బలానికి, రుచికి తిరుగులేని బీట్‌ రూట్ హల్వా..ఎలా చేసుకోవాలంటే..

మన దేశంలో పండుగలు, శుభకార్యాలు లేదా ఇంట్లో ఏదైనా ప్రత్యేక సందర్భం వచ్చినప్పుడు స్వీట్ చేయడం ఆనవాయితీ. సాధారణంగా మనం రవ్వ కేసరి, సేమియా పాయసం లేదా క్యారెట్ హల్వా ఎక్కువగా చేస్తుంటాం. కానీ రంగులోనూ, రుచిలోనూ, పోషక విలువల్లోనూ ఎంతో విశిష్టమైనది బీట్‌ రూట్ హల్వా.

పిల్లలు సాధారణంగా బీట్‌రూట్ తినడానికి మారాం చేస్తారు కానీ దానిని హల్వా రూపంలో ఇస్తే లొట్టలేసుకుంటూ తింటారు. బీట్‌ రూట్‌ ను సూపర్ ఫుడ్ అని పిలుస్తారు. హల్వా రూపంలో తీసుకున్నా కూడా అందులోని ఫైబర్, కొన్ని విటమిన్లు మనకు అందుతాయి. నోరూరించే బీట్ రూట్ హల్వా ఇంట్లోనే ఈజీగా ఎలా తయారుచేసుకోవాలో ఇక్కడ చూడండి.

కావలసిన పదార్థాలు
బీట్‌రూట్: 2 పెద్దవి
కాచి చల్లార్చిన లేదా పచ్చి పాలు: 500 మి.లీ
చక్కెర: 1 కప్పు (150-200 గ్రా)
నెయ్యి: 4-5 టేబుల్ స్పూన్లు
యాలకుల పొడి: అర టీస్పూన్
జీడిపప్పు: 10-15
బాదం: 10
కిస్మిస్: 10-15
కోవా: 50 గ్రాములు

తయారీ విధానం

-ముందుగా బీట్‌ రూట్‌ లను శుభ్రంగా కడిగి, పైన చెక్కు తీసేయాలి. తర్వాత వాటిని సన్నగా తురుముకోవాలి. తురుము మరీ సన్నగా కాకుండా, మరీ లావుగా కాకుండా మధ్యస్థంగా ఉంటే హల్వా టెక్చర్ బాగుంటుంది.

-ఇప్పుడు స్టవ్ వెలిగించి, ఒక మందపాటి కడాయి లేదా పాన్ పెట్టుకోండి. అందులో 2 స్పూన్ల నెయ్యి వేసి వేడెక్కాక జీడిపప్పు, బాదం వేసి దోరగా వేయించాలి. ఇవి సగం వేగాక కిస్మిస్ వేసి, అవి ఉబ్బిన తర్వాత తీసి పక్కన పెట్టుకోవాలి.

-అదే కడాయిలో మిగిలిన నెయ్యిలో బీట్‌ రూట్ తురుమును వేయాలి. మంటను మీడియంలో పెట్టి సుమారు 5-8 నిమిషాల పాటు వేయించాలి. ఇలా నేతిలో వేయించడం వల్ల బీట్‌ రూట్‌ కు ఉండే పచ్చి వాసన పోయి, కమ్మటి వాసన వస్తుంది.

-బీట్‌ రూట్ వేగిన తర్వాత, అందులో పాలు పోయాలి. చిక్కటి పాలు వాడితే కోవా వేయకపోయినా రుచి బాగుంటుంది. పాలు, బీట్‌ రూట్ తురుమును బాగా కలిపి, మూత పెట్టి మీడియం మంటపై ఉడికించాలి. మధ్యమధ్యలో కలుపుతూ ఉండాలి. పాలు మొత్తం ఇగిరిపోయి, బీట్‌రూట్ మెత్తగా ఉడికేంత వరకు సుమారు 15-20 నిమిషాలుఉడికించాలి.

-పాలు పూర్తిగా ఇగిరిపోయిన తర్వాత చక్కెర వేయాలి. చక్కెర వేసాక మిశ్రమం మళ్ళీ పల్చబడుతుంది..నీరు ఊరుతుంది. ఇప్పుడు మంటను సిమ్ లో పెట్టి ఆ నీరంతా ఆవిరైపోయి హల్వా దగ్గర పడేంత వరకు కలుపుతూ ఉండాలి.

-హల్వా పాన్ నుండి వేరుపడుతున్నప్పుడు ఒక స్పూన్ నెయ్యి, యాలకుల పొడి వేసి బాగా కలపాలి. మీకు కోవా అందుబాటులో ఉంటే, ఈ దశలో వేసి కలపవచ్చు. ఇది హల్వాకు రిచ్ టేస్ట్‌ని ఇస్తుంది.

-చివరగా ముందుగా వేయించి పెట్టుకున్న డ్రై ఫ్రూట్స్ (జీడిపప్పు, బాదం, కిస్మిస్) వేసి కలిపి స్టవ్ ఆఫ్ చేయాలి. అంతే వేడివేడి, ఎర్రటి రంగులో మెరిసిపోయే బీట్‌ రూట్ హల్వా రెడీ.