Click it and Unblock the Notifications
Just In
-
-
-
-
వంటికి....ఇంటికీ...మేలు చేసే పెరటి కూరలు...!
ఇంటి దగ్గర పంటల సాగును మొదలు పెట్టడానికి జూన్ నెల సరైన సమయం. పెరటి పెరట్లో, ఇంటి చుట్టూ ఉండే ఖాళీలో కుండీల్లో, మేడ మీద కుండీల్లో, ప్రత్యేకంగా ఏర్పాటు చేసిన మడుల్లో పెద్ద శ్రమ లేకుండానే కూరగాయలు పెంచుకోవచ్చు. కొత్తగా కూరగాయలు, ఆకుకూరలు పెంపకం ప్రారంభించే వారు కొంచెం శ్రద్ధతో ప్రణాళిక ప్రకారం మొక్కలు వేసుకుంటే ఏడాది అంతా కూరగాయలు, ఆకుకూరలు అందుబాటులో ఉంటాయి.
ఇంటి దగ్గర పెంచుకొనే ఆకుకూరలు, కూరగాయల మొక్కలకు ఎరువుగా ఎర్రమట్టి, ఆకు ఎరువు లేదా వర్మీ కంపోస్టు సమపాళ్లలో కలుపుకొని వాడొచ్చు. జూన్ నెలలో వర్షాలకాలం ప్రారంభమౌతుంది కాబట్టి దాదాపు అన్ని రకాల కూరగాయలు, ఆకుకూరలు పెంపకం మొదలు పెట్టవచ్చు. వర్షం పడటం వల్ల మొక్కలకు నీరు పట్టాల్సిన అవసరం ఉండదు.
వంకాయ, పచ్చిమిర్చి, టమాటా, బెండకాయ, అలసందలు(బొబ్బర్లు), గోరుచిక్కుడు, పాలకూర, తోటకూర, గోంగూర... తదితర కూరగాయ మొక్కలు సాగుచేయవచ్చు. వంగ, టమాటా, మిరప రెండు నెలల్లో కాపుకొచ్చి మూడు నెలలు వరకూ కాపుకాస్తాయి. ఇవి వేసిన కుండీలు, మడుల్లో ఆ తర్వాత వేరే పంటలు వేసుకోవడం ఉత్తమం. క్రమం తప్పకుండా కూరగాయలు పొందాలంటే 45 రోజులకోసారి కొన్ని కొత్త మొక్కలు నాటుకుంటూ ఉండాలి. ముందు నాటిన మొక్కలు కాపు పూర్తయ్యేటప్పటికి ఈ మొక్కలు కాపుకొస్తాయి. ఆకుకూరలైతే నెలరోజులకు కోతకొస్తాయి. తర్వాత నెల రోజుల వరకూ ఆకులు కోసుకుంటూ ఉండొచ్చు. మెంతికూర వారం, పది రోజుల్లోనే కోతకొస్తుంది. కాబట్టి మొక్కలకు సరైన సమయంలో తగిన పోషకాలు ఇవ్వడం, తగుమాత్రంగా నీరు అందించడం అవసరం.
