కోపం, బాధ, ఆక్రోశం.. ఎమోషన్స్‌ను కంట్రోల్‌ చేసుకుంటేనే బంధం బాగుండేది

1. పర్యావసానాలు అంచనా వేయడం

భావోద్వేగాలు ప్రతి మనిషిలో ఉంటాయి. వాటిని అదుపులో ఉంచుకున్న వారే జీవితంలో విజయం సాధిస్తారు. ఏ ఎమోషన్ అయినా ప్రదర్శించే ముందు దాని పర్యావసానాలు ఎలా ఉంటాయో అంచనా వేయగలగాలి. అవి మీకు చెడు చేస్తే అలాంటి భావోద్వేగాలను కంట్రోల్ చేసుకోవాలి. కోపాన్ని, ఆవేశాన్ని అదుపు చేయడం కష్టంగా ఉండొచ్చు. కానీ అసాధ్యం కాదు.

2. భావోద్వేగాలను విశ్లేషించుకోవాలి

మీ భావోద్వేగానికి కారణం ఏమిటో అర్థం చేసువాలి. దాని గురించి అంతగా ఎందుకు ఎమోషన్ అవుతున్నారో తెలుసుకోవాలి. మీ ప్రవర్తన ఎలా ఉండుబోతుందో అంచనా వేసి దాని వల్ల మీరు గిల్టీగా ఫీలవుతారా అనేది గుర్తించాలి.

3. ఎలాంటి భాష వాడుతున్నారో గుర్తించండి

కోపాన్ని నియంత్రించుకోవడం దాని గురించి చెప్పుకున్నంత సులభం కాదు. కోపం లాంటి భావోద్వేగంతో పాటు మాటలు కూడా మారుతాయి. ఆవేశంలో ఏవేవో అనేస్తుంటాం. ఆ ఆవేశం తగ్గిన తర్వాత అలా మాట్లాడి ఉండాల్సింది కాదు, అలాంటి భాష వాడాల్సింది కాదు అనుకుని బాధపడతారు చాలా మంది. అందుకే ఎలాంటి భాష వాడుతున్నారో గమనించుకోవాలి.

4. సరిగ్గా కమ్యూనికేట్ చేయాలి

ఎమోషనల్‌గా ఉన్నప్పుడు అరుస్తుంటారు చాలా మంది. వితండవాదానికి దిగుతారు. వాటి వల్ల సమస్య పరిష్కారం కాదు. కాబట్టి మీ ఫీలింగ్స్‌ను చెప్పడానికి మంచి భాషను ఎంచుకోవాలి. అది కూడా మృదువుగా ఉండేలా చూసుకోవాలి.

5. కోపం వస్తే దూరంగా వెళ్లండి

కోపంలో ఆవేశంలో అనరాని మాటలు అనడానికి బదులు దూరంగా వెళ్లండి. ఒకసారి మాట్లాడిన మాటలను తిరిగి తీసుకోలేం. నోటి నుండి వచ్చిన మాటలు ఎదుటివారి మనస్సుకు తీవ్ర గాయాన్ని చేస్తాయి. కోపంలో ఉన్నప్పుడు అక్కడ ఉండటం కంటే దూరంగా వెళ్లడం మంచిది.

6. క్షమించండి, క్షమించమని అడగండి

బాధను భరించలేక చాలా మంది కోపంగా ప్రవర్తిస్తుంటారు. ఆ ప్రవర్తన వల్ల ఎదుటివారు బాధపడితే క్షమించమని అడగండి. అలాగే మీ భాగస్వామి మీ బాధకు కారణమై వారు మిమ్మల్ని సారీ అడిగితే స్వాగతించండి.