స్టైల్ చికెన్ ఉర్వాల్..ఇంట్లోనే ఇలా చేసుకోండి

మంగళూరు వంటకాల్లో ప్రత్యేకమైన స్థానాన్ని సంపాదించుకున్న చికెన్ ఉర్వాల్.. ప్రత్యేకమైన రుచి, సుగంధంతో ఫుడ్ లవర్స్ ని విశేషంగా ఆకట్టుకుంటుంది. కొబ్బరి నూనె, ఎండుమిర్చి, వివిధ రకాల సుగంధ ద్రవ్యాల కలయికతో తయారయ్యే ఈ వంటకం కేవలం రుచికరమైనది మాత్రమే కాకుండా అనేక ఆరోగ్య ప్రయోజనాలను కూడా కలిగి ఉంది. ఈ సూపర్ టేస్టీ మంగళూరు స్టైల్ చికెన్ ఉర్వాల్ ని మీ ఇంట్లోనే ఈజీగా ఎలా తయారుచేసుకోవాలో ఇక్కడ చూడండి.

మంగళూరు స్టైల్ చికెన్ ఉర్వాల్ తయారీకి కావలసిన పదార్థాలు

-చికెన్ - 1 కేజీ (ముక్కలుగా కట్ చేసుకోవాలి)
-ఉప్పు - సరిపడా
-అల్లం వెల్లుల్లి పేస్ట్ - 2 టేబుల్ స్పూన్లు
-పసుపు - 1/2 టీ స్పూన్
-జీలకర్ర పొడి - 1 టీ స్పూన్
-ధనియాల పొడి - 1 టేబుల్ స్పూన్
-గరం మసాలా పొడి - 2 టీ స్పూన్లు
-నిమ్మరసం - 2 టేబుల్ స్పూన్లు
-ఎండు మిరపకాయలు - 10-12
-జీడిపప్పు - 2 టేబుల్ స్పూన్లు
-కొబ్బరి నూనె - 2 టేబుల్ స్పూన్లు
-నెయ్యి - 1 టీ స్పూన్
-కరివేపాకు - 2 రెమ్మలు
-కొబ్బరి నూనె - 1 టేబుల్ స్పూన్

తయారీ విధానం

-ఒక పెద్ద గిన్నెలో చికెన్ ముక్కలు వేసి అందులో ఉప్పు, అల్లం వెల్లుల్లి పేస్ట్, పసుపు పొడి, జీలకర్ర పొడి, ధనియాల పొడి, గరం మసాలా పొడి, నిమ్మరసం వేసి బాగా కలపండి. మసాలాలు చికెన్ ముక్కలకు పూర్తిగా పట్టేలా చూసుకోండి. ఈ మిశ్రమాన్ని కనీసం 1-2 గంటలు నానబెట్టండి. ఎక్కువసేపు నానితే చికెన్ మరింత రుచిగా ఉంటుంది.

-ఇప్పుడు ఎండు మిరపకాయలను వేడి నీటిలో 15-30 నిమిషాలు నానబెట్టాలి. నానబెట్టిన ఎండు మిరపకాయలు, జీడిపప్పును మిక్సీ గిన్నెలో వేసి కొద్దిగా నీరు పోసి మెత్తని పేస్ట్‌లా గ్రైండ్ చేయండి. పేస్ట్ మరీ పలుచగా ఉండకూడదు.

-తర్వాత ఒక మందపాటి అడుగు కలిగిన పాన్‌లో కొబ్బరి నూనె వేడి చేశాక కరివేపాకు వేసి కొన్ని సెకన్ల పాటు వేయించండి. కరివేపాకు చిటపటలాడిన తర్వాత గ్రైండ్ చేసిన ఎర్ర కారం పేస్ట్, 1/4 కప్పు నీరు వేసి బాగా కలపండి. ఈ మిశ్రమాన్ని 3-4 నిమిషాలు లేదా నూనె పైకి తేలే వరకు ఉడికించండి.

ఇంట్లోనే రెస్టారెంట్ స్టైల్ చికెన్ లాలీపాప్స్..ఈజీగా ఇలా చేసుకోండి,ఖర్చు కూడా ఉండదు!

-మారినేట్ చేసిన చికెన్ ముక్కలు వేసి ఎర్ర కారం పేస్ట్‌ తో బాగా కలపండి. మసాలా చికెన్ ముక్కలన్నింటికీ సమానంగా పట్టేలా కలపాలి. మూత పెట్టి 20 నిమిషాలు లేదా చికెన్ పూర్తిగా ఉడికే వరకు ఉడికించండి. మధ్య మధ్యలో మూత తీసి కలుపుతూ ఉండటం వల్ల చికెన్ అన్ని వైపులా సమానంగా ఉడుకుతుంది. చికెన్ ఉడికిన తర్వాత దాని నుండి వచ్చే నీరు పూర్తిగా ఆవిరైపోవాలి, మసాలా చిక్కబడాలి.

-తర్వాత ఒక చిన్న పాన్‌ లో కొబ్బరి నూనె వేడి చేయండి. నూనె వేడెక్కిన తర్వాత ఎండు మిరపకాయలు వేసి అవి రంగు మారే వరకు వేయించండి. తర్వాత జీడిపప్పు వేసి అవి బంగారు రంగులోకి వచ్చే వరకు వేయించండి. చివరగా కరివేపాకు వేసి కొన్ని సెకన్ల పాటు వేయించండి.

-తయారుచేసిన తాలింపును చికెన్ ఉర్వాల్ మీద వేసి బాగా కలపండి. నెయ్యి వేసుకోవాలనుకుంటే ఈ సమయంలో వేడి చికెన్ మీద వేసి కలపవచ్చు. అంతే మంగళూరు స్టైల్ చికెన్ ఉర్వాల్ రెడీ. దీనిని అన్నం, రోటీ లేదా చపాతీతో వేడి వేడిగా ఆస్వాదించండి.