పొట్టపై వెంట్రుకలు ఇంట్లోనే తొలగించుకోడమెలా?

By B N Sharma

Updated: Friday, July 20, 2018, 12:07 [IST]

పురుషులకు, స్త్రీలకు పొట్టపై వెంట్రుకలు పెరగడమనేది కామన్ సమస్య. పురుషులు ఏ సంకోచం లేకుండా వీటిని తీసేస్తూ వుంటారు. కాని స్త్రీలకు ఈ పని చికాకు, అసౌకర్యం కూడాను. మంచి చీర కట్టినపుడు వెంట్రుకలు కనపడితే ఎలా వుంటుందో ఊహించండి! చికాకు పెడుతుంది కదా! ప్రతి సారి స్పా కు వెళ్ళటం వెంట్రుకలను తొలగించటం కుదరని పనే. శరీరమంతా వ్యాక్సింగ్ చేయాలంటే చాలా సమయం పోతూంటుంది. లేజర్ ట్రీట్ మెంట్ చేయిద్దామా అంటే ఖర్చుతో కూడిన పని. మరేం చేయాలి? ఇక ఇంట్లోనే దీనిని తొలగించుకొనే ఏర్పాటు చేసుకోవాలి. ఎలా? కొన్ని చిట్కాలిచ్చాం చూసుకోండి.

1. షేవ్ చేయండి: ఉదర భాగ వెంట్రుకలు కొందరికి గట్టిగా కూడా వుంటాయి. రేజర్ తో తీసేయాలనుకుంటే తీసేయండి. రేజర్ తో తీస్తే, మళ్ళీ త్వరగా వచ్చేస్తాయంటారు కొంతమంది. పర్వాలేదు తరచుగా షేవ్ చేయండి. కొద్దిపాటి కొబ్బరినూనె రాస్తే మెత్తబడి ఎదుగుదల త్వరగా వుండదు.

2. క్రీములతో తొలగించండి: సమయం, శక్తి వృధా కారాదు. చర్మ సంరక్షణ కావాలి. నేడు మార్కెట్ లో వస్తున్న వివిధ రకాల హెయిర్ రిమూవర్ క్రీములలో మంచిదాన్ని, ఎలర్జీ కలిగించనిదాన్ని ఎంపిక చేసి వాడండి. గతంతో పోలిస్తే, నేడు వచ్చే ఉత్పత్తులు నాణ్యతలు గలవిగానే వున్నాయి.

3. బ్లీచింగ్: కొంతమంది మహిళలకు పొట్టపై అతితక్కువ వెంట్రుకలుంటాయి. అదృష్టవంతులైన వీరికి వెంట్రుకలు తొలగించేకంటే, బ్లీచింగ్ మంచిది. కొద్దిపాటి బ్లీచింగ్ ఈ సమస్యను నివారిస్తుంది.

4. ఇంటివద్దే వ్యాక్సింగ్: కొత్తగా వ్యాక్స్ స్ట్రిప్ లు వస్తున్నాయి. వాటితో ఇంటివద్దే చేసుకోవచ్చు. పార్లర్ కు వెళ్ళనవసరంలేదు. వాటిని కొంచెం హీట్ చేసి ఉపయోగించడమే. కాళ్ళకు చేతులకు కాకపోయినా, చిన్నదైన పొట్ట భాగానికి ఇంటి వ్యాక్సింగ్ సౌకర్యమే!

5. సహజ వైద్యం: కిచెన్లోనే కావలసినవి వుంటాయి. కొద్దిపాటి పసుపు శనగపిండి కలపండి. ఈ మిశ్రమానికి పాలు లేదా నీరు కలపండి. ఈ పేస్ట్ ను పొట్ట వెంట్రుకలకు పట్టించి, నలిపేయండి. వెంట్రుకలు చాలావరకు తొలగిపోతాయి.

ఈ చిన్న పరిష్కారాలు ఇంటివద్దే.... మీ పొట్ట వెంట్రుకల సమస్యను తీరుస్తాయి