పైన క్రిస్పీ..లోపల సాఫ్ట్ ఆలూ స్టఫింగ్..లొట్టలేయించే రాజస్థానీ స్పెషల్ మిర్చి వడ

చల్లని సాయంత్రం వేళ వేడి వేడి టీ లేదా కాఫీతో పాటు ఏదైనా కారంగా, రుచికరంగా తినాలని ఎవరికి ఉండదు చెప్పండి? సాధారణంగా మనం బజ్జీలు, పకోడీలు వేసుకుంటాం. కానీ ఈసారి కాస్త కొత్తగా, మరింత రుచికరంగా ఏదైనా ప్రయత్నించాలనుకుంటే రాజస్థానీ మిర్చి వడ బెస్ట్ ఆప్షన్.

రాజస్థాన్ రాష్ట్రంలోని జోధ్‌ పూర్ వీధుల్లో అత్యంత ప్రజాదరణ పొందిన ఈ స్నాక్.. పైన క్రిస్పీగా, లోపల మెత్తని బంగాళాదుంప మసాలాతో అద్భుతమైన రుచిని ఇస్తుంది. సాధారణ మిరపకాయ బజ్జీలా కాకుండా ఇందులో ఉండే స్పెషల్ ఆలూ స్టఫింగ్ దీనిని మరింత ఆకర్షణీయంగా మారుస్తుంది. జోధ్‌ పూర్ స్పెషల్ మిర్చి వడ మీ ఇంట్లోనే సులభంగా ఎలా తయారు చేసుకోవాలో ఇక్కడ చూడండి.

కావలసిన పదార్థాలు
పెద్ద బంగాళాదుంపలు - 2
పచ్చిమిర్చి - 1
అల్లం పేస్ట్ - అర టేబుల్ స్పూన్
ధనియాలు - 1 టేబుల్ స్పూన్
సోంపు - అర టేబుల్ స్పూన్
కాశ్మీరీ ఎర్ర కారం - ముప్పావు టేబుల్ స్పూన్
చాట్ మసాలా - అర టేబుల్ స్పూన్
ఆమ్చూర్ (మామిడి పొడి) - అర టేబుల్ స్పూన్
వాము - పావు టేబుల్ స్పూన్
ఇంగువ - చిటికెడు
కొత్తిమీర - 2 టేబుల్ స్పూన్లు
ఉప్పు - రుచికి సరిపడా
పెద్ద మిరపకాయలు (బజ్జీ మిర్చి) - 8
శనగ పిండి - 1 కప్పు
బియ్యం పిండి - 2 టేబుల్ స్పూన్లు
పసుపు - పావు టీస్పూన్
కారం - అర టీస్పూన్
బేకింగ్ సోడా - పావు టీస్పూన్
నీరు - తగినంత
నూనె - డీప్ ఫ్రైకి సరిపడా

తయారీ విధానం

-ముందుగా ఒక గిన్నెలో ఉడికించి మెదిపిన బంగాళాదుంప మిశ్రమాన్ని తీసుకోండి. ఇందులో ధనియాలు, సోంపు, పచ్చిమిర్చి, అల్లం పేస్ట్, కారం, చాట్ మసాలా, ఆమ్చూర్ పొడి, వాము, ఇంగువ, కొత్తిమీర, రుచికి సరిపడా ఉప్పు వేసి బాగా కలపండి.

-బజ్జీ కోసం వాడే పెద్ద మిరపకాయలను తీసుకొని శుభ్రం చేయండి. వాటిని మధ్యలో నిలువుగా చీల్చి, లోపల ఉన్న విత్తనాలను తీసివేయండి.

-ఇప్పుడు ముందుగా తయారు చేసుకున్న ఆలూ మసాలాను మిరపకాయల లోపల సమానంగా, నిండుగా స్టఫ్ చేయండి.

-ఇప్పుడు ఒక వెడల్పాటి గిన్నెలో శనగ పిండి, బియ్యం పిండి, పసుపు, కారం, బేకింగ్ సోడా, ఉప్పు తీసుకోండి. కొద్ది కొద్దిగా నీరు పోస్తూ పిండిని ఉండలు లేకుండా కలుపుకోవాలి. పిండి చిక్కగా దోశ పిండిలా ఉండాలి.

-ఇప్పుడు స్టవ్ వెలిగించి కడాయిలో నూనె వేడి చేయండి. నూనె కాగాక, స్టఫ్ చేసిన మిరపకాయను పిండి మిశ్రమంలో ముంచి, మిరపకాయకు పిండి అంతా బాగా పట్టేలా చూసి నూనెలో నెమ్మదిగా వదలండి.

-మంటను మీడియంలో ఉంచి, వడలు బంగారు గోధుమ రంగులోకి వచ్చి క్రిస్పీగా మారేంత వరకు వేయించండి. ఆ తర్వాత టిష్యూ పేపర్ మీదకు తీసుకోండి.

-అంతే వేడి వేడి మిర్చి వడ రెడీ. వీటిని పుల్లపుల్లని చింతపండు చట్నీ లేదా గ్రీన్ చట్నీతో తింటే సూపర్ ఉంటుంది.