జుట్టు రాలకుండా అదుపులో ఉంచే సింపుల్ చిట్కాలు

జుట్టు రాలడం తగ్గించే హెర్బల్ డికాషన్

పావులీటరు నీటిలో నాలుగు చుక్కల నీలగిరి తైలం, ఐదారు మందారపువ్వులూ, గుప్పెడు చొప్పున మందార ఆకులూ, గుప్పెడు తులసి ఆకుల్ని ఓ గిన్నెలోకి తీసుకుని స్టౌ మీద పెట్టాలి. ఆ నీరు రంగు మారేవరకూ మరిగించి తరవాత వడకట్టాలి. ఈ నీటిని వారానికి ఒకసారైనా తలకు మర్దన చేసుకుని కాసేపయ్యాక కడిగేయాలి.

జుట్టు రాలడం తగ్గించే నిమ్మరసం

వర్షం, దుమ్ము, థూళికి సాధారణంగా జుట్టు పొడిబారుతుంది. అలా కాకుండా ఉండాలంటే రెండు నిమ్మకాయల రసాన్ని రెండు కప్పుల నీళ్లల్లో వేసి బాగా కలిపి, ఒక సీసాలోకి తీసుకోవాలి. దాన్ని జుట్టుకు రాసుకోవాలి. ఇది పోషణ అందించి.. పట్టులా మారుస్తుంది.

జుట్టు రాలడం తగ్గించే టీపొడీ, కాసిని తులసీ ఆకులు

కప్పు నీళ్లలో రెండు చెంచాల టీపొడీ, కాసిని తులసీ ఆకులు వేసి బాగా మరిగించాలి. ఆ నీళ్లు సగం అయ్యాక దింపేయాలి. తరవాత ఇవతలకు తీసి..అందులో షాంపూ కలిపి తలస్నానం చేయాలి. జుట్టు ఆరోగ్యంగా, పట్టులా మారుతుంది.

జుట్టు రాలడం తగ్గించే మెంతులు

జుట్టు రాలడం, పొడిబారడం, చుండ్రు వంటి సమస్యలను నివారించడానికి పావు కప్పు మెంతులను రాత్రంతా పుల్లటి పెరుగులో నానబెట్టి, ఉదయాన్నే పెరుగుతో సహా రుబ్బుకుని తలకు పూతలా వేసుకుని అరగంట తర్వాత తలారా స్నానం చేయాలి. దీనివల్ల జుట్టుకు సంబంధించిన సమస్యలను చాలావరకూ తగ్గించవచ్చు.

జుట్టు రాలడం తగ్గించే వేప నూనె

అలాగే తలలో ఏవైనా ఇన్‌ఫెక్షన్లు ఉంటే అలాంటి వాటిని తగ్గించడానికి తలకు వేప నూనె రాసుకుంటే మంచి ఫలితం ఉంటుంది. తలకు వేపాకును మెత్తగా నూరి పట్టించినా కూడా సమస్యను నివారించవచ్చు. గోరింటాకును ఇలా వాడినా కూడా మంచి ఫలితం ఉంటుంది.

అలాకాకున్నా వేపాకుల్ని గిన్నెలో సగం వరకూ నీళ్లు తీసుకుని అందులో వేపాకుల్ని వేసి మరిగించి, బాగా చల్లారిన తర్వాత వడగట్టి, ఆ నీటితో తలను కడుక్కున్నా కూడా మంచి ఫలితం ఉంటుంది. జుట్టు రాలే సమస్యను తగ్గించడానికి అరటిపండు గుజ్జును తలకు పట్టించి కాసేపయ్యాక తలస్నానం చేస్తే జుట్టురాలే సమస్య తగ్గుతుంది.

జుట్టు రాలడం తగ్గించే కలబంద గుజ్జు

కలబంద గుజ్జును కూడా ఇలా తలకు పట్టిస్తే జుట్టు రాలే సమస్యను నివారించవచ్చు. ఇంకా తలస్నానం చేసేముందు కొబ్బరి నూనెను గోరువెచ్చగా కాచి తలకు రుద్దుకుని మర్దనా చేసుకుంటే కూడా మంచి ఫలితం ఉంటుంది. ఇలా చేయడం వల్ల తలకు బాగా రక్తప్రసరణ జరిగి జుట్టు కుదుళ్లు గట్టిపడతాయి.

జుట్టు రాలడం తగ్గించే ఉల్లిరసం

ఉల్లిరసం వల్ల కూడా జుట్టు ఊడడం తగ్గుతుంది. ఉల్లిలో సల్ఫర్‌ బాగా ఉంటుంది. ఇది జుట్టు కుదుళ్లకు రక్తం బాగా సరఫరా అయ్యేట్టు చేస్తుంది. ఉల్లిరసంలోని యాంటిబాక్టీరియల్‌ గుణాలు తలలోని బాక్టీరియా, ఇన్ఫెక్షన్లను తగ్గిస్తుంది. అందుకే ఉల్లిపాయను గ్రైండ్‌ చేసి ఆ గుజ్జు నుంచి రసం తీయాలి. ఆ రసాన్ని తలకు రాసుకుని అరగంటపాటు అలానే ఉంచుకోవాలి. ఆ తర్వాత నీటితో వెంట్రుకలను బాగా కడుక్కుని షాంపుతో తల రుద్దుకోవాలి.