బ్రేక్ ఫాస్ట్ కైనా, డిన్నర్ కైనా.. స్టఫ్డ్ పనీర్ కుల్చా చాలా ఈజీగా చేసుకోండిలా..వేళ్లు చప్పరిస్తూ తింటారు!

ఉదయం వేడివేడిగా బ్రేక్ ఫాస్ట్ తినాలన్నా లేదా రాత్రి పూట త్వరగా డిన్నర్ ముగించాలన్నా కుల్చా బెస్ట్ ఛాయిస్. నేటి ఉరుకులు పరుగుల జీవితంలో పిండి కలిపి, కుల్చాలు చేసే సమయం ఉండకపోవచ్చు. అందుకే మార్కెట్లో దొరికే రెడీమేడ్ కుల్చాలతో ఎంతో సులభంగా, రుచికరంగా చేసుకోగలిగే స్టఫ్డ్ పనీర్ కుల్చా మీ ఇంట్లోనే ఎలా చేసుకోవాలో ఇక్కడ చూడండి. ఆరోగ్యంపై శ్రద్ధ ఉన్నవారు మైదాకు బదులుగా గోధుమ పిండి కుల్చాలను కూడా ఎంచుకోవచ్చు. ఈ పనీర్ కుల్చా రుచి చూశారంటే.. పిల్లలైనా, పెద్దలైనా సరే వేళ్లు చప్పరిస్తూ తినాల్సిందే.

స్టఫ్డ్ పనీర్ కుల్చా తయారీ విధానం

-ముందుగా మీకు ఇష్టమైన బ్రాండ్ రెడీమేడ్ కుల్చాలను మార్కెట్ నుండి తెచ్చుకోండి. మీ ఆరోగ్య ప్రాధాన్యతను బట్టి గోధుమ పిండి లేదా మైదా పిండి కుల్చాలను వాడొచ్చు. ఒక ప్యాకెట్‌ లో సాధారణంగా 4 నుండి 5 కుల్చాలు ఉంటాయి. కుల్చాలు సిద్ధంగా ఉన్నాక, ఈ రెసిపీలో అసలైన మ్యాజిక్ అంతా స్టఫింగ్‌ లోనే ఉంటుంది.

-పనీర్ కుల్చా లోపల పెట్టే స్టఫింగ్ కోసం.. ముందుగా ఒక క్యాప్సికమ్, ఒక టమాటో, ఒక ఉల్లిపాయను తీసుకుని చాలా సన్నని ముక్కలుగా తరిగి పెట్టుకోండి. అలాగే కొద్దిగా స్వీట్ కార్న్ (మొక్కజొన్న గింజలు), మీ కారానికి సరిపడా ఒకటి లేదా రెండు పచ్చిమిర్చి, కొత్తిమీరను కూడా తరిగి పక్కన పెట్టుకోవాలి.

-ఇప్పుడు స్టవ్ వెలిగించి ఒక పాన్ పెట్టుకోండి. అందులో కేవలం ఒక టీస్పూన్ నూనె వేయండి. నూనె వేడెక్కాక ముందుగా తరిగి పెట్టుకున్న ఉల్లిపాయ, క్యాప్సికమ్, టమాటో ముక్కలతో పాటు స్వీట్ కార్న్ వేసి మంటను హై ఫ్లేమ్‌ లో ఉంచి బాగా వేయించండి. ఇప్పుడు ఇందులో రుచికి సరిపడా ఉప్పు, కొద్దిగా కారం, మిరియాల పొడి, చిటికెడు పసుపు, అర టీస్పూన్ ధనియాల పొడి, మంచి సువాసన కోసం కొద్దిగా ఒరేగానో వేసి బాగా కలపండి.

-కూరగాయల మిశ్రమం కొద్దిగా వేగాక, అందులో తురిమిన పనీర్ లేదా చేత్తో చిదిమిన పనీర్‌ను వేయండి. దీనిని పనీర్ భుర్జీ లాగా బాగా కలిపి స్టవ్ ఆపేయండి. ఈ మిశ్రమం కొద్దిగా చల్లారిన తర్వాత, అందులో సన్నగా తరిగిన కొత్తిమీర ఆకులు, కొద్దిగా టొమాటో సాస్ వేసి కలపాలి. అంతే ఎంతో రుచికరమైన పనీర్ కుల్చా స్టఫింగ్ రెడీ.

రుచికి రుచి, ఆరోగ్యానికి ఆరోగ్యం.. ఉదయం బ్రేక్‌ ఫాస్ట్‌ లోకి సొరకాయ దోశ..అప్పటికప్పుడు ఈజీగా చేసుకోండిలా..

-చివరిగా ఒక కుల్చాను తీసుకుని దానిపై కొద్దిగా సెజ్జ్వాన్ చట్నీ లేదా టొమాటో సాస్ రాయండి. మీ దగ్గర పుదీనా గ్రీన్ చట్నీ లేదా చిల్లీ సాస్ ఉన్నా వాడొచ్చు. పిల్లల కోసం అయితే కొద్దిగా మయోన్నైస్ రాస్తే మరింత ఇష్టంగా తింటారు. ఇప్పుడు ముందుగా సిద్ధం చేసుకున్న పనీర్ స్టఫింగ్‌ ను కుల్చా అంతటా సమానంగా పరచండి. దీనిపై మరో కుల్చాను ఉంచి, స్టఫింగ్ బయటకు రాకుండా రెండు చేతులతో మెల్లగా నొక్కండి.

-ఇప్పుడు స్టవ్ పై పెనం పెట్టి, కుల్చాకు రెండు వైపులా కొద్దిగా వెన్న రాసి, గరిటెతో మెల్లగా నొక్కుతూ దోరగా కాల్చుకోండి. లేదా కుల్చాను మధ్యలోకి కట్ చేసి శాండ్‌విచ్ మేకర్‌ లో కూడా బేక్ చేయవచ్చు. ఈ పద్ధతిలో కుల్చా చాలా తక్కువ నూనెతో క్రిస్పీగా ఉడుకుతుంది.

-అంతే ఎంతో రుచికరమైన వేడివేడి స్టఫ్డ్ పనీర్ కుల్చా రెడీ.