చపాతీ, దోశల్లోకి అమృతం లాంటి ఉల్లి కారం..ఎలా చేసుకోవాలంటే..

వేడి వేడి చపాతీలు లేదా కరకరలాడే దోశలలోకి నంజుకోవడానికి ఏ కూర చేయాలో తెలియక సతమతమవుతున్నారా? ఫ్రిజ్ తీసి చూస్తే కూరగాయలేవీ లేవా? కేవలం ఉల్లిపాయలు మాత్రమే కనిపిస్తున్నాయా? మీ దగ్గర ఉన్న ఆ ఉల్లిపాయలతోనే ఒక అద్భుతమైన సైడ్ డిష్ తయారు చేసుకోవచ్చు.

ముఖ్యంగా మీ వంటింట్లో చిన్న ఉల్లిపాయలు(సాంబార్ ఉల్లిపాయలు) ఉంటే, వాటి రుచి గురించి ఎంత చెప్పినా తక్కువే. మామూలు పెద్ద ఉల్లిపాయల కంటే.. చిన్న ఉల్లిపాయలతో చేసే చట్నీ లేదా ఉల్లి కారం చాలా రుచిగా ఉంటుంది.

ఇది కేవలం చపాతీకే కాదు, ఇడ్లీ, దోశ, ఊతప్పం వంటి టిఫిన్లలోకి అమృతంలా ఉంటుంది. అన్నింటికంటే ముఖ్యంగా, ఆఫీస్ నుండి అలసిపోయి వచ్చినప్పుడు లేదా హడావిడి సమయాల్లో కేవలం 10-15 నిమిషాల్లో దీనిని తయారు చేసుకోవచ్చు. నోరూరించే చిన్న ఉల్లిపాయల కారం ఎలా తయారు చేసుకోవాలో, కావాల్సిన పదార్థాలు ఏమిటో ఇక్కడ చూడండి.

కావాల్సిన పదార్థాలు
చిన్న ఉల్లిపాయలు: 1 కప్పు
వెల్లుల్లి రెబ్బలు: 20
చింతపండు: అర టీస్పూన్
ఎండు మిరపకాయలు: 6
నువ్వుల నూనె: 3 టేబుల్ స్పూన్లు
ఉప్పు: రుచికి సరిపడా
నూనె: 1 టీస్పూన్
ఆవాలు: పావు టీస్పూన్
కరివేపాకు: ఒక రెమ్మ
కొత్తిమీర: చిటికెడు
పసుపు: చిటికెడు

తయారీ విధానం

-ముందుగా ఒక మిక్సీ జార్ తీసుకోండి. అందులో పొట్టు తీసి శుభ్రం చేసుకున్న చిన్న ఉల్లిపాయలు, వెల్లుల్లి రెబ్బలు,చింతపండు, ఎండు మిరపకాయలు, రుచికి సరిపడా ఉప్పు వేసి నీళ్ళు లేకుండానే దీనిని మెత్తని పేస్ట్‌ లా రుబ్బుకుని పక్కన పెట్టుకోండి.

-ఇప్పుడు స్టవ్ వెలిగించి ఒక పాన్ పెట్టుకోండి. అందులో నువ్వుల నూనె వేసి వేడి చేయండి. నూనె వేడయ్యాక అందులో మిక్సీ పట్టుకున్న ఉల్లిపాయ మిశ్రమాన్ని (పేస్ట్) వేసి తక్కువ మంట మీద కనీసం 10 నిమిషాల పాటు వేయించాలి.

-ఉల్లిపాయల్లోని పచ్చి వాసన పూర్తిగా పోయి, గ్రేవీ చిక్కబడి, నూనె పైకి తేలేంత వరకు వేయించాలి. పాన్ కు అంటుకోకుండా మిశ్రమం దగ్గర పడ్డాక స్టవ్ ఆఫ్ చేయండి.

-ఇప్పుడు చిన్న పాన్ లో ఒక స్పూన్ నూనె వేడి చేసి, ఆవాలు వేయండి. అవి చిటపటలాడాక కరివేపాకు, చిటికెడు పసుపు వేసి వేయించండి. ఈ వేడి వేడి తాలింపును ముందుగా సిద్ధం చేసుకున్న ఉల్లిపాయ చట్నీలో వేసి బాగా కలపండి. చివరగా కొంచెం కొత్తిమీర చల్లుకోండి.

-అంతే ఎంతో రుచికరమైన, ఘాటైన చిన్న ఉల్లిపాయల కారం రెడీ.

-ఈ చట్నీలో నీళ్ళు వాడలేదు కాబట్టి,నూనెలో బాగా వేయించాం కాబట్టి ఇది త్వరగా పాడవదు. బయట ఉంచితే 3 రోజుల వరకు నిల్వ ఉంటుంది. ఫ్రిజ్ లో ఉంచితే దాదాపు 10 రోజుల వరకు తాజాగా ఉంటుంది.