పరువు హత్యలు ఎందుకని పెరుగుతున్నాయో తెలుసా...!

పరువు కోసం పాకులాడటం..

మన తెలుగు సినిమాల్లో చూపించినట్టు అనాదిగా వస్తున్న రక్తచరిత్ర, స్త్రీ, పురుషులిద్దరూ ప్రేమించుకోవడం.. అమ్మాయి వైపు లేదా అబ్బాయి వైపు ఉండేవారు ఒప్పుకోకపోవడం.. అయినా వారిని ఎదిరించి పెళ్లి చేసుకోవడం.. హాయిగా జీవిస్తున్న వారిని.. పరువు పేరిట వారిని హత్య చేయించడం.. ఏం సాధించడానికి ఇవి జరుగుతాయో తెలీదు.

ఆలోచనల్లో మార్పులను..

కన్నవారిని చంపించేసి.. జైలు పాలు కావడం.. మీడియాలో రచ్చ రచ్చ కావడం.. ‘కని పెంచిన మమ్మల్నే కాదంటారా? అని.. మమ్మల్ని తిరస్కరిస్తారా?'అని తట్టుకోలేని పెద్దలు.. ప్రస్తుత పిల్లల ఆలోచనల్లో వచ్చిన మార్పులను ఏ మాత్రం గమనించడం లేదు.

పంతాలకు పోవడం..

ఈ ఆధునిక కాలంలోనూ తమ మాటే వినాలి.. తాము చెప్పినట్టే అంతా జరగాలి.. తమకు ఇష్టం లేని వారిని వివాహం చేసుకోకూడదు.. ఒకవేళ తమను కాదని పెళ్లి చేసుకుంటే.. హత్య చేయడానికైనా.. చేయించడానికైనా వెనుకాడమని కొందరు ప్రవర్తించడం బాధాకరం.

కులపిచ్చి..

పరువు, ప్రతిష్ట, గౌరవం, సమాజంతో పాటు కులపిచ్చి వల్ల ఇలాంటి దారుణాలు ఎక్కువగా జరుగుతున్నాయి. ఇతర కులం వారిని పెళ్లి చేసుకున్నారనో.. తక్కువ కులం వారిని పెళ్లి చేసుకున్నారనో.. లేదా వారిని ప్రేమించారని తెలిసినా, వారిని వదలడం లేదు. కన్న కూతురు.. కొడుకులను కూడా హతమారుస్తున్నారు. అలాంటి కుల పిచ్చికే ప్రణయ్, హేమంత్ తో పాటు ఎందరో బలయ్యారు.

ఆస్తులు.. అంతస్తుల్లో తేడాలు..

ఒకవేళ కులం గురించి పట్టించుకోకున్నా.. ఆస్తులు, అంతస్తలు.. ఆర్థిక పరమైన తేడాలను చూస్తున్నారు. అంతేకాదు ఆంధ్ర, తెలంగాణ అనే ప్రాంతీయ వివక్షలను కూడా చూడటం చాలా బాధాకరం.

తప్పని ఒప్పుకోకపోవడం..

కొందరు తల్లిదండ్రులు ఇలాంటి దారుణాలకు పాల్పడి జైలు పాలవ్వడం ఒక ఎత్తు అయితే.. జైలుకు వెళ్లి వచ్చినా కూడా తమ తీరును మార్చుకోకపోవడం విచారకరం. పైగా తామేమీ తప్పు చేయలేదని చెబుతుంటారు.

పెరుగుతూనే ఉన్నాయి..

ఇలాంటి పరువు హత్యలు కేవలం మన తెలంగాణలోనే కాదు.. ఆంధ్రాలో మరియు ఇతర రాష్ట్రాల్లోనూ ఎక్కువగానే ఉన్నాయి. అయితే కొన్ని మాత్రమే వెలుగులోకి వస్తున్నాయి. ఇలాంటి పరువు హత్యలు మనకు తెలియనివి ఎన్నో ఉన్నాయి. కులం.. మతం.. ప్రాంతం.. అనేవి ఏవీ మనకు తిండి పెట్టవు.. ఎలాంటి పరువు, మర్యాదలను కాపాడవని ప్రతి ఒక్కరూ గుర్తించాలి. వీలైతే ప్రేమ పరీక్షలు పెట్టండి.. అందులో సక్సెస్ కాకపోతే వారికి వాస్తవాలను వివరించండి. అంతేగానీ.. ఇలాంటి దుశ్చర్యలకు మాత్రం పాల్పడకండి...