తక్కువ మటన్‌ తో ఎక్కువ గ్రేవీ..రుచిలో అదిరిపోయే తెలంగాణ ప్రాచీన వంటకం మటన్ దప్పలం

వీకెండ్ ఎప్పుడొస్తుందా? మటన్ ఎప్పుడు తిందామా? అని ఎదురుచూసేవాళ్లు చాలామందే ఉంటారు. అయితే ప్రతివారం ఒకేరకమైన మటన్ కర్రీలు తిని బోర్ కొట్టేసిందా? అయితే ఈసారి తెలంగాణ ప్రాచీన వంటకం మటన్ దప్పలం ట్రై చేసి చూడండి. టేస్ట్ అదిరిపోతుంది.

తక్కువ మటన్ తెచ్చుకున్నా ఎక్కువ కూర అయ్యేలా చాలా సింపుల్ మసాలాలు వేసి చేసినా కానీ మంచి ఫ్లేవర్ తో ఎంతో రుచిగా ఉండే తెలంగాణ సంప్రదాయ వంటకం మటన్ దప్పలం ఎలా తయారుచేసుకోవాలో ఇక్కడ చూడండి. అన్నం, జొన్న రొట్టె, రాగి సంగటి వేటితో కలిపి తిన్నా అద్బుతంగా ఉంటుంది.

మటన్ దప్పలం తయారీకి కావాల్సిన పదార్థాలు

-బోన్ తో కూడిన మటన్
-యాలకలు
-లవంగాలు
-ఎండుకొబ్బరి
-బియ్యం
-దాల్చిన చెక్క
-జీలకర్ర
-ధనియాలు
-పుదీనా
-పసుపు
-టమాటో
-ఉప్పు
-అల్లంవెల్లుల్లి పేస్ట్
-ఉల్లిపాయలు
-పచ్చిమిర్చి

మటన్ దప్పలం తయారీ విధానం

-మటన్ దప్పలం తయారుచేసుకోడానికి ముందుగా మసాలా ప్రిపేర్ చేసుకోవాలి. ఇందుకోసం ఒక గిన్నెలో 4 యాలకలు, 4 లవంగాలు, చిన్న ఎందు కొబ్బరి ముక్కలు 3 టేబుల్ స్పూన్త ధనియాలు, కొద్దిగా దాల్చిన చెక్క, 1 టస్పూన్ జీలకర్ర, 2 టేబుల్ స్పూన్ల బియ్యం వేసి,ఇందులోనే కొన్ని నీళ్లు పోసి అరగంటసేపు వీటిని నానబెట్టుకోవాలి. ఈ సంప్రదాయ వంటకంలో జీడిపప్పు, గసగసాలు వంటివి ఏమీ వేయకుండా గ్రేవీ కొంచెం చిక్కగా రావడం కోసం బియ్యం వేస్తారు.

-తర్వాత అర కిలో బోన్ తో ఉండే మటన్ ముక్కలను శుభ్రంగా కడగాలి.

-స్టవ్ మీద కుక్కర్ పెట్టి అందులో కడిగిన మటన్ ముక్కలను వేసి,ఇందులోనే పావు స్పూన్ పసుపు, అర స్పూన్ ఉప్పు, 1 స్పూన్ అల్లంవెల్లుల్లి పేస్ట్ వేసి మటన్ ముక్కలు మునిగేవరకు నీళ్లు పోసి కుక్కర్ మూత పెట్టి తక్కువ మంట మీద 4 విజిల్ప్ రానివ్వాలి. ఒక వేళ మీరు తీసుకున్నది ముదురు మటన్ అయితే మరో 2 విజిల్స్ రానివ్వండి. మటన్ నుంచి బోన్ సపరేట్ అయ్యేవరకు ఉడికించుకోవాలి. తర్వాత ఈ మొత్తాన్ని నీటితో సహా ఒక గిన్నెలోకి తీసి పక్కన పెట్టుకోండి.

-ఇప్పుడు అరగంట సేపు నానబెట్టుకున్న మసాలా దినుసులన్నింటిని నీటితో సహా మిక్సీ గిన్నెలో వేసి చాలా మెత్తని పేస్ట్ లా గ్రైండ్ చేసుకొని పక్కన పెట్టుకోండి.

-ఇప్పుడు స్టవ్ మీద కుక్కర్ పెట్టి అందులో 5-6 టేబుల్ స్పూన్ల వంట నూనె వేసి వేడి చేసి అందులో సన్నగా కట్ చేసిన 3 మీడియం సైజ్ ఉల్లిపాయ ముక్కలు, 5 పచ్చిమిరపకాయల సన్నని ముక్కలు, కొద్దిగా పుదీనా వేసి మీడియం మంట మీద కలుపుతూ వేయిచాలి. తెలంగాణ సంప్రదాయ వంటకం కాబట్టి ఇందులో కరివేపాకు వేయరు. ఇందులోనే 1 స్పూన్ ఉప్పు వేసి ఉల్లిపాయలు గోల్డెన్ బ్రౌన్ కలర్ లోకి వచ్చేవరకు వేయించాలి.

-ఇప్పుడు అందులో సన్నగా కట్ చేసిన 1 టమాటో ముక్కలు వేసి మూతపెట్టి నెమ్మదిగా మగ్గనివ్వాలి. తర్వాత అందులో కొంచెం అల్లంవెల్లుల్లి పేస్ట్ వేసి పచ్చివాసన పోయేదాకా వేయించాలి.

-ఇప్పుడు అందులో 3 టేబుల్ స్పూన్ల కారం వేసి వేయించుకున్నాక ఉడికించి పెట్టుకున్న మటన్ ను నీళ్లతో పాటుగా ఇందులో వేసుకోవాలి. ఈ కూర పులుసులా ఉంటుంది కాబట్టి నీళ్లు కొంచెం ఎక్కువే పడతాయి. అందుకే మటన్ ఉడకించిన నీళ్లన్నీ వేసుకోవాలి.ఇప్పుడు అందులోనే గ్రైండ్ చేసుకున్న మసాలా పేస్ట్ కూడా వేసి ఒకసారి కలిపి మూతపెట్టి 1 విజిల్ వచ్చేవరకు ఉడికించుకోవాలి.

-ఈ కూర టేస్ట్ బ్యాలెన్స్ అవ్వడానికి తెలంగాణలోని కొన్ని ప్రాంతాలవాళ్లు కొద్దిగా చింతపండు పులుసు కూడా వేస్తుంటారు. మీకు అలా కావాలనుకుంటే వేసుకోవచ్చె.

-1 విజిల్ వచ్చేవరకు ఉడికించిన తర్వా స్టవ్ ఆపేయండి. అంతే మటన్ దప్పలం రెడీ.