గులాబీ రేకులతో చర్మానికి నిగారింపు!

ముఖం తాజాగా మెరుస్తుంది:

గులాబీ రేకల్ని కాసేపు నీటిలో ఉంచాలి. తరవాత ముద్దలా చేసి ముఖానికి రాసుకోవాలి. పదిహేను నిమిషాలయ్యాక చన్నీళ్లతో కడిగేసుకోవాలి. దీనివల్ల ముఖం తాజాగా మెరుస్తుంది.

డ్రై స్కిన్ నివారిస్తుంది:

పొడి చర్మం ఉన్నవారికి గులాబీ రేకల్లోని సహజ నూనెలు కావాల్సిన తేమను అందిస్తాయి. రెండు గులాబీపువ్వుల రేకలకు కాస్త తేనె, రెండు చెంచాల పాలు కలిపి ముద్దలా చేసుకోవాలి. దీన్ని ముఖానికి రాసుకుని పావుగంట తరవాత కడిగేయాలి. మృతకణాలు పోవడంతోపాటూ చర్మం మృదువుగా ఉంటుంది.

మొటిమలను నివారిస్తుంది:

గుప్పెడు గులాబీరేకల్ని మెత్తగా చేసుకుని ఆ మిశ్రమానికి కాస్త గులబీ నీరూ, తేనె కలిపి ముఖం, మెడకూ పట్టించాలి. పావుగంట తరవాత గోరువెచ్చని నీటితో కడిగేయాలి. మొటిమల సమస్య తగ్గి.. చర్మం ఆరోగ్యంగా కనిపిస్తుంది.

సన్ ట్యాన్ నివారిస్తుంది:

ఎండ ప్రభావం వల్ల చర్మం నల్లగా మారిందా..? పెద్ద చెంచాడు గులాబీ ముద్దలో రెండు చెంచాల చందనం, ఒకటిన్నర చెంచా నిమ్మరసం, చిటికెడు పసుపు వేసి కలపాలి. దీన్ని ముఖానికి రాసి ఆరాక కడిగేయండి. ఇది నలుపుదనాన్ని తొలగించడంతోపాటూ చర్మాన్ని తాజాగా మార్చేస్తుంది.

ముడుతలు తగ్గుతాయి:

రోజ్ వాటర్ లో యాంటీ ఏజింగ్ లక్షణాలు ఉన్నాయి. కాబట్టి రోజ్ వాటర్ చుక్కలను చల్లటినీటిలో వేసి ముఖాన్ని కడగటం వల్ల వయసు కారణంగా వచ్చే ముడతలూ, వలయాలూ దరిచేరకుండా ఉంటాయని బ్యూటీషియన్లు చెబుతున్నారు.

శరీరం మీద మంచి వాసన:

శరీరం దుర్వాసనగా అనిపిస్తుంటే కొన్ని రోజ్ వాటర్ చుక్కలను శరీరానికి అప్లై చేయటం వల్ల దుర్వాసన తగ్గి, సువాసన వ్యాపిస్తుంది.