ఈ తారల చీరలతో మీరు అందమైన పెళ్లికూతురిలా మారిపోవచ్చు...!

గద్వాల్ చీరలు..

తెలంగాణ రాష్ట్రంలోని గద్వాల్ జిల్లాలో తయారయ్యే ఈ చీరలు ప్రపంచ ప్రసిద్ధి గాంచినవి. అందమైన డిజైన్లతో అద్భుతంగా తీర్చిదిద్దిన ఈ చీరలు చూడటానకి మాత్రమే కాదు.. కట్టుకోవడానికి చాలా సౌకర్యవంతంగా ఉంటాయి. సిల్క్, కాటన్, కాటన్ సిల్క్ తో కలిపి వీటిని తయారు చేస్తారు. పెళ్లి పట్టుచీరల్లో వీటికి ప్రత్యేకమైన స్థానం ఉంది. ఏ వయసులో ఉన్నవారైనా ఈ చీర కట్టుకుంటే అందమైన పెళ్లికూతురిలా కనిపిస్తారు. అదే ఈ చీరలోని ప్రత్యేకత.

పోచంపల్లి..

తెలంగాణ రాష్ట్రంలోని నల్లగొండ జిల్లాలోని పోచంపల్లికి సిల్క్ సిటీ ఆఫ్ ఇండియాగా పేరు వచ్చింది. ఎందుకంటే ఇక్కడి దారాలకే రంగులు అద్ది వాటినే డిజైన్లుగా మలిచే చీరలతో మీ అందం మరింత పెరుగుతుంది. ఈ చీరలపై ఉన్న డిజైన్ ను ఇక్కత్ డిజైన్ అని పిలుస్తారు. ఇవి కట్టుకోవడానికి చాలా కంఫర్ట్ గా ఉండటంతో పాటు ఎక్కువ కాలం మన్నికగా వస్తాయి. వీటిని ఎండాకాలంలో ఎక్కువగా ధరిస్తూ ఉంటారు. ఎందుకంటే ఇక్కడ తయారైన పట్టు, సిల్క్, కాటన్ చీరలకు ప్రపంచవ్యాప్తంగా మంచి డిమాండ్ ఉంది.

బెనారస్..

ఉత్తరప్రదేశ్ లోని వారణాసిలో బెనారస్, బనారసీ చీరలు ప్రపంచవ్యాప్తంగా ఎంతో ప్రాముఖ్యత సంపాదించుకున్నాయి. ఈ చీరలలో ప్రత్యేకత ఏంటంటే.. ఇక్కడ సన్నని బంగారం, వెండి దారలతో వీటిని తయారు చేస్తారు. ఒకప్పుడు మొఘలు రాజవంశస్థుల కోసం ఈ చీరలను తయారు చేసేవారు. అందమైన పువ్వుల డిజైన్లతో పాటు రాజసం ఉట్టిపడేలా ఉండే ఈ చీరలు నేటితరం అమ్మాయిల అభిరుచులకు తగ్గట్టు రూపుదిద్దుకుంటున్నాయి. వీటిలో జంగ్లా, తానోచీ, టిష్యూ, బుటీదార్, కట్ వర్క్, వస్కత్ జందానీతో పాటు అనేక రకాలున్నాయి. డిజైన్ల ఆధారంగా వీటిని డివైడ్ చేశారు. ఇందులో వేటికవే ప్రత్యేకంగా ఉంటాయి. పెళ్లిళ్లు.. పండుగలు.. ఇతర ఫంక్షన్లు ఎప్పుడైనా వీటిని కట్టుకోవచ్చు.

కంచి పట్టు..

పెళ్లిళ్ల సీజన్ వచ్చిందంటే చాలు ప్రతి ఒక్కరూ చీరలపైనే ఎక్కువ ఫోకస్ పెడతారు. అందులో ఎలాంటి సందేహం లేదు. అయితే అన్నింటికంటే ముందుగా కంచి పట్టుకు తొలి ప్రాధాన్యత ఇస్తారు. బంగారపు జరీతో నేసే ఈ చీరకు కూడా ప్రపంచవ్యాప్తంగా మంచి డిమాండ్ ఉంది. తమిళనాడులోని కాంచీపురంలో తయారయ్యే ఈ చీరల అంచుల్లో టెంపుల్ డిజైన్ కచ్చితంగా ఉంటుంది. కంచి పట్టు చీరలు నూలుతో తయారవుతాయి. కాబట్టి వీటిని ఎప్పుడైనా కట్టుకోవచ్చు. ఇవి ఆధునిక హంగులను అద్దుకుంటున్నాయి. ప్రస్తుతం కాంచీవరం సిల్క్ శారీస్ అని పిలుస్తారు.

చెట్టినాడ్..

ఒకప్పుడు ఇలాంటి చీరలను ఎవ్వరూ ఎక్కువగా ఇష్టపడేవారు కాదు. కానీ ఇటీవలి కాలంలో చాలా మంది అమ్మాయిలు చెట్టినాడు చీరలను కట్టుకోవడానికి ఎక్కువ ఇంట్రస్ట్ చూపుతున్నారు. తేలికగా, ట్రెండీగా ఉండే ఈ చీరలు మిగిలిన వాటితో కంపేర్ చేస్తే చాలా స్పెషల్ గా ఉంటాయి. వీటిని ఎక్కువగా కాటన్ తో తయారు చేస్తారు. ఈ చీరలు చాలా ట్రెండీగా ఉంటాయి.

మైసూర్ సిల్క్..

కర్నాటక రాష్ట్రంలోని మైసూరు సిల్క్ రాజదర్భానికి ప్రతీకగా నిలుస్తోంది. ఈ చీరలు చాలా సున్నితమైన ఫ్యాబ్రిక్ తో తయారవుతాయి. ఇవి కట్టుకుంటే చాలా మందికి రిచ్ లుక్ వస్తుంది. ఈ జరీ చీరలు చాలా లైట్ గా ఉంటాయి. అందుకే చాలా మంది అమ్మాయిలు ఇలాంటి సిల్క్ శారీలను కట్టుకునేందుకు ఆసక్తి చూపుతున్నారు. అయితే ఈ చీరలను కట్టుకున్నప్పుడు, క్లీన్ చేసేటప్పుడు కొంచెం కేర్ ఫుల్ గా ఉండాలి. ఎందుకంటే ఈ చీర చాలా సున్నితంగా ఉంటుంది. ఇది త్వరగా పాడయ్యే అవకాశం ఉంటుంది.

నలుగురిలో భిన్నంగా..

మీరు ఏదైనా ఫంక్షన్ కు వెళ్లినప్పుడు అందరికంటే ప్రత్యేకంగా, సింపుల్ గా కనిపించాలంటే.. మీరు కాన్సెప్ట్ శారీ వంటి వాటిని సెలెక్ట్ చేసుకోవాలి. ప్రముఖ డిజైనర్ తరుణ్ తహిల్యానీ పేస్టల్ షేడ్ లో రూపొందించిన చీరలతో మీ లుక్ మరింత పెరిగిపోతుంది.