Palak Khichdi: పాలకూర కిచిడి.. రుచితో పాటు ఆరోగ్యం కూడా.. సింపుల్‌గా ఎలా చేసుకోవాలంటే?

పాలకూర తింటే ఆరోగ్యానికి ఎంతో మేలు జరుగుతుంది. ఇందులో విటమిన్స్‌తో పాటు మినరల్స్, పోషకాలు పుష్కలంగా లభిస్తాయి. దీనిని తినడం వల్ల కంటి ఆరోగ్యం మెరుగవడంతో పాటు రోగ నిరోధక శక్తి కూడా పెరుగుతుంది. అలాంటి పాలకూరతో కిచిడి చేస్తే రుచి అద్భుతంగా ఉంటుంది. ఆరోగ్యానికి కూడా ఎంతగానో మేలు జరుగుతుంది. ఈ కిచిడీని పిల్లలు కూడా ఎంతో ఇష్టంగా తింటారు. వారికి కూడా పోషకాహారం లభించినట్లు అవుతుంది. అయితే ఈ పాలకూర కిచిడి ఎలా చేసుకోవాలి? దానికి కావాల్సిన పదార్థాలు ఏంటి అనేది ఈ స్టోరీలో తెలుసుకుందాం.

పాలకూర కిచిడీ తయారీకి కావాల్సిన పదార్థాలు

1. మూడు మీడియం సైజ్ పాలకూర కట్టలు
2. ఒక కప్పు బియ్యం
3. ఒక కప్పు పెసర పప్పు
4. రెండు టేబుల్ స్పూన్ల నెయ్యి
5. ఒక టేబుల్ స్పూన్ పసుపు
6. ఒక టేబుల్ స్పూన్ నూనె
7. సన్నగా తరిగిన మూడు వెల్లుల్లి రెబ్బలు
8. రెండు ఎండుమిర్చి
9. సన్నగా తరిగిన మూడు పచ్చి మిర్చి
10. ఒక టీస్పూన్ జీలకర్ర
11. టేబుల్ స్పూన్ ఉల్లిపాయ తరుగు
12. గుప్పెడు కరివేపాకులు
13. మూడు కప్పుల నీరు
14. రుచికి సరిపడా ఉప్పు

పాలకూర కిచిడీ తయారీ విధానం

ఈ పాలకూర కిచిడీ తయారు చేసుకోవడానికి ఒక అరగంట ముందు ఒక కప్పు బియ్యం, ఒక కప్పు పెసర పప్పును వేరు నానబెట్టుకోవాలి. అలాగే పాలకూర ఆకులను మెత్తగా గ్రైండ్ చేసుకోవాలి. ఇప్పుడు ఒక ప్రెషర్ కుక్కర్‌లో బియ్యం, పెసరపప్పు, రెండు కప్పుల నీరు, చిటికెడు పసుపు వేసుకొని మూత పెట్టుకొని రెండు విజిల్స్ వచ్చేంత వరకు ఉడికించుకోవాలి.

ఇప్పుడు స్టవ్ ఆన్ చేసి దానిపై ఒక కడాయి పెట్టి అందులో నెయ్యి, నూనె వేసుకొని వేడి చేసుకోవాలి. నూనె వేడయ్యాక అందులోనే రెండు ఎండుమిర్చి, సన్నగా తరిగిన వెల్లుల్లి, జీలకర్ర, సన్నగా తరిగిన పచ్చిమిర్చి వేసుకోవాలి. వెల్లుల్లి గోల్డెన్ కలర్‌లో మారిన తరువాత అందులో ఉల్లిపాయ తరుగు ముక్కలను వేసుకోవాలి. ఉల్లిపాయలు మెత్తబడ్డాక అందులోనే కరివేపాకులను కూడా వేసుకోవాలి.

ఇప్పుడు అందులో పాలకూర పేస్ట్‌ను వేసుకోవాలి. ఆ తరువాత అందులోనే పచ్చి వాసన పోయేవరకు వేయించుకోవాలి. ఆ తరువాత పాలకూర మిశ్రమంలో ఉడికించుకున్న అన్నం, పెసరపప్పు ముద్దను కూడా వేసుకోవాలి. అందులో అరకప్పు వేడి నీరు పోసుకొని, మీడియం మంట మీద కాసేపు ఉడికించుకోవాలి. కిచిడి కాసేపు ఉడికిన తరువాత దానిపై ఒక టీస్పూన్ నెయ్యి పోసుకొని.. ఇంకో నిమిషం పాటు ఉడికించుకుని దించుకుంటే పాలకూర కిచిడి సిద్ధమైనట్లే. ఇది ఎంతో రుచికరంగా, ఎంతో ఆరోగ్యంగా ఉంటుంది.