పైన టమాటో.. లోపల మసాలా ఆలు.. ఈ బోండా రుచి చూస్తే మళ్లీ మళ్లీ కావాలంటారు!

వర్షాకాలం వచ్చినా, చలికాలం సాయంత్రాలైనా వేడి వేడిగా ఏదైనా తినాలనిపించడం సహజం. అలాంటి సమయంలో మనకు ముందుగా గుర్తొచ్చేది ఆలూ బోండా లేదా బ్రెడ్ బజ్జీ. మీరు ఎన్నోసార్లు ఆలూ బోండా, బ్రెడ్ బోండా తిని ఉంటారు. సాధారణంగా వీటిని బంగాళదుంపలు, శనగపిండితో తయారు చేస్తారు. కానీ, ఎప్పుడూ ఒకే రకమైన రుచి బోర్ కొట్టిందా? అయితే ఈసారి కాస్త కొత్తగా, ఎంతో రుచికరంగా ఉండే టమాటో బోండాను ప్రయత్నించి చూడండి. ఇది అస్సలు నూనెను పీల్చుకోదు. డీప్ ఫ్రై చేసినా కూడా మీ చేతులకు జిడ్డు అంటదు.

టమాటో బోండా తయారీ విధానం

-ముందుగా బోండా లోపల పెట్టే స్టఫింగ్ సిద్ధం చేసుకోవాలి. స్టవ్ వెలిగించి ఒక బాండీ పెట్టి, కొద్దిగా నూనె వేడి చేయండి. నూనె కాగాక అందులో కొద్దిగా సోంపు గింజలు, ధనియాలు, జీలకర్ర వేసి వేయించండి. ఆ తర్వాత పచ్చిమిర్చి, అల్లం ముక్కలు వేసి తక్కువ మంట మీద దోరగా వేయించాలి.

-ఇప్పుడు అందులో కొద్దిగా మిరియాల పొడి, చిటికెడు ఇంగువ, రెండు టీస్పూన్ల శనగపిండి వేసి పచ్చివాసన పోయేలా బాగా కలుపుతూ వేయించండి. ఆ తర్వాత కొద్దిగా పసుపు, కారం, ధనియాల పొడి కలపాలి. ఇప్పుడు కొద్దిగా కసూరి మేతి, సన్నగా తరిగిన ఉల్లిపాయ ముక్కలు వేసి వేయించండి. ఇవన్నీ కాస్త వేగిన తర్వాత, ముందుగానే ఉడికించి మెత్తగా చేసుకున్న బంగాళదుంప మిశ్రమాన్ని ఇందులో వేసి బాగా కలపాలి. చివరగా బ్లాక్ సాల్ట్, కొద్దిగా ఆమ్ చూర్ పొడి, కొత్తిమీర చల్లి బాగా కలిపి స్టవ్ ఆపేయండి. స్టఫింగ్ రెడీ.

-టమాటోలను శుభ్రంగా కడిగి పైభాగంలో (కాడ ఉండే చోట) గుండ్రంగా కట్ చేసి చిన్న రంధ్రం చేయండి. ఇప్పుడు లోపల ఉన్న గింజలు, గుజ్జు మొత్తాన్ని నెమ్మదిగా బయటకు తీసేయండి. ఇలా లోపల ఖాళీగా, గిన్నెలా మారిన టొమాటోలలో మనం ముందుగా తయారు చేసి పెట్టుకున్న బంగాళదుంప మసాలాను గట్టిగా కూరాలి.

-ఒక వెడల్పాటి గిన్నెలో సరిపడా శనగపిండి తీసుకోండి. అందులో కొద్దిగా ఉప్పు వేసి తగినన్ని నీళ్లు పోసుకుంటూ బజ్జీల పిండిలా కాస్త చిక్కగా కలుపుకోండి. పిండిని ఉండలు లేకుండా, కాస్త ప్లఫ్ఫీగా (ఉబ్బేలా) గిలకొట్టడం చాలా ముఖ్యం. ఇప్పుడు స్టవ్ మీద కడాయి పెట్టి డీప్ ఫ్రైకి సరిపడా నూనె పోసి వేడి చేయండి.

-నూనె బాగా వేడెక్కిన తర్వాత, మసాలా నింపి పెట్టుకున్న టమాటోలను శనగపిండి మిశ్రమంలో వేసి, టమాటోకి పిండి బాగా పట్టేలా కోట్ చేయాలి. ఆ తర్వాత జాగ్రత్తగా నూనెలో వదలండి. బోండాలు బంగారు గోధుమ రంగు (గోల్డెన్ బ్రౌన్) వచ్చేవరకు బాగా డీప్ ఫ్రై చేయండి.

-అంతే టొమాటో బోండాలు రెడీ.