ఘుమఘుమలాడే గరం మసాలా..ఇంట్లోనే ఈజీగా తయారు చేసుకోండిలా

భారతీయ వంటగదిలో మసాలా దినుసులకు చాలా ప్రత్యేకమైన స్థానం ఉంది. మన వంటకాల రుచి, సువాసన ప్రపంచవ్యాప్తంగా ప్రసిద్ధి చెందడానికి ప్రధాన కారణం మనం వాడే ఈ మసాలాలే. వీటిలో గరం మసాలా రారాజు అని చెప్పవచ్చు. గరం అంటే వేడి అని, మసాలా అంటే దినుసుల మిశ్రమం అని అర్థం.

ఆయుర్వేదం ప్రకారం ఈ మసాలా శరీరంలో వేడిని పుట్టించి, జీవక్రియను మెరుగుపరుస్తుంది కాబట్టి దీనికి ఆ పేరు వచ్చింది. మార్కెట్లో దొరికే ప్యాకెట్ మసాలాల కంటే ఇంట్లో తయారు చేసుకున్న గరం మసాలా తాజాదనంతో పాటు ఎక్కువ ఆరోగ్యాన్ని, రుచిని ఇస్తుంది. ఇంట్లోనే గరం మసాలా తయారుచేసుకోడానికి కావాల్సిన పదార్థాలు,తయారీ విధానం ఇక్కడ చూడండి.

కావలసిన పదార్థాలు
ధనియాలు: అర కప్పు (50 గ్రా)
జీలకర్ర: పావు కప్పు
యాలకులు: 25
నల్ల యాలకులు: 5
లవంగాలు: 1 టేబుల్ స్పూన్
మిరియాలు: 1 టేబుల్ స్పూన్
దాల్చిన చెక్క: 3 అంగుళాల ముక్కలు 4-5
బిర్యానీ ఆకులు: 4-5
అనాస పువ్వు: 2
జాజికాయ: చిన్న ముక్క
జాపత్రి: 2-3 రేకలు
సోంపు: 1 టీస్పూన్

తయారీ విధానం

-ముందుగా మసాలా దినుసులన్నింటినీ శుభ్రం చేసుకోవాలి. రాళ్లు, మట్టి లేకుండా చూసుకోవాలి.

-ఇప్పుడు స్టవ్ మీద మందపాటి బాండీ పెట్టి మంటను చాలా తక్కువలో ఉంచాలి. ముందుగా ధనియాలను వేసి 1-2 నిమిషాలు దోరగా వేయించి పక్కన పెట్టుకోవాలి.

-తర్వాత దాల్చిన చెక్క, నల్ల యాలకులు, అనాస పువ్వు, మిరియాలు, లవంగాలు వేసి వేయించాలి.

-చివరగా త్వరగా వేగిపోయే జీలకర్ర, పచ్చ యాలకులు, జాపత్రి, బిర్యానీ ఆకులను వేసి, సువాసన వచ్చే వరకు సుమారు 1 నిమిషం వేయించాలి. దినుసులను మాడనివ్వకూడదు. మాడితే మసాలా చేదుగా మారుతుంది. కేవలం వాటిలోని తేమ పోయి, నూనెలు బయటకు వచ్చేలా వేడెక్కితే చాలు.

-జాజికాయను వేయించాల్సిన అవసరం లేదు, దాన్ని చిన్న ముక్కలుగా చేసి నేరుగా గ్రైండర్ లో వేయవచ్చు.

-వేయించిన దినుసులన్నింటినీ ఒక ప్లేట్ లోకి తీసుకుని పూర్తిగా చల్లారనివ్వాలి.

-చల్లారిన దినుసులను మిక్సీ జార్ లో వేసి మెత్తని పౌడర్ లా గ్రైండ్ చేసుకోవాలి. మధ్యలో ఆపి స్పూన్ తో కలుపుతూ గ్రైండ్ చేస్తే పొడి మెత్తగా వస్తుంది.

-మీకు బాగా మెత్తని పొడి కావాలంటే జల్లెడ పట్టవచ్చు. కాస్త బరకగా ఉంటేనే కూరల్లో రుచి బాగుంటుంది అనిపిస్తే అలాగే ఉంచేయొచ్చు.

-తయారైన గరం మసాలాను గాలి చొరబడని గాజు సీసాలో నిల్వ చేసుకోవాలి. తడి తగలనివ్వకూడదు. ఇలా చేస్తే 3 నుండి 6 నెలల వరకు సువాసన పోకుండా ఉంటుంది.