Kova bobbatlu: కాకినాడ స్పెషల్ కోవా బొబ్బట్లు..అద్భుతమైన రుచి, ఇంట్లోనే ఈజీగా ఎలా చేసుకోవాలంటే..

కాకినాడ పేరు వినగానే అందరికీ ఫస్ట్ గుర్తుకొచ్చేది 'కాజా'. ఆంధ్రప్రదేశ్‌లోని తూర్పు గోదావరి జిల్లాలోని కాకినాడ..సంప్రదాయ వంటకాలకు, ముఖ్యంగా తీపి వంటకాలకు ప్రసిద్ధి చెందింది. ఈ తీపి వంటకాలలో కోవా బొబ్బట్లు ఒక ప్రత్యేక స్థానాన్ని కలిగి ఉన్నాయి. ఇవి కేవలం రుచిలో అద్భుతంగా ఉండటమే కాకుండా, ఆరోగ్యానికి మేలు చేసే అనేక పోషకాలను కూడా కలిగి ఉంటాయి. కాకినాడ కోవా బొబ్బట్లు అక్కడి ప్రజల పండుగలు, శుభకార్యాలలో తప్పనిసరిగా ఉండే వంటకం.

సాధారణ బొబ్బట్ల కంటే కోవా బొబ్బట్లు మరింత మృదువుగా, కమ్మగా ఉంటాయి. కాకినాడ కోవా బొబ్బట్లు తయారుచేయడం కొంచెం సమయం పడుతుంది కానీ వాటి టేస్ట్ ముందు ఆ శ్రమ ఏ మాత్రం లెక్కలోకి రాదు. కోవా బొబ్బట్లు తయారుచేయడానికి కావలసిన పదార్థాలు, తయారీ విధానం ఇక్కడ చూడండి.

కావలసిన పదార్థాలు

-మైదా పిండి: 2 కప్పులు
-ఉప్పు: 1/2 టీస్పూన్
-పసుపు: చిటికెడు
-నెయ్యి: 5-7 టేబుల్ స్పూన్లు
-నీరు: సరిపడినంత
-కోవా: 1 కప్పు
-బెల్లం తురుము: 1 కప్పు
-యాలకుల పొడి: 1 టీస్పూన్

Ragi Chimmili: ఎముకలను ఉక్కులా దృఢంగా చేసే రాగి చిమిలి..ఎలా చేసుకోవాలంటే

తయారీ విధానం

-ఒక పెద్ద గిన్నెలో మైదా పిండి, ఉప్పు, పసుపు వేసి బాగా కలిపి ఇందులో ఇప్పుడు 2 టేబుల్ స్పూన్ల నూనె లేదా నెయ్యి వేసి పిండికి పట్టేలా కలపాలి.

-తర్వాత అందులో కొద్దికొద్దిగా నీటిని కలుపుతూ పిండిని సిద్ధం చేసుకోవాలి. పిండి ఎంత మృదువుగా ఉంటే బొబ్బట్లు అంత బాగా వస్తాయి. ఇది పూరీ పిండి కంటే కొంచెం ఎక్కువ జిగురుగా ఉండాలి.

-పిండిని సిద్ధం చేసుకున్న తర్వాత దానిపై 2-3 టేబుల్ స్పూన్ల నూనె లేదా నెయ్యి పోసి పిండి అంతా నూనెలో నానినట్లుగా కప్పి ఉంచాలి.

-ఈ పిండిని కనీసం 2-3 గంటలు వీలైతే రాత్రంతా నానబెట్టాలి.

-ఇప్పుడు ఒక మందపాటి అడుగున్న కడాయిలో 1-2 టేబుల్ స్పూన్ల నెయ్యి వేసి వేడి చేయాలి.

-నెయ్యి కరిగిన తర్వాత తురిమిన కోవాను వేసి తక్కువ మంటపై 2-3 నిమిషాలు వేయించాలి. కోవా కొద్దిగా మెత్తబడి కమ్మటి వాసన వచ్చే వరకు వేయించాలి.

-ఇప్పుడు బెల్లం తురుము వేసి బాగా కలపాలి. బెల్లం కరిగి కోవాతో పూర్తిగా కలిసి, కొంచెం చిక్కబడే వరకు కలుపుతూ ఉండాలి.

-ఈ మిశ్రమం దగ్గరపడి, కడాయి అడుగు నుండి విడిపోవడం ప్రారంభమైనప్పుడు యాలకుల పొడి వేసి బాగా కలపాలి.

-మంట ఆపి ఈ మిశ్రమాన్ని ఒక ప్లేట్‌లోకి తీసుకుని పూర్తిగా చల్లారనివ్వాలి.

-చల్లారిన తర్వాత, ఈ కోవా మిశ్రమాన్ని చిన్న చిన్న ఉండలుగా చేసుకోవాలి.

-నానబెట్టిన పిండిని తీసుకుని, చేతులకు కొద్దిగా నూనె రాసుకుని, పిండిని మరోసారి బాగా కలపాలి.

-సిద్ధం చేసుకున్న పిండి నుండి చిన్న నిమ్మకాయంత పరిమాణంలో ముద్దను తీసుకోవాలి.

-ఒక ప్లాస్టిక్ షీట్ లేదా అరటి ఆకు లేదా బటర్ పేపర్‌ పై కొద్దిగా నూనె రాసి, దానిపై తీసుకున్న పిండి ముద్దను వేయాలి.

-చేతి వేళ్లతో లేదా చిన్న రోలింగ్ పిన్‌ తో పిండిని చిన్న పూరీలాగా విస్తరించాలి. మధ్యలో కొంచెం మందంగా, అంచులు సన్నగా ఉండేలా చూసుకోవాలి. విస్తరించిన పిండి మధ్యలో ఒక కోవా ఉండను ఉంచాలి.

-పిండి అంచులను నెమ్మదిగా పైకి తీసుకువచ్చి, కోవా ఉండను పూర్తిగా కప్పి, పైభాగాన్ని జాగ్రత్తగా మూసివేయాలి.

-ఇప్పుడు ఈ పూర్ణం నింపిన పిండి ముద్దను మళ్లీ ప్లాస్టిక్ షీట్/ఆకుపై ఉంచి చేతి వేళ్లతో లేదా రోలింగ్ పిన్‌ తో నెమ్మదిగా, జాగ్రత్తగా గుండ్రంగా, పలుచగా విస్తరించాలి.

-ఒక నాన్ స్టిక్ పెనం లేదా దోసె పెనం తీసుకుని మీడియం మంటపై వేడి చేసి పెనం వేడైన తర్వాత,ౌ సిద్ధం చేసుకున్న బొబ్బట్టును నెమ్మదిగా పెనంపై వేయాలి. మీడియం మంటల మీద ఒక వైపు బంగారు రంగు వచ్చేవరకు కాల్చాలి.

-బొబ్బట్టు పైన కొద్దిగా నెయ్యి లేదా నూనె వేసి రెండో వైపుకు తిప్పి కాల్చాలి. రెండు వైపులా బంగారు రంగు వచ్చి, బొబ్బట్టు పూర్తిగా ఉడికే వరకు కాల్చాలి. అంతే కోవా బొబ్బట్లు రెడీ.

-కాకినాడ కోవా బొబ్బట్లను వేడి వేడిగా నెయ్యితో లేదా పాలు, పాయసం, లేదా ఇంట్లో చేసిన ఏదైనా తీపి పదార్థంతో కలిపి వడ్డిస్తే రుచి అద్భుతంగా ఉంటుంది. ఇవి చల్లారిన తర్వాత కూడా చాలా రుచిగా ఉంటాయి.