కంచంలో దేశభక్తి..నోరూరించే మువ్వన్నెల ఇడ్లీ తయారీ ఇలా!

రిపబ్లిక్ డే అనగానే మనకు గుర్తొచ్చేది మువ్వన్నెల జెండా, దేశభక్తి గీతాలు, సంబరాలు. ఈ ప్రత్యేక దినోత్సవాన్ని మరింత ఆనందంగా, ఆరోగ్యకరంగా జరుపుకోవడానికి మీ వంటగదిలో కూడా దేశభక్తిని చాటుకోవచ్చు. అదే ట్రై కలర్ ఇడ్లీ లేదా తిరంగా ఇడ్లీ.

కృత్రిమ రంగులు వాడకుండా, ప్రకృతి సిద్ధమైన కూరగాయలతో ఈ ఇడ్లీలను తయారు చేయడం వల్ల కంటికి ఇంపుగా ఉండటమే కాకుండా ఆరోగ్యానికి ఎంతో మేలు జరుగుతుంది. ఈ ఇడ్లీలు మన జాతీయ జెండాలోని మూడు రంగులను (కాషాయం, తెలుపు, ఆకుపచ్చ) ప్రతిబింబిస్తాయి. ట్రై కలర్ ఇడ్లీ ఎలా తయారుచేసుకోవాలో ఇక్కడ చూడండి.

కావాల్సిన పదార్థాలు
ఇడ్లీ పిండి: 4 కప్పులు (మినపప్పు, ఇడ్లీ రవ్వ కలిపి రుబ్బినది)
ఉప్పు: రుచికి సరిపడా
క్యారెట్లు: 2
ఎండుమిర్చి: 2
పాలకూర: 1 కట్ట
పచ్చిమిర్చి: 2
అల్లం: చిన్న ముక్క
జీలకర్ర: అర టీస్పూన్

తయారీ విధానం

-ముందుగా మినపప్పు, ఇడ్లీ రవ్వను సాంప్రదాయ పద్ధతిలో నానబెట్టి, రుబ్బి, పులియబెట్టిన ఇడ్లీ పిండిని సిద్ధం చేసుకోండి. ఈ పిండిని మూడు సమాన భాగాలుగా వేర్వేరు గిన్నెల్లోకి తీసుకోండి. రుచికి సరిపడా ఉప్పు కలపండి.

-క్యారెట్లను శుభ్రం చేసి, చిన్న ముక్కలుగా కట్ చేసుకోండి. వీటిని మెత్తగా ఉడికించుకోండి లేదా ఆవిరిపై ఉంచండి.

-ఉడికించిన క్యారెట్ ముక్కలను మిక్సీ జార్‌ లో వేసి మెత్తటి పేస్ట్‌ లా గ్రైండ్ చేయండి. అవసరమైతే కొంచెం నీరు చేర్చండి.

-ఈ క్యారెట్ పేస్ట్‌ ను మొదటి భాగం ఇడ్లీ పిండిలో వేసి బాగా కలపండి. ఇప్పుడు మీకు సహజమైన కాషాయ రంగు పిండి రెడీ అవుతుంది.

-తర్వాత పాలకూర ఆకులను వేడి నీటిలో 2 నిమిషాలు ఉంచి, వెంటనే చల్లటి నీటిలో వేయండి. తర్వాత మిక్సీ జార్‌ లో ఈ పాలకూర, పచ్చిమిర్చి, అల్లం, జీలకర్ర వేసి మెత్తటి పేస్ట్‌ లా రుబ్బుకోండి. ఈ ఆకుపచ్చ పేస్ట్‌ ను రెండవ భాగం ఇడ్లీ పిండిలో వేసి బాగా కలపండి. ఇప్పుడు ఆకుపచ్చ రంగు పిండి రెడీ.

-మూడవ భాగం పిండిని అలాగే ఉంచండి. ఇది తెలుపు రంగు కోసం.

-ఇప్పుడు ఇడ్లీ ప్లేట్‌ కు నూనె లేదా నెయ్యి రాసి మొదట కొంచెం కాషాయ రంగు పిండి, దాని పక్కన తెలుపు రంగు పిండి, దాని పక్కన ఆకుపచ్చ రంగు పిండిని స్పూన్‌ తో జాగ్రత్తగా వేయండి. ఇలా ఒకే ఇడ్లీలో మూడు రంగులు వస్తాయి.

-ఇడ్లీ కుక్కర్‌ లో నీళ్లు పోసి ప్లేట్లు పెట్టి 10 నుండి 12 నిమిషాల పాటు ఆవిరిపై ఉడికించండి. వేడి వేడి ట్రై కలర్ ఇడ్లీలు రెడీ.