పప్పుచారులో నంజుకొని తినడానికి ఇదే సరైనది..పచ్చి అరటికాయతో ఫ్రై ఇలా చేసుకోండి

తెలుగువారి ఇళ్లల్లో తరచుగా చేసుకునే వంటకాల్లో బనానా ఫ్రై ఒకటి. దీనిని అరటికాయ వేపుడు అని కూడా అంటారు. అన్నంలోకి పప్పు, సాంబార్‌, మజ్జిగచారుతో నంజుకొని తినడానికి ఇది అద్భుతమైన సైడ్ డిష్. దీన్ని తయారు చేయడం సులభం. ఇది ఆరోగ్యానికి కూడా చాలా మేలు చేస్తుంది. పచ్చి అరటికాయలో ఎక్కువ మొత్తంలో ఫైబర్ ఉంటుంది. ఇది మన జీర్ణవ్యవస్థకు చాలా ముఖ్యం. మలబద్ధకాన్ని నివారిస్తుంది, పేగుల కదలికలను మెరుగుపరుస్తుంది. అంతేకాదు, కడుపు నిండిన భావనను కలిగిస్తుంది, తద్వారా అనవసరంగా ఎక్కువ ఆహారం తీసుకోకుండా ఆపుతుంది. క్రంచీగా,టేస్టీగా బనానా ఫ్రై ఇంట్లోనే సులభంగా ఎలా తయారుచేసుకోవాలో ఇక్కడ చూడండి.

బనానా ఫ్రై తయారీకి కావాల్సిన పదార్థాలు
-పచ్చి అరటికాయ
-ఆయిల్
-పోపు దినుసులు
-జీలకర్ర
-వెల్లుల్లి
-కారం
-ఉప్పు
-కారం
-ఎండుమిర్చి
-కరివేపాకు

బనానా ఫ్రై తయారీ విధానం

-ముందుగా ఒక కూర అరటికాయ(పచ్చి అరటికాయ) తీసుకొని దాని తొక్కు తీసేసి నీటితో శుభ్రంగా కడిగి చిన్న చిన్న రౌండ్ ముక్కలుగా కట్ చేసుకోండి.

-అరటికాయ ముక్కలను కట్ చేసిన వెంటనే ఉప్పు నీటిలో వేయడం వల్ల అవి నల్లబడకుండా ఉంటాయి.

-తర్వాత స్టవ్ మీద పాన్ పెట్టి అందులో టీస్పూన్ల ఆయిల్ వేసి వేడి చేశాక పోపు దినుసులు, రెండు ఎండుమిర్చి ముక్కలు, కరివేపాకు వేసి వేయించాక ఇందులోనే కట్ చేసిన అరటికాయ ముక్కలు వేసి పావు టీస్పూన్ పసుపు వేసి మగ్గనివ్వాలి. వేపుడు కరకరలాడుతూ రావాలంటే ముక్కలను నూనెలో తక్కువ మంటపై నిదానంగా వేయించాలి.

-అరటికాయ ముక్కలు మగ్గేలోగా మిక్సీ జార్ లో 1 టీస్పూన్ కారం, అర టీస్పూన్ జీలకర్ర, అర టీస్పూన్ ఉప్పు, 8 వెల్లుల్లి రెబ్బలు వేసి కచ్చాపచ్చగా గ్రైండ్ చేసుకోవాలి.

-అరటికాయ ముక్కలు బాగా మగ్గి గోల్డెన్ బ్రౌన్ కలర్ లోకి వచ్చాక అందులో కచ్చాపచ్చగా గ్రైండ్ చేసుకున్న పొడిని వేసి ముక్కలకు బాగా పట్టేలా కలుపుకొని స్టవ్ ఆఫ్ చేసేయండి. అంతే క్రిస్పీ బనానా ఫ్రై రెడీ. తాజా కరివేపాకు, కొత్తిమీర వాడటం వల్ల వేపుడుకు మంచి సువాసన, అదనపు రుచి వస్తాయి.