కళ్ళ విషయంలో జర జాగ్రత్త సుమీ..!

కంటికి జబ్బు చేసిందంటే మనకు ముందుగా కళ్ళలో మంట, కంటి వెంట నీరు కారడం, కళ్ళు అంటుకుపోవడం, వాపు రావడం, కళ్ళు ఎర్రబడటం, పుసులు కట్టడం లాంటి లక్షణాలు కనిపిస్తాయి. ఇలాంటి సమస్యలు కనిపిస్తే వెంటనే డాక్టర్‌ను సంప్రదించాలి.

మన ముఖానికి అందాన్ని ఇచ్చేవి కళ్ళు. అటువంటి కళ్ళను మనం జాగ్రత్తగా కాపాడుకోవాలి. అందమైన కళ్ళు కావాలంటే డాక్టర్‌ సలహా లేకుండా లోషన్స్‌ గానీ, ఆయిల్స్‌ గానీ వాడరాదు. కళ్ళు చుట్టూ పేస్‌ పేక్‌లు, మాస్క్‌లు, పవరుగల ఆస్ట్రిజెంట్స్‌ వాడరాదు.

కంటి చుట్టుప్రక్కల ప్రదేశంలో గోకటంగానీ, రబ్‌ గానీ చేయరాదు.తక్కువ కాంతితో గానీ, ఎక్కువ కాంతిలోగానీ చదవరాదు. చిన్న అక్షరాలు చదవటం వల్ల మన కళ్ళు అలసట చెందగలవు. అందువల్ల చిన్న అక్షరాలు చదవకూడదు. ఇంకొక విషయం ఏమిటంటే అందరూ కూడా ఎక్కువ టీ.వి.ని చూడటానికి ఇష్టపడుతున్నారు. ఎక్కువగా టీ.వి. చూడడం కూడా మన కళ్ళకు మంచిదికాదు.

ఇక మగవారి విషయానికి వచ్చినట్లయితే వారు పొగ ఎక్కువగా త్రాగుతూ ఉంటారు. పొగ ఎక్కువగా త్రాగటం వల్ల విటమిన్‌ 'సి' లోపించి కళ్ళు చుట్టూరా నల్లని చారలు ఏర్పడగలవు. పొత త్రాగటం తగ్గించుకున్నట్లయితే కళ్ళ క్రింద ఏర్పడే నల్లటి చారలు కూడా తగ్గించు కోవచ్చు. తద్వారా కళ్ళను అందంగా ఉంచుకోవచ్చు. కంటి మేకప్‌ తుడుచుకోవటానికి రోజ్‌వాటర్‌లో ముంచిన నూలు బట్ట ఉపయోగించాలి. నెమ్మదిగా వత్తుతూ తుడవాలి. కనురెప్ప చివర్లు జాగ్రత్తగా తుడవాలి. జిడ్డు చర్మం కలవారు కంటి చుట్టూ క్రీము రాసుకోవటం మంచిది.