ఈ చిట్కాలు తెలిస్తే..కొబ్బరి బూరెలు పర్ఫెక్ట్ గా పొంగుతూ, మృదువుగా,రుచిగా వస్తాయి

పైన కరకరలాడుతూ, లోపల కొబ్బరి, బెల్లం కలయికతో మెత్తగా కరిగిపోయే కొబ్బరి బూరెలు చూస్తుంటేనే ఎవరికైనా నోరు ఊరిపోవాల్సిందే. మన తెలుగు లోగిళ్లలో పండుగ అనగానే గుర్తొచ్చే సాంప్రదాయక వంటకాల్లో బూరెలకు ఎప్పుడూ ప్రత్యేక స్థానమే ఉంటుంది.

పండుగలకైనా, ఇంట్లో ఏదైనా శుభకార్యం జరిగినప్పుడైనా లేదా కమ్మని స్వీట్ తినాలనిపించినప్పుడైనా చేసుకోదగ్గ అద్భుతమైన వంటకం ఇది. బూరెలు పర్ఫెక్ట్‌ గా, గుల్లగా, రుచిగా రావడానికి చిన్న చిన్న చిట్కాలు పాటించాల్సి ఉంటుంది. పర్ఫెక్ట్ కొబ్బరి బూరెలు ఎలా తయారుచేసుకోవాలో ఇక్కడ చూడండి.

కావలసిన పదార్థాలు

బియ్యం - 1 కేజీ
బెల్లం - 750 గ్రాములు
యాలకుల పొడి - 1 టేబుల్ స్పూన్
పచ్చి కొబ్బరి తురుము - 1 చిప్ప
నూనె - డీప్ ఫ్రైకి సరిపడా

ఇంట్లోనే అచ్చమైన స్వీట్ షాప్ స్టైల్ పాలకోవా..కేవలం రెండే పదార్థాలతో చేసుకోండిలా..
తయారీ విధానం

-ముందుగా రాత్రిపూట బియ్యాన్ని శుభ్రంగా కడిగి, తగినన్ని నీళ్లు పోసి రాత్రంతా నానబెట్టుకోవాలి. ఉదయాన్నే ఆ బియ్యాన్ని మరోసారి కడిగి, నీళ్లన్నీ పూర్తిగా వంపేయాలి.

-నీరు పూర్తిగా పోయాక బియ్యాన్ని మెత్తని పిండిలా (మిక్సీలో లేదా గిర్నీలో) పట్టించుకోవాలి. ఆ తర్వాత పిండిని జల్లెడ పట్టుకోవాలి. పిండి కాస్త తడిగా ఉండాలి. జల్లించిన తడి బియ్యప్పిండి ఆరిపోకుండా చేత్తో గట్టిగా అదిమిపెట్టి, పైన మూత పెట్టి పక్కన ఉంచుకోవాలి.

-ఇప్పుడు స్టవ్ మీద ఒక గిన్నె పెట్టి అందులో బెల్లం వేసి, అర కప్పు నీళ్లు పోసి బెల్లాన్ని పూర్తిగా కరిగించుకోవాలి. కరిగిన బెల్లం నీటిని దళసరిగా ఉండే పెద్ద గిన్నెలోకి వడకట్టుకోవాలి..నలకలు ఏమైనా ఉంటే పోతాయి. ఈ బెల్లం నీటిని లేత పాకం వచ్చే వరకు ఉడికించాలి. బూరెలు సాఫ్ట్ గా రావాలంటే పాకం సరైన పదునులో ఉండటం చాలా ముఖ్యం.

-పాకం సరైన పదునుకు రాగానే, అందులో పచ్చి కొబ్బరి తురుము వేసి ఒక 5 నిమిషాల పాటు ఉడికించాలి. ఆ తర్వాత స్టవ్ ఆఫ్ చేసి యాలకుల పొడి వేయాలి. ఇప్పుడు ముందుగా సిద్ధం చేసుకున్న తడి బియ్యప్పిండిని కొద్దికొద్దిగా పోస్తూ, ఉండలు కట్టకుండా గరిటెతో బాగా కలుపుకోవాలి. ఈ మిశ్రమాన్ని ఒక గంట పాటు పక్కన పెట్టుకోవచ్చు, లేదా అప్పటికప్పుడైనా బూరెలు వేసుకోవచ్చు.

-చేతికి కొద్దిగా నూనె రాసుకుని, పిండిని చిన్న చిన్న ఉండలుగా తీసుకుని మీకు ఇష్టమైన సైజులో బూరెల్లా ఒత్తుకోవాలి. స్టవ్ మీద కడాయిలో నూనె వేడి చేసి, ఒత్తి పెట్టుకున్న బూరెలను వేసి రెండు వైపులా బంగారు రంగు వచ్చే వరకు వేయించుకుని తీసుకోవాలి.

-అంతే ఎంతో రుచికరమైన, వేడివేడి కొబ్బరి బూరెలు రెడీ.