మీ స్నేహితుల్లో ఈ 4 లక్షణాలు ఉంటే వెంటనే దూరం పెట్టండి!

ప్రతి ఫ్రెండ్ మన జీవిత ప్రయాణంలో చివరిదాకా తోడురారు. కొందరు కేవలం ఒక అవసరం కోసం, ఒక దశ కోసం లేదా తమ సౌకర్యం కోసం మాత్రమే మనతో ఉంటారు. కానీ చాలామంది ఆ స్నేహాలను వదులుకోవడానికి భయపడతారు. గతం మీద ఉన్న మమకారం, ఒంటరిగా మిగిలిపోతామనే భయం వారిని ఆ బంధాల్లోనే బందీలను చేస్తాయి.

ఒక స్నేహాన్ని ముగించడం అంటే మనల్ని మనం చెడ్డవారిగా, నాటకీయంగా ఊహించుకోవడం లాంటిది. అందుకే నెమ్మదిగా బాధపడుతూనైనా సరే ఆ చెడ్డ స్నేహాలను అలాగే కొనసాగిస్తుంటారు. చాణక్యుడు చెప్పిన ఒక గొప్ప సత్యం ఇక్కడ గుర్తుచేసుకోవాలి. మీకు దగ్గరగా ఉన్నంత మాత్రాన వాళ్ళు మీకు మంచివారు అయిపోరు. కేవలం అందుబాటులో ఉండటం విశ్వాసం కాదు, మీ రహస్యాలు తెలియడం నమ్మకం అనిపించుకోదు. ఎవరినైనా దూరం పెట్టాల్సిన పరిస్థితి వస్తే ఈ కింది లక్షణాలు వారిలో ఉన్నాయేమో గమనించండి.

తమకు కష్టం వచ్చినప్పుడే మీరు గుర్తుకొస్తారు

కొంతమందికి మీతో అనుబంధం అక్కర్లేదు, మీ మద్దతు మాత్రమే కావాలి. వారాలు, నెలల తరబడి కనీసం పలకరించని వారు, తమ జీవితంలో ఏదైనా సమస్య రాగానే కాస్త ఫ్రీగా ఉన్నావా? అంటూ వాలిపోతారు. ఆ సమయంలో మీరు వారికి ఎమోషనల్ సపోర్ట్ సిస్టమ్‌ లా మారిపోవాలి. విచిత్రం ఏమిటంటే, మీకు కష్టం వచ్చి మెసేజ్ చేస్తే వాళ్ళు బిజీ అయిపోతారు. కానీ వాళ్ళ అవసరానికి మీరు అందుబాటులో లేకపోతే మాత్రం అదొక పెద్ద నేరం అన్నట్లుగా ఫీల్ అవుతారు. ఇది స్నేహం కాదు, తమ అవసరానికి మిమ్మల్ని వాడుకోవడం.

మీ విజయం వాళ్లకు కంటగింపుగా మారుతుంది

నిజమైన ఫ్రెండ్ మీ బాధలోనే కాదు, మీ సంతోషంలోనూ భాగం పంచుకుంటాడు. కానీ కొందరు మీ ఎదుగుదలను జీర్ణించుకోలేరు. మీకు ఏదైనా మంచి జరిగితే పైకి నవ్వుతూనే పొగుడుతారు, కానీ ఆ నవ్వులో వెటకారం ఉంటుంది. నాకంటే ముందు వీడికి ఈ సక్సెస్ ఎందుకు వచ్చింది? అని మనసులోనే లెక్కలు వేసుకుంటారు. అప్పటిదాకా మీ బాధను చూసి జాలిపడిన వారు, మీరు సక్సెస్ అవ్వగానే మీ విజయాన్ని అదృష్టం అనీ, మీ క్రమశిక్షణను వ్యామోహం అనీ తీసిపారేస్తారు.

హద్దులు దాటుతారు, ఎదురుదాడి చేస్తారు

కొందరు స్నేహితులు మీ ఆత్మగౌరవాన్ని దెబ్బతీస్తూ ఆనందిస్తుంటారు. పదిమందిలో ఉన్నప్పుడు మీపై సెటైర్లు వేయడం, హద్దులు దాటి జోకులు వేయడం చేస్తుంటారు. మీరు బాధపడి అది కరెక్ట్ కాదు అని వారిని వారిస్తే.. నువ్వు ప్రతి విషయాన్నీ మరీ సీరియస్‌ గా తీసుకుంటావ్ అంటూ తప్పు మీదే అన్నట్లుగా ఎదురుదాడికి దిగుతారు. మీ అసౌకర్యాన్ని పట్టించుకోకుండా, మీదే తప్పు అనిపించేలా చేయడం వీరి నైజం. ఇలాంటి వారితో మాట్లాడిన ప్రతిసారీ మీ శక్తి ఉడిగిపోయినట్లు, ఏదో కోల్పోయినట్లు అనిపిస్తుంది.

చేసిన ప్రతి సాయాన్ని ఒక అప్పుగా భావిస్తారు

వీరు చేసే సహాయం ఉచితం కాదు, దానికొక భావోద్వేగపరమైన ఈఎంఐ ఉంటుంది. వీరు మీకు ఒక్కసారి సాయం చేస్తే, దానికి ప్రతిఫలంగా జీవితాంతం మీరు వారి పట్ల అణిగిమణిగి ఉండాలని ఆశిస్తారు. మీరు వారిని ఎప్పుడైనా ప్రశ్నించినా.. వెంటనే ఆ పాత సాయాన్ని గుర్తుచేసి మిమ్మల్ని అపరాధ భావానికి గురిచేస్తారు. ఉదారతను ఒక వ్యూహాత్మక ఆయుధంగా వాడేవారు ఎప్పటికీ స్నేహితులు కాలేరు.

గతాన్ని పట్టుకుని వేలాడటం

ఇన్ని లోపాలున్నా, చాలామంది ఆ స్నేహాలను ఎందుకు వదలలేరు? ఎందుకంటే, గతంలో వాళ్ళు నాకెంత మంచిగా ఉండేవారో కదా అనే ఆలోచనే. ఒకప్పుడు మిమ్మల్ని అర్థం చేసుకున్నారని, ఇప్పుడు వారు చేసే గాయాలను భరించాల్సిన అవసరం లేదు. మనుషులు మారుతారు, బంధాలు ముగుస్తాయి. గతం ఒక బంధం ఎలా మొదలైందో చెప్పగలదు కానీ, ఒక చెడ్డ బంధాన్ని భరించడానికి కారణం కాకూడదు. మీ ఎదుగుదలకు, మనశ్శాంతికి అడ్డుపడే స్నేహాలకు నిశ్శబ్దంగా ముగింపు పలకడమే సరైన నిర్ణయం.